ޔުއެފާ ޗެމްޕިއަންސް ލީގު ގްރޫޕް ސްޓޭޖުގައި ޓޮޓެންހަމް ކުޅުނު ފަހު މެޗުގެ އިތުރު ވަގުތުގައި ޖެހި ލަނޑުން މޮޅުވެ, އެއް ވަނަ ޓީމުގެ ގޮތުގައި ދެ ވަނަ ބުރު ޔަޤީންކޮށްފިއެވެ.

ޓޮޓެންހަމް ގްރޫޕްގެ އެއް ވަނަ ހޯދީ ފްރާންސްގެ މާސޭހެ ދަނޑުގައި 2-1 ން މާސޭ ބަލިކޮށްގެންނެވެ. 1-1 ން އެއްވަރުވެގެން ނިމެން ދިޔަ މެޗުގެ އިތުރު ވަގުތުގައި ޓޮޓެންހަމް މޮޅުކޮށްދީ އެއް ވަނަ ހޯދައިދިނީ ޕިއޭ އެމީލް ހޮއިބިއާއެވެ. މެޗު އެއްވަރުވި ނަމަ ޓޮޓެންހަމް އަށް ލިބޭނީ ގްރޫޕްގެ ދެ ވަނައެވެ. ބަލިވި ނަމަ ޔޫރޮޕާ ލީގު ކުޅެން ޖެހުނީހެވެ. މެޗުގެ ފުރަތަމަ ހާފްގެ އިތުރު ވަގުތުގައި ލަނޑު ޖަހައިގެން ފުރަތަމަ ކުރި ހޯދީ ވެސް މާސޭއިންނެވެ. މާސޭއަށް ކުރި ހޯދައިދިނީ އެމްބެމްބާއެވެ. ދެ ވަނަ ހާފްގެ ކުރީކޮޅު ޓޮޓެންހަމް އަށް ނަތީޖާ ހަމަހަމަކޮށްދިނީ ލެންގްލެޓްއެވެ. އިތުރު ވަގުތުގައި މޮޅުވި ލަނޑު ޖަހަން ފުރުޞަތު ފަހިކޮށްދިނީ ހެރީ ކޭންއެވެ.

މިމޮޅާ އެކު ޓޮޓެންހަމް އަށް ގްރޫޕްގެ އެއް ވަނަ ލިބުނީ 11 ޕޮއިންޓާ އެކުއެވެ. ދެ ވަނަ ޓީމްގެ ގޮތުގައި ދެ ވަނަ ބުރުގެ ޖާގަ ހޯދީ ފަހު މެޗުގައި 2-1 ން ސްޕޯރޓިންގ ބަލިކުރި ޖަރުމަނުގެ އައިންޓްރަކްޓް ފްރެންކްފާޓްއެވެ. އެ ޓީމް ދެ ވަނަ ހޯދީ 10 ޕޮއިންޓާ އެކުއެވެ.