ހުދުމުހުތާރު ރިޔާސަތުތަކުގެ ކުރިމަތީގައި ރައްޔިތުންގެ ހައްގުގައި ބަސްބުނުމަކީ ދަތި ކަމެއްކަން އެނގިވަޑައިގަންނަވާ ކަމަށް ވިދާޅުވެ، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ފާޑު ވިދާޅުވެއްޖެއެވެ.
މަޖިލީހުގައި ޗާގޮސް ނުވަތަ ފޯޅަވަހީގެ މައްސަލައިގައި މި ސަރުކާރުން ކަންކުރި ގޮތް ރައްޔިތުންގެ މަޖިލީހުގެ ހާއްސަ ކޮމިޓީއަކުން ބެލުމަށް ގޮވާލައި އެމްއެންޕީގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް ހުށަހެޅުއްވި ގަރާރަށް ބަހުސްކުރައްވަމުން ޝިފާއު ވަނީ އެއީ ސިޔާސީ ބޭނުމެއްގައި ހުށަހެޅި ސިޔާސީ ގަރާރެއް ކަމަށް ވިދާޅުވެފައެވެ. އަދި އެ މައްސަލައިގައި ކުރީގެ ރައީސުންނާއި ބަންޑާރަ ނައިބުން ސަރުކާރަށް ފާޑުކިޔަމުން ދަނީ ވެސް ސިޔާސީ ބޭނުމަކަށް ކަމަށް އޭނާ ތުހުމަތުކުރެއްވިއެވެ.
ޝިފާއު ވަނީ ޗާގޮސް މައްސަލައިގައި އަސްލު އޮޅުވާލަން ސަރުކާރަށް ފާޑުކިޔާ ފަރާތްތަކުން މަސައްކަތްކުރާ ކަމަށް ވެސް ވިދާޅުވެފައެވެ. އަދި ޗާގޮސްގެ ވާހަކަ ކުރިން ނުދައްކާ، ޗާގޮސް އިން ރާއްޖެ އަކީ ރާއްޖޭގެ ތަނެއް ކަަމަށް ބުނެ ކުރިން ވާހަކަދައްކާފައި ނުވަނީ ކީއްވެތޯ ވެސް އޭނާ ވަނީ ސުވާލުއުފައްދަވާފައެވެ. އަދި ކުރީގެ ރައީސުންނާއި ބަންޑާރަ ނައިބުން މަޤާމުގައި ތިއްބެވި އިރު އެ މަސައްކަތް ނުކުރި ސަބަބާ މެދު އޭނާ ވަނީ ސުވާލު އުފައްދަވާފައެވެ.
މިރާއްޖޭގެ ވެރިކަން ކުރި ފަރާތްތަކުން ވެސް ތިމަންނާގެ ޒިންމާ އަދާނުކޮށް އޮއްވާ އެތި ގެއްލުނީމާ ދެން ނުކުމެ ޒިންމާއިން ބަރީއަވާން އުޅުނަސް ނުވާނެ އެއީ މި މައްސަލައިގެ އަސްލަކީ. ހަގީގަތަކީ. އުފެދުނު ހިސާބަކީމެންބަރު ޝިފާއު
ޝިފާއު މި މޭރުމުން ވާހަކަދައްކަވަން ފެއްޓެވުމުން ރައީސް ނަޝީދު ވަނީ މެންބަރުގެ ވާހަކަ ހުއްޓުވާ ރާއްޖޭގެ މިނިވަންކަން ދަމަހައްޓަން ރާއްޖޭގެ ވެރިންނާއި ބަންޑާރަ ނައިބުން މަސައްކަތް ކުރެއްވި ކަމަށް ވިދާޅުވެ، އެ ފަރާތްތައް ދިފާއުކުރައްވާފައެވެ.
އަޅުގަނޑު އެއްޗެއް ނުދަންނަވާ އިންނަން މި އުޅުނީ އެހެން ނަމަވެސް ދިވެހިރާއްޖޭގެ ހުރިހާ ބަންޑާރަ ނައިބުން ވެސް، ދިވެހިރާއްޖޭގެ ހުރިހާ ވެރިން ވެސް ދިވެހިރާއްޖެ އިގްތިސާދީ ސިޔާސީ ސަރަހައްދު ހިފެހެއްޓުމަށް ޓަކައި. ރާއްޖޭގެ ރައްޔިތުންނަށް ސަލާމަތްވެ މިނިވަންކަން މަތީ މިއޮތީ.ރައީސް ނަޝީދު
ރައީސް ނަޝީދު އެފަދައިން ވިދާޅުވުމުން ޝިފާއު ވަނީ ހުދުމުހުތާރު ރިޔާސަތެއްގެ ކުރިމަތީގައި ރައްޔިތުންގެ ހައްގުގައި ބަސްބުނުމާއި ރައްޔިތުންނަށް ކަންކަން ސާފުކޮށްދިނުމަކީ އުނދަނގޫވާނެ ކަން އެނގިވަޑައިގަންނަވާ ކަމަށް ވިދާޅުވެފައެވެ. އަދި ޗާގޮސް މައްސަލައިގައި ކޯޓުތަކުން ގޮތް ނިންމާފައި ވަނިކޮށް ގަސްތުގައި އެ މައްސަލައިގެ ހަގީގަތް އޮޅުވާލާ ބަޔަކު ޖަޒުބާތުގައި ޖައްސަން ގަސްތުގައި ސިޔާސީ ބޭނުމުގައި މަސައްކަތްކުރާ ކަމަށް ވެސް އޭނާ ވަނީ ވިދާޅުވެފައެވެ. އަދި މަޖިލީހުގެ ރިޔާސަތުން ފާސްކޮށްގެން އެހެން ގައުމެއްގެ ސިޔާދަތަށް އަރައިގަނެވޭ ނަމަ މަސްވެރިންގެ ހައްގުގައި އިންޑިއާ ކަނޑުގައި އޮތް މަސް ކަނޑު ހޯދަން މަަސައްކަތްކުރަން ޖެހޭ ކަމަށް ޝިފާއު ވިދާޅުވިއެވެ. އެ ހިސާބުން ރައީސް ނަޝީދު ވަނީ ކަނޑައެޅިގެން ބައިނަލްއަގުވާމީ އުސޫލުތަކުން ކަނޑައެޅިފައިވާ ސިޔާސީ ސަރަހައްދުތަކަށް ބަހުސް ކުރަން ފުރުސަތެއް ނެތް ކަމަށް ވިދާޅުވެ މެންބަރުގެ ފުރުސަތު ނިމުނީ ކަމަށް ވިދާޅުވެފައެވެ. އެހިސާބުން ޝިފާއު ވަނީ އޭނާ އަށް ވާހަކަދެއްކެވުމަށް ދެއްވި ފުރުސަތު ހަމަނުވާ ކަމަށް ވިދާޅުވެ އިތުރު ފުރުސަތު ދެއްވުމަށް އެދިވަޑައިގަންނަވާފައެވެ.
މި މައްސަލައިގައި ކޯޓު މަރުހަލާ ކުރިއަށް ދާ ގޮތާ މެދު ޝިފާއު އާއި ރައީސް ނަޝީދާ ދެމެދު ބަހުސެއް ހިނގި މަންޒަރު ފެނިގެންދިޔައެވެ.
ޗާގޮސް މައްސަލައިގައި ސަރުކާރުން ބުނެފައިވަނީ ޗާގޮސްގެ މައްޗަށް އޮތް މޮރިޝަސްގެ ސިޔާދަތީ ބާރާ ބެހޭ ގޮތުން އައިސީޖޭ އިން ނިންމާފައިވާ ނިންމުމަށް އދ ގައި ރާއްޖެއިން ތާއީދުކުރަން ނިންމި މައްސަލައާއި، ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން އިޓްލޮސްގައި ކުރިއަށްދާ މައްސަލައަކީ ތަފާތު ދެ މައްސަލަ ކަމަށެވެ. އަދި ރާއްޖޭގެ ދެކުނުން، ރާއްޖޭގެ އިޤްތިޞާދީ ސަރަހައްދުގެ ބައެއް ޗާގޮސްގެ ސަރަހައްދަށް ވަންނަ ކަމަށް މޮރިޝަސް އިން ބުނާ މައްސަލައިގައި އިޓްލޮސްގައި ދިވެހިރާއްޖެ އިން ނަގާފައިވާ ސްޓޭންޑް ބަދަލެއް ނުވާ ކަމަށެވެ. ނަމަވެސް ޗާގޯސްގެ މައްސަލައިގައި ރާއްޖޭގެ ބައެއް ގެއްލޭކަމަށް ބުނެ އިދިކޮޅު ފަރާތްތަކުގެ އިތުރުން އެމްޑީޕީގެ ބައެއް މެންބަރުން ވެސް ދަނީ ސަރުކާރަށް ފާޑުކިޔަމުނެވެ.
