ބަޔާނުން ގްރޫޕް ސްޓޭޖު ނިންމާލީ ސައްތައިން ސައްތަ މޮޅާއެކު

ޔުއެފާ ޗެމްޕިއަންސް ލީގު ގްރޫޕް ސީގައި އިންޓަ މިލާނާ ދެކޮޅަށް ކުޅުނު މެޗު ކާމިޔާބުކޮށް ބަޔާން މިއުނިކުން ސައްތައިން ސައްތަ މޮޅާއެކު ގްރޫޕް ސްޓޭޖު ނިންމާލައިފިއެވެ.

އަންގާރަ ދުވަހުގެ ރޭ މި ގްރޫޕްގައި ބަޔާނާއި އިންޓަ ބައްދަލު ކުރި އިރު، ދެ ވަނަ ބުރުން މި ދެ ޓީމަށް އޮތީ ޖާގަ ޔަގީންވެފައެވެ. ގްރޫޕްގެ އެއް ވަނައިގައި ބަޔާން ދިޔައިރު، އިންޓަ ދިޔައީ ދެ ވަނައިގައެވެ. މި ގްރޫޕްގެ ތިން ވަނަ ލިބެނީ ބާސެލޯނާ އަށެވެ. ބަޔާނުން އިންޓަގެ މައްޗަށް ކުރި ހޯދީ 0-2 އިންނެވެ.

މެޗު ފަށައިގެން ބަޔާނުން ވަނީ ލަނޑު ޖެހުމަށް މަސައްކަތްކޮށްފައެވެ. ދެ ވަނަ ބުރުން ޖާގަ ޔަގީންވެފައި އޮތުމުން މި މެޗަށް ކޯޗު ހޫލިއަން ނާގަލްސްމަން ވަނީ ބަދަލުތަކެއް ގެނެސްފައެވެ. މެޗުގެ 32 ވަނަ މިނެޓުގައި ބަޔާނަށް ލީޑު ނަގައިދިނީ ހޯޝުއާ ކިމިޗް ތަނަވަސްކޮށްދިން ފުރުސަތަކުން ބެންޖަމިން ޕަވާޑްއެވެ. ބަޔާންގެ ދެ ވަނަ ލަނޑު ފެނުނީ މެޗުގެ ދެ ވަނަ ހާފުގައެވެ. އެއީ ޑޭވިސްގެ އެހީތެރިކަމާ އެކު 72 ވަނަ މިނެޓުގައި ޗޮޕޫ މޯޓިން ޖެހި ލަނޑެކެވެ. އޭނާ އަންނަނީ މި ސީޒަނުގައި މޮޅު ކުޅުމެއް ދައްކަމުންނެވެ.

ގްރޫޕް ސްޓޭޖުގައި ކުޅުނު ހުރިހާ މެޗެއް ކާމިޔާބުކޮށް ބަޔާނުން ނިންމާލީ 18 ޕޮއިންޓާ އެކުއެވެ. މެޗުން ބަލިވި އިންޓަ އޮތީ 10 ޕޮއިންޓާ އެކު ދެ ވަނައިގައެވެ. ތިން ވަނައިގައި ބާސެލޯނާ އޮތީ ހަތް ޕޮއިންޓާ އެކުއެވެ. ފުލުގައި އޮތް ޕްލެޒެން އަށް ޕޮއިންޓެއް ނުލިބެއެވެ.