އެންމެ ރަނގަޅު ގޮތަކީ ކަން އޮތް ގޮތް ތެދަށް ބުނުން: ކޮންޓޭ

އެންމެ ރަނގަޅު ގޮތަކީ ކަން އޮތް ގޮތް ސަޕޯޓަރުންނަށް ތެދަށް ކިޔައިދިނުން ކަމަށް ޓޮޓެންހަމްގެ ކޯޗު އެންޓޯނިއޯ ކޮންޓޭ ބުނެފިއެވެ.

ކޮންޓޭ މިހެން ބުނީ އަންނަ ޖެނުއަރީ ޓްރާންސްފާގައި ޓޮޓެންހަމުން ކުޅުންތެރިން ހޯދުމާ ގުޅޭ ގޮތުން ވާހަކަ ދައްކަމުންނެވެ. މީގެ ކުރިން ވެސް ކޮންޓޭ ވަނީ އެކަމަށް ވާހަކަ ދައްކާފައެވެ. އޭނާ ބުނަމުން އައީ އޭނާ އަތުގައި އޮތް ސްކޮޑު ކުރިއަރުވަން ވަގުތު ބޭނުންވާ ކަމަށެވެ. މީގެ އިތުރުން ކުލަބަކަށް އިތުރު ކުޅުންތެރިން ހޯދުމަށް ފައިސާ ބޭނުންވާ ކަމަށް ވެސް އޭނާ ވަނީ ބުނެފައެވެ.

ލީގުގައި އާދިއްތަ ދުވަހުގެ ރޭ ލިވަޕޫލާ ދެކޮޅަށް ނިކުންނަ މެޗުގެ ކުރިން ކޮންޓޭ ބުނީ ޖެނުއަރީ ޓްރާންސްފާގައި ކުލަބުން ކަންތައް ކުރާނެ ގޮތެއް އޭނާ އަށް ނޭންގޭ ކަމަށެވެ. ކޮންޓޭ ބުނީ ބޮޑެތި ކުލަބުތަކުން މުސްތަޤުބަލަށް ފައިސާ ޚަރަދުކުރާއިރު، އޭގެ އުނދަގޫ ޓޮޓެންހަމަށް ކުރާނެ ކަމަށެވެ. އޭނާ ބުނީ އެކަންކަން އޮތް ގޮތް ތެދަށް ސަޕޯޓަރުންނަށް ބުނެދިނުމަކީ އެންމެ ރަނގަޅު ގޮތް ކަމަށެވެ.

ޓޮޓެންހަމްގެ ކޯޗުކަމާ ކޮންޓޭ ހަވާލުވީ 2021 ވަނަ އަހަރުއެވެ. އޭނާގެ އިރުޝާދުގެ ދަށުން މި ސީޒަންގައި ޓޮޓެންހަމް އަންނަނީ ރަނގަޅު ނަތީޖާތަކެއް ނެރެމުންނެވެ. ލީގުގައި ކުޅުނު 13 މެޗުން 26 ޕޮއިންޓާއެކު އެ ޓީމު އޮތީ ތާވަލްގެ ތިން ވަނަ މަގާމުގައެވެ. ޔުއެފާ ޗެމްޕިއަންސް ލީގު ދެ ވަނަ ބުރުން ވެސް ޓޮޓެންހަމް ވަނީ ޖާގަ ހޯދާފައެވެ. ކޮންޓޭގެ އިރުޝާދުގެ ދަށުން ޓޮޓެންހަމް ވަނީ މިހާތަނަށް 55 މެޗު ކުޅެފައެވެ. އޭގެ ތެރެއިން އެ ޓީމު ވަނީ 32 މެޗުން މޮޅުވެ 14 މެޗުން ބަލިވެފައެވެ. އެއްވަރުވީ ނުވަ މެޗެވެ.