މި ސީޒަންގެ ޕްރިމިއާ ލީގު ޗެލްސީ އަށް ކާމިޔާބު ކުރެވޭނެ: ކުލިބާލީ

ޗެލްސީ އަށް މި ސީޒަންގެ ޕްރިމިއާ ލީގު ކާމިޔާބު ކުރެވޭނެ ކަމަށް އެ ޓީމަށް ކުޅެމުން އަންނަ ސެނެގާލްގެ ޑިފެންޑަރު ކަލީދޫ ކުލިބާލީ ބުނެފިއެވެ.

އިޓާލިއަން ލީގުގެ ނަޕޯލީ ދޫކޮށް ކުލިބާލީ ޗެލްސީ އަށް ބަދަލުވީ މި ސީޒަންގައެވެ. އޭނާ ޗެލްސީ އަށް ގެނައުމަށް އެންމެ ބޮޑަށް ބާރު އެޅީ އެ ޓީމުގެ ކުރީގެ ކޯޗު ތޯމަސް ޓުޗެލްއެވެ. ޗެލްސީ އަށް ބަދަލުވެ ކުލިބާލީ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. މިހާތަނަށް ކުލިބާލީ ވަނީ ޗެލްސީ އަށް 11 މެޗު ކުޅެދީފައެވެ. އޭނާ ވަނީ އެ ޓީމަށް އެއް ލަނޑު ކާމިޔާބުކޮށްފައެވެ.

ޕްރިމިއާ ލީގު ތާވަލްގެ ހަ ވަނަ މަގާމުގައި އޮތް ޗެލްސީއާ ގުޅޭ ގޮތުން ވާހަކަ ދައްކަމުން އޭނާ ބުނީ މި ސީޒަންގެ ޕްރިމިއާ ލީގު އެ ޓީމަށް ކާމިޔާބު ކުރެވޭނެ ކަމަށާއި، އެ ފެންވަރު ޗެލްސީގައި އޮތް ކަމަށެވެ. ކުލިބާލީ ބުނީ ޗެލްސީ އާ އެކު ޕްރިމިއާ ލީގު ކާމިޔާބުކޮށް ތާރީޚީ ކާމިޔާބެއް ހޯދަން އޭނާ ބޭނުންވާ ކަމަށެވެ.

އިތުރަށް ވާހަކަ ދައްކަމުން ކުލިބާލީ ބުނީ އޭނާ ޗެލްސީ އަށް އަންނަން ޖެހުނީ ކޮންމެ އަގެއް ދީފައި ނަމަވެސް އޭނާ ގެންނަން ބޭނުންވި ކޯޗެއް ހުއްޓާ ކަމަށެވެ. ނަމަވެސް ކަންތައް ދިމާވި ގޮތުން ކޯޗު ޓީމު ދޫކޮށްލަން ޖެހުނުކަން ފާހަގަކޮށް ކުލިބާލީ ބުނީ ޓުޗެލް އާއި ގްރަހަމް ޕޮޓާގެ ވައްޓަފާޅި ތަފާތު ކަމަށެވެ. ނަމަވެސް އިތުރު ކަންކަން ދަސްވާނެ ކަމަށް ކުލިބާލީ ބުންޏެވެ.

އުމުރުން 31 އަހަރުގެ ކުލިބާލީ އަކީ ސެގެނާލް ޤައުމީ ޓީމުގެ ވެސް އެންމެ މުހިންމު އެއް ކުޅުންތެރިޔާއެވެ. ޤައުމީ ޓީމަށް އޭނާ ވަނީ މިހާތަނަށް 64 މެޗު ކުޅެދީފައެވެ.