އިނގިރޭސި ޕްރިމިއާ ލީގުގައި ޓޮޓެންހަމާ ދެކޮޅަށް ކުޅުނު މެޗު ލިވަޕޫލުން ކާމިޔާބުކޮށްފިއެވެ.

އާދިއްތަ ދުވަހުގެ ރޭ ޓޮޓެންހަމްގެ ދަނޑުގައި ލިވަޕޫލުން އެ ޓީމު ބަލިކުރީ 2-1 އިންނެވެ. އެ މެޗުން މޮޅުވެގެން ލީގު ތާވަލްގެ ތިން ވަނަ އަށް އެރުމުގެ ފުރުސަތު ޓޮޓެންހަމަށް އޮތެވެ. ލީގުގައި އެންމެ ފަހުން ކުޅުނު ދެ މެޗުން ލިވަޕޫލް ވަނީ ބަލިވެފައެވެ. އެހެންކަމުން މި މެޗުން މޮޅުވެ އެ ޓީމަށް ކޮންމެ ވެސް ވަރެއްގެ ހަމަޖެހުމެއް ލިބޭނެއެވެ.

މެޗުގެ ފުރަތަމަ ހާފުގައި ލިވަޕޫލުން ވަނީ ދެ ލަނޑު ޖަހާ ލީޑު ނަގާފައެވެ. އެ ޓީމުގެ ދެ ލަނޑު ވެސް ޖެހީ މިޞްރު ފޯވާޑް މުޙައްމަދު ޞަލާޙުއެވެ. ފުރަތަމަ ލަނޑު އޭނާ ޖެހީ ޑާވިން ނޫނޭޒް ދިން ބޯޅައެއް ކޮންޓްރޯލް ކޮށްލުމަށްފަހު ގޯލުގެ ތިރީ ކަނަށް ފޮނުވާލައިގެން 11 ވަނަ މިނެޓުގައެވެ. ދެ ވަނަ ލަނޑު ޞަލާޙު ޖެހީ މެޗުގެ 40 ވަނަ މިނެޓުގައި ޓޮޓެންހަމްގެ ކީޕަރު ހޯގޯ ލޮރިސް އަތް މަތިން ބޯޅަ ގޯލަށް ފޮނުވާލައިގެންނެވެ. މެޗުގައި ޓޮޓެންހަމްގެ ހަމައެކަނި ލަނޑު ޖެހީ އިންގްލެންޑް ފޯވާޑް ހެރީ ކޭންއެވެ. އެއީ މެޗުގެ 70 ވަނަ މިނެޓުގައި ޑޭޖާން ކުލުސެވްސްކީ ދިން ބޯޅައެއް ގޯލަށް ފޮނުވާލައިގެންނެވެ.

މެޗުން މޮޅުވެ ލިވަޕޫލް އޮތީ ކުޅުނު 13 މެޗުން 19 ޕޮއިންޓާ އެކު ތާވަލްގެ އަށް ވަނަ މަގާމުގައެވެ. މެޗުން ބަލިވި ޓޮޓެންހަމް އޮތީ ކުޅުނު 14 މެޗުން 26 ޕޮއިންޓާ އެކު ހަތަރު ވަނައިގައެވެ.