ރެއާލުން ސެލްޓިކް ބަލިކުރި މެޗު ޚާއްސަވީ ކޯޗު އަންޗެލޮޓީ އަށް

ޔުއެފާ ޗެމްޕިއަންސް ލީގުގައި ރެއާލް މެޑްރިޑުން ސެލްޓިކް ބަލިކުރި މެޗުގައި ކޯޗު ކާލޯ އަންޗެލޮޓީ އަށް ޚާއްސަ ޝަރަފެއް ލިބިއްޖެއެވެ.

ގްރޫޕް ސްޓޭޖުގެ ފަހު މެޗުގައި ރެއާލުން ސެލްޓިކް ބަލިކުރީ 1-5 އިންނެވެ. މިއީ އަންޗެލޮޓީގެ ކޯޗިން ކެރިއަރުގައި ޗެމްޕިއަންސް ލީގުގައި ހޯދި 103 ވަނަ މޮޅެވެ. މި ޝަރަފު ކުރިން އޮންނަނީ 102 މެޗުން މޮޅުވެގެން އަލެކްސް ފާގަސަން އަތުގައެވެ. އަންޗެލޮޓީ ވަނީ ޗެމްޕިއަންސް ލީގުގައި ހަތް ކުލަބަކަށް އިރުޝާދު ދީފާއެވެ. އެއީ މިހާރުގެ ކުލަބް ރެއާލްގެ އިތުރުން، ޕެރިސް ސެއިންޓް ޖާމަން (ޕީއެސްޖީ)، ބަޔާން މިއުނިކް، ޗެލްސީ، ނަޕޯލީ، ޔުވެންޓަސް އަދި އޭސީ މިލާންއެވެ. މީގެ އިތުރުން ކޯޗެއްގެ ގޮތުގައި އެންމެ ގިނައިން ޗެމްޕިއަންސް ލީގު ކާމިޔާބުކުރުމުގެ ޝަރަފު ވެސް އޮންނަނީ އަންޗެލޮޓީ އަތުގައެވެ. އޭނާ ވަނީ ދެ ކުލަބަކާއެކު ހަތަރު ފަހަރު މުބާރާތް ކާމިޔާބުކޮށްފައެވެ.

ރެއާލުން ސެލްޓިކް ބަލި ކުރި މެޗުގެ ފުރަތަމަ ދެ ލަނޑަކީ ޕެނަލްޓީން ކާމިޔާބުކުރި ލަނޑުތަކެވެ. ފުރަތަމަ ލަނޑު މެޗުގެ ހަ ވަނަ މިނެޓުގައި ލޫކަ މޮޑްރިޗް ޖެހި އިރު، ދެ ވަނަ ލަނޑު ޖެހީ ރޮޑްރީގޯއެވެ. މެޗުގެ 35 ވަނަ މިނެޓުގައި ސެލްޓިކަށް ލިބުނު ޕެނަލްޓީގައި ޔޯސިޕް ޔުރަނޮވިޗް ބޯޅަ ރެއާލްގެ ކީޕަރު ތިބައޫ ކޯޓުއާ ވަނީ މަތަކޮށްފައެވެ.

ދެ ވަނަ ހާފަށް ނުކުމެ މެޗުގެ 51 ވަނަ މިނެޓުގައި މާކޯ އަސެންސިއޯ ވަނީ ރެއާލްގެ ތިން ވަނަ ލަނޑު ޖަހާފައެވެ. އޭނާ ލަނޑު ޖެހީ ޑެނީ ކަރްވަހާލް ތަނަވަސްކޮށްދިން ފުރުސަތަކުންނެވެ. އޭގެ 10 މިނެޓު ފަހުން ރެއާލްގެ ހަތަރު ވަނަ ލަނޑު ޖެހީ ވިނީޝިއަސް ޖޫނިއާއެވެ. ރެއާލްގެ ފަހު ލަނޑު 71 ވަނަ މިނެޓުގައި ޖެހީ ފެޑެރީކޯ ވަލްވާޑޭއެވެ. ސެލްޓިކްގެ ހަމައެކަނި ލަނޑު 84 ވަނަ މިނެޓުގައި ޖެހީ ޖޮޓާއެވެ. އެއީ ހިލޭ ޖެހުމެއްގައި އޭނާ ކާމިޔާބު ކުރި ލަނޑެކެވެ.

މި ގްރޫޕްގެ ހުރިހާ މެޗުތަކެއް ނިމުނުއިރު، ރެއާލް އެއް ވަނައިގައި އޮތީ ހަ މެޗުން 13 ޕޮއިންޓާއެކުއެވެ. ދެ ވަނައިގައި އޮތީ 12 ޕޮއިންޓާއެކު ލައިޕްޒިގްއެވެ. ތިން ވަނައިގައި ހަ ޕޮއިންޓާއެކު ޝަޚްތަރް ޑޮނެސްކް އޮތް އިރު، ފުލުގައި އޮތީ ދެ ޕޮއިންޓާއެކު ސެލްޓިކްއެވެ.