މެންބަރު ޝިފާއުއަށް މަރުގެ އިންޒާރުދިން މައްސަލަ ފުލުހުން ބަލަންފަށައިފި
ހޯމަ ދުވަހު މަޖިލީހުން ވަނީ އެ މައްސަލަ ބަލައިދިނުމަށް ވަނީ ފުލުހުންނަށް ހުށަހަޅާފައި
ރައީސް އަޒުލުކުރުމަށް އެދި ޕީޖީއަށް ހުށަހަޅާނެކަމަށް ވިދާޅުވުމުން ފޭސްބުކުގައި މީހަކު ވަނީ މެންބަރު ޝިފާއު ކަރު ކަނޑާލަންޖެހޭނެކަމަށް ބުނެ އިންޒާރުދީފައި
އިހަވަންދޫ ދާއިރާގެ މެންބަރު މުހައްމަދު ޝިފާއުއަށް މަރުގެ އިންޒާރުދިން މައްސަލަ ބަލައިދިނުމަށް ރައްޔިތުންގެ މަޖިލީހުން ފުލުހުންނަށް ހުށަހަޅާ، އެ މައްސަލަ ފުލުހުން ބަލަން ފަށައިފިއެވެ.
މަޖިލީހުން ބުނީ މެންބަރު ޝިފާއުއަށް މަރުގެ އިންޒާރުދިނުން އެ އިދާރާއިން ހަރުކަށި އިބާރާތުން ކުށްވެރިކުރާ ކަމަށެވެ. އަދި ސޯޝަލް މީޑިއާގައި އިހަވަންދޫ ދާއިރާގެ މެންބަރު މުހައްމަދު ޝިފާއުއަށް މަރުގެ އިންޒާރުދިނުމާ ގުޅިގެން އެ މައްސަލަ ބަލާ، ތަހުގީގުކުރުމަށް އެދި ދިވެހި ފުލުހުންގެ ހިދުމަތަށް މައްސަލަ ހުށަހަޅާފައިވާ ކަމަށެވެ. އަދި އެ މެންބަރުގެ ސަލާމަތާއި ރައްކާތެރިކަން ކަށަވަރުކޮށްދެއްވުން އެދި ދިފާއީ ވުޒާރާގައި ދަންނަވާފައިވާނެ ކަމަށް ވެސް މަޖިލީހުން ބުނެއެވެ.
ފުލުހުން ބުނީ އިހަވަންދޫ ދާއިރާގެ މެންބަރު މުހައްމަދު ޝިފާއުއަށް މަރުގެ އިންޒާރު ދީފައިވާކަމަށް ބުނެ އެ މައްސަލަ ބަލައިދިނުމަށް އެދި ހޯމަ ދުވަހުގެ ވަގުތެއްގައި ރައްޔިތުންގެ މަޖިލީހުން، ސިޓީއަކުން މައްސަލަ ހުށަހަޅާފައިވާ ކަމަށާއި އެ މައްސަލަ ތަހުގީގުކުރަމުންދާ ކަމަށެވެ.
ރައީސް މުއިއްޒު މަގާމުން ވަކިކުރާނެކަމަށް ވިދާޅުވި ޚަބަރު ފޭސްބުކްގައި ޕޯސްޓުކުރަމުން މީހަކު ހުތުރު ބަހުރުވައިން ޝިފާއުއަށް މުޚާތަބުކޮށް ބުނެފައިވަނީ "ކަރުވެސް ކަނޑާލަން ޖެހިދާނެ" ކަމަށެވެ. ޝިފާއުއަށް މަރުގެ އިންޒާރު ދިން މީހާ ވަނީ އިންޒާރުދީ އެކި ޕޯސްޓްތައް ފޭސްބުކުގައި ލިޔެފައެވެ.
މެންބަރު ޝިފާއުއަށް މަރުގެ އިންޒާރުދިން މައްސަލަ އެމްޑީޕީން ވެސް ވަނީ ކުށްވެރިކޮށް ކަންބޮޑުވުން ފާޅުކޮށްފައެވެ.
