ޔުވެންޓަސް އަތުން މޮޅުވި ނަމަވެސް ޕީއެސްޖީ އަށް ދެ ވަނަ

ޔުއެފާ ޗެމްޕިއަންސް ލީގު ގްރޫޕް އެޗްގެ ފަހު މެޗުގައި ޔުވެންޓަސް ބަލިކޮށް ޕެރިސް ސެއިންޓް ޖާމަން (ޕީއެސްޖީ) ދެ ވަނަ ބުރުން ޖާގަ ހޯދައިފިއެވެ.

ބުދަ ދުވަހުގެ ރޭ ޔުވެންޓަސްގެ ދަނޑުގައި ކުޅުނު މެޗު ޕީއެސްޖީން ކާމިޔާބުކުރީ 2-1 އިންނެވެ. މި ދެ ޓީމު ޕީއެސްޖީގެ ދަނޑުގައި ބައްދަލު ކުރި މެޗު ވެސް ޕީއެސްޖީން ކާމިޔާބުކުރީ 1-2 އިންނެވެ.

ޔުވެންޓަސްގެ ދަނޑުގައި ޕީއެސްޖީ އަށް އެންމެ ފުރަތަމަ ލީޑު ނަގައިދިނީ ފްރާންސްގެ ފޯވާޑް ކީލިއަން އެމްބާޕޭއެވެ. އެއީ މެޗުގެ 13 ވަނަ މިނެޓުގައި އާޖެންޓީނާގެ ތަރި ލިއޮނެލް މެސީ ތަނަވަސްކޮށްދިން ފުރުސަތަކުންނެވެ. މި ސީޒަނުގައި މެސީ އަންނަނީ ޕީއެސްޖީގައި މޮޅު ކުޅުމެއް ދައްކަމުންނެވެ. މިއީ ޗެމްޕިއަންސް ލީގުގައި އެމްބާޕޭ ކާމިޔާބުކުރި 40 ވަނަ ލަނޑެވެ.

ފުރަތަމަ ހާފު ނިމުމުގެ ކުރިން ޔުވެންޓަސް އިން ވަނީ ލަނޑު ޖަހައި ނަތީޖާ ހަމަހަމަކޮށްފައެވެ. މެޗުގެ 39 ވަނަ މިނެޓުގައި އެ ޓީމަށް ނަތީޖާ ހަމަހަމަކޮށްދިނީ ލިއާންޑްރޯ ބޮނޫޗީއެވެ. މެޗުން ޕީއެސްޖީ މޮޅުކޮށްދިން ލަނޑު ދެ ވަނަ ހާފުގެ 69 ވަނަ މިނެޓުގައި ނޫނޯ މެންޑޭސް ޖެހީ އެމްބާޕޭ ތަނަވަސްކޮށްދިން ފުރުސަތަކުންނެވެ.

މެޗުން މޮޅުވެ ޕީއެސްޖީއަށް އެ ޓީމު ކުޅުނު ހަ މެޗުން ލިބެނީ 14 ޕޮއިންޓެވެ. ޕީއެސްޖީ އަށް ލިބެނީ މި ގްރޫޕްގެ ދެ ވަނަ އެވެ. ގްރޫޕްގެ އެއް ވަނައިގައި އޮތް ބެންފީކާ އަށް ވެސް ލިބެނީ 14 ޕޮއިންޓެވެ. ބެންފީކާ އިން ކުރި ހޯދީ އަވޭ ގޯލުންނެވެ. ޕީއެސްޖީ އަތުން ބަލިވި ޔުވެންޓަސް އޮތީ ތިން ވަނައިގައެވެ. އެ ޓީމަށް ޖެހޭނީ ޔުއެފާ ޔޫރޮޕާ ލީގުގައި ވާދަކުރާށެވެ.