ވޯލްޑް ކަޕަށް ތުރުކީ ސިފައިން ޤަތަރުގައި، ރައީސް އުރުދުޣާން ސިފައިންނާ ބައްދަލުކުރައްވައިފި

މި މަހުގެ 20 ވަނަ ދުވަހު ޤަތަރުގައި ފަށާ ފީފާ ވޯލްޑް ކަޕްގެ ސަލާމަތީ ކަންކަން ބެލަހައްޓާ ތުރުކީގެ ސިފައިން ޤަތަރަށް ގޮސްފިއެވެ.

މިކަމަކީ މުބާރާތަށް ތައްޔާރުވުމުގެ ގޮތުން ޤަތަރުގެ ސަރުކާރާއި، ތުރުކީގެ ސަރުކާރާ ދެމެދު ވެވުނު އެއްބަސްވުމެއްގެ ދަށުން ކުރިއަށްދާ ކަމެކެވެ. މިގޮތުން މުބާރާތުގެ ސަލާމަތީ ކަންކަން ބެލެހެއްޓުމަށް ތުރުކީން ވަނީ 3000 ރަޔަޓް ފުލުހުންގެ އިތުރުން، 100 ސްޕެޝިއަލް އޮޕަރޭޝަންސް ފުލުހުންނާއި، 50 ބޮމްބް ސްކޮޑް ފުލުހުންނާއި 80 ޑޯގް ސްކޮޑުގެ ފުލުހުން ވަނީ ފޮނުވާފައެވެ. އެ މީހުން މިހާރު އަންނަނީ ޤަތަރުގައި މުބާރާތުގެ ސަލާމަތީ ކަންކަމަށް ތައްޔާރުވަމުންނެވެ.

މީގެ އިތުރުން ވެސް ތުރުކީން ވަނީ އިތުރު 2000 ރަޔަޓް ފުލުހުން ޤަތަރަށް ފޮނުވާފައެވެ. މިއީ ޤަތަރު ސަރުކާރުގެ އެދުމުގެ މަތިން، މުބާރާތް ހޯސްޓް ކުރާ ފަރާތުން ޚަރަދުކުރާ ގޮތަށް ފޮނުވި ފުލުހުންނެވެ. މި ފުލުހުންގެ އެއްވެސް ޚަރަދެއް ތުރުކީން ބަލަހައްޓަން ނުޖެހުނު ނަމަވެސް، ކޮމާންޑު ކުރިއަށް ދާނީ ތުރުކީގެ ބެލުމުގެ ދަށުންނެވެ.

ޤަތަރުގެ ވެރި ރަށް ދޯހާގައި ތިބި މި ފުލުހުންނާއި ތުރުކީގެ ރައީސް ރަޖަބް ތައްޔިބު އުރުދުޣާން ވަނީ ވީޑިއޯ ކޮންފަރެންސް މެދުވެރިކޮށް ބައްދަލުކުރައްވާފައެވެ. މި ބައްދަލުކުރެއްވުމުގައި ވާހަކަ ދައްކަވަމުން ތުރުކީގެ ޕޮލިސް ފޯހުގެ އިސްވެރިޔާ ވިދާޅުވީ ޤަތަރުގެ ފުލުހުންނާ ގުޅިގެން މުބާރާތް ކުރިއަށްދާ ހުރިހާ ސްޓޭޑިއަމްތަކެއްގައި ތުރުކީގެ ފުލުހުން ހަރަކާތްރެރިވަމުންދާނެ ކަމަށެވެ. މެޗުގެ އިތުރުން ޓީމުތަކުން ތިބޭ ހޮޓާތަކާއި، މުބާރާތާ ގުޅިގެން ފެސްޓިވަލްތައް ކުރިއަށްދާ ތަންތަނުގެ ސަލާމަތީ ކަންކަން ބަލަހައްޓާނެ ކަމަށް ވެސް އޭނާ ބުންޏެވެ. އޭނާ ބުނީ ތުރުކީގެ ބޭނުމަކީ މުބާރާތް އަމާންކަމާއި އޮމާންކަމާ އެކު ނިމުންކަމަށެވެ.

މީގެ އިތުރުން ތުރުކީގެ ރައީސް އުރުދުޣާން ވެސް ވަނީ ފުލުހުންގެ ކިބައިން އެކަމަށް އެދިވަޑައިގެންފައެވެ. އުރުދުޣާން ވިދާޅުވީ ތުރުކީގެ ފުލުހުންނާ އެކު މުބާރާތުގެ ސަލާމަތީ ކަންކަން ފުރިހަމަ އަށް ދާނެކަމަށް ޔަޤީންކުރައްވާ ކަމަށެވެ. އުރުދުޣާން ވަނީ ޤަތަރަކީ ތުރުކީއާ ވަރަށް ގާތް ގުޅުމެއް އޮންނަ ޤައުމެއް ކަމަށް ވެސް ވިދާޅުވެފައެވެ.

ޤަތަރުގައި ކުރިއަށްދާ މުބާރާތުގެ ސަލާމަތީ ކަންކަން ބެލެހެއްޓުމަށް ތުރުކީގެ އިތުރުން ޕާކިސްތާނުން ވެސް ވަނީ ސިފައިން ފޮނުވަން ނިންމާފައެވެ. މިއަަހަރުގެ މުބާރާތަކީ އަރަބި އިސްލާމީ ޤައުމެއްގައި ބާއްވާ ފުރަތަމަ މުބާރާތްކަމުން، އަރަބި ގިނަ ޤައުމުތަކުން އަންނަނީ މުބާރާތުގެ އެކި ކަންކަމުގައި ޤަތަރަށް އެހީތެރިކަން ދެމުންނެވެ.