ދެކުނު ކޮރެއާގެ މަގުމަތީގައި ގިނަ ބަޔަކު ފިތިގެން މަރުވި ޙާދިސާގައި ފުލުހުންގެ އިހުމާލު އޮތްކަމަށް ބުނެފި
ހާދިސާ ހިނގަން މެދުވެރިވީ ހަނި މަގަކަށް ގިނަ އަދަދެއްގެ ބަޔަކު އެއްވުމާއި ގުޅިގެން
ދެކުނު ކޮރެއާގައި ހެލޮވީން ފާހަގަކުރަމުން ދިޔަ ބަޔަކު މަރުވުން
ދެކުނު ކޮރެއާގެ ވެރިރަށް ސޯލްގައި ހެލޮވީން ފާހަގަ ކުރުމަށް ކުރިއަށް ގެންދިޔަ ހަރަކާތްތަކުގެ ތެރެއިން، ގިނަ ބަޔަކު ފިތިގެން މަރުވި ޙާދިސާގައި ފުލުހުންގެ އިހުމާލު އޮތް ކަމަށް އިއުތިރާފްވެއްޖެއެވެ.
މީޑިއާތަކުން ދެކުނު ކޮރެއާގެ ފުލުހުންގެ ޗީފް، ޔޫ ހީކެއުން އާއި ހަވާލާދީ ބުނެފައިވަނީ މިހާތަނަށް ބެލި ބެލުމުން އެފަދަ ހާދިސާ އެއް ހިނގިޔަ ނުދިނުމަށް އެކަށީގެންވާ މަސައްކަތްތްތަކެއް ފުލުހުންނަށް ކުރެވިފައި ނުވާ ކަަމަށެވެ. އަދި އެ ހާދިސާގެ މައުލޫމާތު ލިބުމުން އެމަރޖެންސީ ރެސްޕޯންސް ދިނުމުގައި ވެސް އަމަލުކޮށްފައި ވަނީ އެންމެ ރަނގަޅަށް ނޫން ކަމަށް ފުލުހުންގެ ޗީފް ވަނީ މީޑިއާތަކަށް މައުލޫމާތުދެއްވަމުން ވިދާޅުވެފައެވެ.
މި މައްސަލައިގައި ފުރިހަމަ ތަހުގީގެއް ކުރައްވާނެ ކަމަށް ވެސް އޭނާ ވަނީ ވިދާޅުވެފައެވެ. މި ހާދިސާ އާ ގުޅިގެން އެ ގައުމުގެ އިންޓީރިއާ މިނިސްޓަރު ލީ ސެންގް-މިން ވަނީ އާއްމުންގެ ކިބައިން މަޢާފަށް އެދިވަޑައިގެންފައެވެ. މިހާދިސާގައި 152 މީހުންނަށް އަނިޔާވެ، 156 މީހުން ވަނީ މަރުވެފައެވެ.
ހޮނިހިރު ދުވަހުގެ ހިނގި މި ހާދިސާ ހިނގި ސަރަހައްދަކީ އާއްމުންގެ މެދުގައި މަގްބޫލު ސަރަހައްދެކެވެ. ފިތި ބާރުވެގެން މި ފަދަ ހާދިސާއެއް ހިނގާފައި ވާއިރު މި ހާދިސާ ހިނގުމުގެ ކުރިން ފުލުހުންނަށް ގިނަ އަދަދެއްގެ ފޯނު ކޯލްތަކެއް ލިބުނު ކަމަށާއި، އެ ހާލަތުގެ ނާޒުކުކަން ފުލުހުންގެ ސަމާލުކަމަށް ގެނެސްފައިވާ ކަމަށް ފުލުހުން ބުނެއެވެ. އެހެންނަަމަވެސް އެ ކޯލްތަކަށް އެކަށީގެންވާ އިޖާބައެއް ދީފައި ނުވާ ކަމަށް ވެސް ފުލުހުން ވަނީ އެއްބަސްވެފައެވެ.
މި ޙާދިސާ ހިނގަން މެދުވެރިވީ ސޯލްގެ އިޓާވަން ސަރަަޙައްދުގެ ހަނި މަގަކަށް ގިނަ އަދަދެއްގެ ބަޔަކު އެއްވުމާއި ގުޅިގެން ކަމަށް ރިޕޯޓުތައް ބުނެއެވެ.
