ބޮންޑައި ބީޗުގައި ހަމަލާ ދިނީ ބައްޕަ އާއި ދަރިފުޅު، އައިސިސްއާ ގުޅުން އޮތް ކަމުގެ ތުހުމަތު

ސިޑްނީގެ ބޮންޑައި ބީޗުގައި ތިބި ބަޔަކަށް އަމާޒުކޮށް ހަމަލާ ދިނުމުގައި ބައިވެރިވެފައި ވަނީ ބައްޕަ އަކާއި، އޭނާގެ ދަރިފުޅު ކަމަށާއި، އެ މީހުންނަކީ އައިސިސް ޖަމާއަތާ ގުޅުން އޮތް ބަޔަކަށް ވުމުގެ ފުރުސަތު އޮތް ކަމަށް ރިޕޯޓުތައް ބުނެފި އެވެ.

އާދީއްތަ ދުވަހު ދިން މި ހަމަލާގައި 15 މީހުން މަރުވެފައިވާ ކަމަށް ވަނީ ބުނެފަ އެވެ. އެ ހަމަލާއާ ގުޅިގެން އޮސްޓްރޭލިއާގެ ބޮޑު ވަޒީރު އެންތަނީ އަލްބަނީސް އާއި، އެހެން ޤައުމު ތަކުގެ ވެރިން ވެސް ވަނީ އެކަން ވަރަށް ބޮޑަށް ކުށްވެރި ކުރައްވައިފަ އެވެ. އަދި އަލްބަނީސް ވަނީ، އެ ހާދިސާގެ ފުރިހަމަ ތަހުގީގެއް ކުރިއަށް ގެންދަވާނެ ކަމަށް ވެސް ވިދާޅުވެފަ އެވެ.

މި ހަމަލާ ދިނުމަށް މެދުވެރިވީ ކޮން ސަބަބެއް ކަމެއް މިހާތަނަށް ފުލުހުން ހާމަ ކޮށްފައި ނުވި ނަމަވެސް، މިއީ ސީދާ ޔަހޫދީންނާ ދެކޮޅަށް ދީފައިވާ ހަމަލާއެއް ކަމަށް ސާފުވާ ކަމަށް ފުލުހުން ބުނެފައިވެ އެވެ. 

އެ ހަމަލާގެ ތަހުގީގުގައި އިސްކޮށް މަަސައްކަތް ކުރައްވާ އޮފިޝަލަކު އޭބީސީ އަށް ވިދާޅުވެފައި ވަނީ، ހަމަލާ ދިން މީހުން ބޭނުން ކުރި ކާރުން އައިސިސް ޖަމާއަތުގެ ދިދަ ފެނިފައިވާ ކަމަށެވެ. ނަމަވެސް، ނިއު ސައުތު ވޭލްސްގެ ފުލުހުން ބުނެފައި ވަނީ އެ ރިޕޯޓު މިހާތަނަށް ކަށަވަރު ވެފައި ނުވާ ކަމަށެވެ. 

ހަމަލާ ދިނުމުގައި ބައިވެރިވެފައިވާ ދެ ބަފައިގެން ތެރެއިން ބައްޕަ އަކީ އުމުރުން 50 އަހަރުގެ މީހެކެވެ. އަދި ދަރިފުޅަކީ އުމުރުން 24 އަހަރުގެ މީހެކެވެ. ހަމަލާ ދިނުމުގެ ކުރިން އެ ދެ މީހުން އެކި ގޮތް ގޮތަށް ހަރަކާތްތެރިވާ މަންޒަރާއި، ފިލައިގެން ތިބެ އެ ސަރަހައްދުގައި ތިބި މީހުންނަށް ހަމަލާ ދޭ މަންޒަރު ފެންނަ ވީޑިއޯތައް ވެސް ސޯޝަލް މީޑިއާގައި ވަނީ ދައުރުވެފަ އެވެ. 

ބައެއް މީޑިއާ ތަކުގައި ބުނެފައި ވަނީ ދެ ބަފައިގެން ތެރެއިން ބައްޕަ އަކީ، ސާޖިދު އަކްރަމް ނަމަކަށް ކިޔާ މީހެއް ކަަމަށެވެ. ބޮންޑީ ބީޗުގައި ތިބި މީހުންނަށް ހަމަލާ ދިނުމަށް ފަހު، އޭނާއާ ފުލުހުންނާ ދެ މެދު ވެސް ހަމަލާ ތަކެއް ބަދަލު ކުރެވުނުއިރު، އޭނާ މަރުވެފައިވާ ކަމަަށް ވަނީ ރިޕޯޓު ކޮށްފަ އެވެ. މީޑިއާ ތަކުގައި ބުނެފައިވާ ގޮތުން ހަ ބަޑިއެއް ބޭނުން ކުރުމުގެ ހުއްދަ އޭނާ އަތުގައި އޮވެ އެވެ. އެއާ ހަވާލާދީ ފުލުހުން ބުނެފައި ވަނީ، ހުއްދަ އޮތް ހަ ބަޑި ވެސް އޭނާ ބޭނުން ކޮށްފައިވާ ކަމަށް ޤަބޫލު ކުރެވޭ ކަމަށެވެ. 

އެކަމާ ގުޅޭ ގޮތުން އޮސްޓްރޭލިއާގެ ހޯމް އެފެއާޒް މިނިސްޓަރު ޓޯނީ ބާކް ހޯމަ ދުވަހު ވިދާޅުވެފައި ވަނީ، ހަމަލާ ދިނުމުގައި ބައިވެރިވި ބައްޕަ އެންމެ ފުރަތަމަ އޮސްޓްރޭލިއާ އަށް އައިސްފައި ވަނީ 1998 ވަނަ އަހަރު ކަމަށެވެ. އަދި އޭރު އޭނާ އޮސްޓްރޭލިއާ އަށް އައިސްފައި ވަނީ ދަރިވަރުންގެ ވިސާގައި ކަމަށް ވެސް ހާމަ ކުރައްވާފައިވެ އެވެ. 

އޭގެ ފަހުން 2001 ވަނަ އަހަރު، އޮސްޓްރޭލިއާގެ ރައްޔިތުންނާއި، ދާއިމީ ރެޒިޑެންޓުންގެ ޕާޓްނަރުންނަށް ދޭ ވިސާ އޭނާ އަށް ލިބިފައިވާ ކަމަށް ވެސް ހާމަ ކޮށްފައިވެ އެވެ. އެ ވިސާ ލިބުނު ފަހުން، ތިން ފަހަރެއްގެ މަތިން އޭނާ ޤައުމުން ބޭރަށް ދަތުރު ކޮށްފައިވާ ކަމަށް ވެސް ހާމަ ކޮށްފައިވެ އެވެ. 

ހަމަލާގައި ބައްޕައާ އެކު ބައިވެރިވި ދަރިފުޅަކީ އޮސްޓްރޭލިއާ އަށް އުފަން މީހެއް ކަމަށް ހޯމް އެފެއާޒް މިނިސްޓަރު ވިދާޅުވެފައިވެ އެވެ. އަދި މިވަގުތު އޭނާ އަށް އަންނަނީ ސިޑްނީގެ ހޮސްޕިޓަލެއްގައި ފަރުވާ ދެމުން ކަމަށާއި، އޭނާގެ ޙާލު ދަށް ކަމަށް ވެސް ވިދާޅުވެފައިވެ އެވެ. ނަމަވެސް، އިތުރު އެއްވެސް ތަފްސީލެއް މިވަގުތަށް ހާމަ ކުރައްްވާފައި ނުވެ އެވެ. 

އޮސްޓްރޭލިއާގެ މީޑިއާ ތަކުގައި ބުނެފައިވާ ގޮތުން ހަމަލާގައި ބައިވެރިވި ދަރިފުޅުގެ ނަމަކީ، ނަވީދު އަކްރަމް އެވެ. އަދި މީގެ ކުރިން 2019 ވަނަ އަހަރު ވެސް، އޮސްޓްރޭލިއާގެ ސެކިއުރިޓީ ޚިދުމަތް ތަކުގެ ސަމާލު ކަމަށް އޭނާ އައިސްފައިވާ ކަމަށް ބޮޑު ވަޒީރު އަލްބަނީސް ވަނީ ހާމަ ކުރައްވާފައި އެވެ. 

ބޮޑު ވަޒީރު އަލްބަނީސް ވިދާޅުވެފައި ވަނީ، އޭރު ވެސް އޭނާ އާއި ބައެއް އެހެން ފަރާތްތަކާ ދެމެދު ގުޅުމެއް އޮންނަ ކަމަށް ބެލެވުނުއިރު، އެކަން ވަރަށް ފުރިހަމަ އަށް ތަހުގީގު ކޮށްފައިވާ ކަމަށެވެ. ނަމަވެސް، އޭރު ނިންމާފައި ވަނީ އޭނާގެ ފަރާތުން އެއްވެސް ނުރައްކަލެއް ނުވަތަ، އޭނާގެ ފަރާތުން އަނިޔާވެރި އަމަލެއް ފެންނާނެ ކަމުގެ އެއްވެސް އިޝާރާތެއް ނެތް ކަމަށެވެ. 

އޭބީސީގައި ބުނެފައި ވަނީ ނަވީދު އަކީ އައިސިސް ޖަމާއަތުގެ މެމްބަރުންނާ ގުޅުމެއް އޮންނަ މީހެއް ކަމަށެވެ. އެގޮތުން 2019 ވަނަ އަހަރުގެ ޖުލައި މަހުގެ ތެރޭގައި، ޓެރަރިސްޓު ހަމަލާއެއް ދޭން އުޅޭ ކަމުގެ ތުހުމަތުގައި ހައްޔަރުކޮށް، ޖަލު ޙުކުމެއް ވެސް އިއްވި އައިސިސް ޖަމާއަތުގެ މެމްބަރަކާއި، އޭނާއާ ވަރަށް ގާތް ގުޅުމެއް އޮތް ކަމަށް ޤަބޫލު ކުރެވޭ ކަމަށް ވަނީ ރިޕޯޓު ކޮށްފަ އެވެ. 

މި ހާދިސާއާ ގުޅިގެން ފުލުހުން ބުނެފައި ވަނީ، ސިޑްނީގެ ހުޅަނގުގައި ހުރި ދެ ތަނެއް ރޭޑް ކުރި ކަމަށެވެ. އެއީ ނަވީދު ދިރިއުޅޭ ކަމަށް ބެލެވުނު ގެއާއި، ހަމަލާ ދިނުމުގެ ކުރިން ދެ ބަަފައިން މަޑު ކުރި ކަމަށް ބެލެވޭ ތަނެކެވެ.