ހޫދުގެ މައްޗަށް ކުރާ ޓެރަރިޒަމްގެ ދައުވާތައް މަދަނީ މިންގަނޑުން ކުރިއަށް ގެންދެވޭނެ

ޓެރަރިޒަމްގެ އަމަލެއް ރާވައި ހިންގައިފާނެކަމުގެ އިންޒާރުދެމުންދާކަމަށް ތުހުމަތުކޮށް ދައުވާ އުފުލާފައިވާ ކ. މާލެ، ވ. ދެލްވައްތަ، ހޫދު މުޙައްމަދު ޒާހިރުގެ މައްޗަށް އުފުލާފައިވާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ މުޙައްމަދު މިސްބާޙުއެވެ.

މި މައްސަލައިގެދައުވާތައްހުށަހެޅިއިރު ޕީޖީ އޮފީހުން ބުނީ، އޭނާ ސޯޝަލް މީޑިއާ އެކި ޕްލެޓްފޯމްތަކުގައި، އެކި އެކައުންޓްތަކުން ޓެރަރިސްޓް ޖަމާޢަތެއްކަމަށްވާ އިސްލާމިކް ސްޓޭޓް ޖަމާޢަތައް ތާޢީދުކޮށް، އެ ޖަމާޢަތުގެ ލިޔެކިޔުންތަކާއި ފޮޓޯ އާއި ވީޑިއޯ އިންޓަނެޓް މެދުވެރިކޮށް ފަތުރައި ޝާއިޢުކޮށް، ޓެރަރިޒަމްގެ އަމަލެއް ރާވައި ހިންގައިފާނެކަމުގެ އިންޒާރު ދެމުންދާކަމަށް ތުހުމަތު ކުރެވޭ ކަމަށެވެ.

އޭނާގެ މައްޗަށް މި ދައުވާތައް އުފުލައި ކްރިމިނަލް ކޯޓަށް ހުށަހަޅާފައިވަނީ 18 އޭޕްރީލް 2022 ގައެވެ.

މި މައްސަލައިގެ އެންމެ ފަހުން ބޭއްވި އަޑުއެހުމުގައި ވަނީ ދިފާއުން ހެކި ހާމަ ކުރުމަށް ފުރުސަތެއް ދެއްވާފައެވެ. އެކަމާ ގުޅޭގޮތުން ބުދަ ދުވަހުގެ އަޑުއެހުމުގައި ދިފާއުން ބުނީ، ދިފާއު ބިނާކުރާނީ ދައުލަތުން ހުށަހަޅާ ލިޔެކިޔުންތަކުގައި ބުނާ ނަތީޖާ ޙާސިލުނުވާކަން ބަޔާންކޮށްދިނުމުގެ މައްޗަށް ކަމަށެވެ.

އޭނާގެ ވަކީލު ވިދާޅުވީ، އެއްވެސް ދިފާއީ ހެތްކެއް ލިޔުމުން ހުށަހަޅާފައި ނުވާނެ ކަމަށާއި، ދިފާއު ބިނާ ކުރަނީ ދައުލަތުގެ ހެކި ނަފީ ކުރުމުގެ މައްޗަށް ކަމަށެވެ.

މި އަޑުއެހުމުގައި ގާޒީ މިސްބާޙު ވަނީ ހޫދުގެ މައްޗަށް ކުރާ ދައުވާތައް މަދަނީ މިންގަނޑުން ކުރިއަށް ގެންދެވޭނެކަމަށް ނިންމަވާފައެވެ. އަދި ޝަރީއަތުގެ ކުރީގެ ހުށަހެޅުންތަކަށް ވަނީ ފުރުސަތު ދެއްވާފައެވެ.

އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، ދައުލަތުން މީގެ ކުރިން ވެސް ހެކި ރައްކާތެރި ކުރުމުގެ އަމުރަކަށް އެދިފައިވާނެ ކަމަށާއި، ހެކި ރައްކާތެރި ކުރުމުގެ ދާއިމީ އަމުރެއް ނެރުއްވައިފި ނަމަ، ޝަރީއަތުގެ ކުރީގެ ހުށަހެޅުމެއް ދައުލަތުން ހުށަހަޅަން ނެތް ކަމަށެވެ.

ދިފާއުން ޝަރީއަތުގެ ކުރީގެ ހުށަހެޅުމެއްގެ ގޮތުގައި ހުށަހަޅާފައިވަނީ ދައުލަތަށް އިތުރަށް ހެކި ހުށަހެޅުމަށް ފުރުސަތު ނުދިނުމަށެވެ. ނަމަވެސް ޖިނާއީ އިޖުރާއަތުގެ ޤާނޫނުގައި ބަޔާންކޮށްފައިވާ މިންގަނޑުގެ ތެރެއިން ހެކި ހުށަހެޅުމުގެ ފުރުސަތު ދެފަރާތަށް ވެސް ލިބިގެންވާ ކަމަށާއި، އެ ޙައްޤު އުނި ކުރެވޭ ގޮތަށް ނިންމުމެއް ނުނިންމޭނެކަމަށް ގާޒީ ވިދާޅުވިއެވެ.

ގާޒީ މިސްބާހު ވިދާޅުވީ، ދެން އޮންނަ އަޑުއެހުމެއްގައި ހެކި ރައްކާތެރި ކުރުމުގެ އަމުރާ ގުޅޭގޮތުން ދެފަރާތަށް ވާހަކަ ދެއްކުމަށް ފުރުސަތު ދެއްވުމަށްފަހު ގޮތެއް ނިންމަވާނެ ކަމަށެވެ. އަދި ހުށަހެޅުންތަކަށް ވާހަކަ ދެއްކުމަށް ވެސް ދެފަރާތަށް ފުރުސަތު ދެއްވާނެކަމަށް ގާޒީ ވިދާޅުވިއެވެ.

ޕީޖީ އޮފީހުން މައުލޫމާތު ދޭ ގޮތުގައި ހޫދު މުޙައްމަދު ޒާހިރު އާ ގުޅޭ މަޢުލޫމާތު ދިވެހިރާއްޖެ އާ ޙިއްޞާކޮށްފައިވަނީ ބޭރުގެ އިންޓެލިޖެންސް އޭޖެންސީތަކުންނެވެ. މި މައްސަލައިގެ ތަޙުޤީޤަށް ބޭރުގެ އެކި ޤައުމުތަކުގެ އިންޓެލިޖެންސް އޭޖެންސީތަކާއި، ތަޙުޤީޤީ އިދާރާތަކުގެ އެހީތެރިކަން ލިބިފައިވާކަމަށް ވެސް ޕީޖީ އޮފީހުން ބުނެއެވެ.