ކުރީގެ ރިޔާސީ ގަނޑުވަރު، ތީމުގޭގެ 2007 އަދި 2008 ވަނަ އަހަރުގެ އޮޑިޓް ރިޕޯޓްގެ މައްސަލައިގައި ބަޔާން ދެއްވުމަށް އޭސީސީ އަށް ވަޑައިގަންވާނެ ކަމަށާއި އަދި އެތަނުގައި މީޑިއާ ވެސް ތިބެން ޖެހޭނެ ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެއެވެ.
ރައީސް މައުމޫން ކުރެއްވި ޓްވީޓެއްގައި މިހެން ވިދާޅުވެފައި މި ވަނީ އެ މަނިކުފާނުގެ ބަޔާނެއް ނެގުމަށް އެމަނިކުފާނުގެ އަރިހަށް ޒިޔާރަތްކުރާނެ ކަމަށް އޭސީސީން ބުނެފައި ވަނިކޮށެވެ. އެމަނިކުފާނު ވިދާޅުވީ ތީމުގޭގެ އޮޑިޓް ރިޕޯޓްގެ މައްސަލާގައި އެމަނިކުފާންގެ ބަޔާނެއް ނެގުމަށް އޭސީސީގެ މެމްބަރުން އެމަނިކުފާންގެ އަރިހަށް ވަޑައިގަންނަވަން ނުޖެހޭ ކަމަށެވެ.
ރައީސް މައުމޫން ވިދާޅުވީ އޭސީސީއަށް ބަޔާން ދެއްވަން ވަޑަގަންނަވާއިރު މީޑިއާ ވެސް އެތަނުގައި ތިބެން ޖެހޭނެ ކަމަށާއި އޭރުން ގައުމުގެ ހުރިހާ ރައްޔިތުންނަށް ވެސް ކަންހިނގަމުންދާ ގޮތް ފެނިގެންދާނެ ކަމަށެވެ. އަދި ކަން ހިނގާ ގޮތް އެނގުމަކީ ރައްޔިތުންނަށް ލިބިގެންވާ ހައްގެއް ކަމަށް ރައީސް މައުމޫން ވިދާޅުވިއެވެ.
I will go to ACC. They don't have to come. Media too must be there so the whole country will see & hear. The people have a right to know.
— Maumoon Abdul Gayoom (@maumoonagayoom) June 23, 2017
އަދި އެހެން ޓްވީޓެއްގައި ވިދާޅުވެފައި ވަނީ އޭސީސީން ބަލަންޖެހޭ ފަދަ އެއްވެސް އަމަލެއް އެމަނިކުފާނުކުރައްވާފައި ނުވާ ކަމަށާއި ފޮރުވަންޖެހޭ އެއްވެސް ކަމެއް ނެތް ކަމަށެވެ.
By the Grace of Almighty Allah I have done nothing that would come under the purview of ACC. I have nothing to hide al-hamdu lillah.
— Maumoon Abdul Gayoom (@maumoonagayoom) June 23, 2017
ތީމުގޭ އޮޑިޓް ރިޕޯޓްގެ މައްސަލައިގައި 10 އަހަރު ފަހުން ރައީސް މައުމޫނާ ސުވާލުރައްވާއިރު، މި މައްސަލައިގައި ރައީސް މައުމޫންގެ ދަރިކަލުން، ދިއްގަރު ދާއިރާގެ މެމްބަރު އަހްމަދު ފާރިސް އޭސީސީ އަށާއި ޕޮލިހަށް ހާޒިރުކޮށް ބަޔާން ނަގާފައިވެ އެވެ.
ތީމުގޭ އޮޑިޓް ރިޕޯޓްގެ މައްސަލައިގައި ފާރިސްގެ މައްޗަށް ދައުވާކުރަން ފޮނުވީ ސާފް ޗެމްޕިއަންޝިޕު ބެއްލެވުމަށް 2008 ވަނަ އަހަރު ސްރީ ލަންކާއަށް ކުރެއްވި ދަތުރުފުޅުގައި ހިންގި ކަމަށް ބުނާ ހަރަދުތައް ހޯދުމަށެވެ. ނަމަވެސް، ޕީޖީ އޮފީހުން ނިންމާފައި ވަނީ ދައުވާކުރުމަށް ގާނޫނުލް އުގޫބާތުގައި ކަނޑައަޅާފައިވާ މުއްދަތު ހަމަވެފައި އޮތުމުން އެ މައްސަލައިގައި ފާރިސްގެ މައްޗަށް ދައުވާ ކުރެވެން ނެތް ކަމަށެވެ. ގާނޫނުލް އުގޫބާތުގެ 61 ވަނަ މާއްދާގައި ބުނެފައިވާ ގޮތުގައި ޖިނާޔަތުގެ ތެރޭގައި ހިމެނޭ ކުށްތަކަށް ދައުވާ ކުރަން ޖެހޭނީ ކުށްކުރާ ވަގުތުން ފެށިގެން އަށް އަހަރުގެ ތެރޭގައެވެ. ޖުނަހުގެ ކުށްތަކުގައި ދައުވާ ކުރަން ޖެހޭނީ ތިން އަހަރުގެ ތެރޭގައެވެ.
ތީމުގޭ އޮޑިޓް ރިޕޯޓްގެ މައްސަލައިގައި ރައީސް މައުމޫނުގެ ބަޔާން ނަގަން އޭސީސީން ނިންމިއިރު، އެ މަނިކުފާނު ވަނީ އެއްބަފާ ކޮއްކޯފުޅު، ރައީސް އަބްދުﷲ ޔާމީނަށް ކުރައްވާ ތާއިދު އަނބުރާ ގެންދަވާފަ އެވެ. މި ސަރުކާރުގެ ތެރޭގައި ހިޔާނާތުގެ މައްސަލަ އާއި ޑިމޮކްރަސީގެ އުސޫލްތަކާ ހިލާފު ކަންކަން ހިންގަމުންދާ ކަމަށާއި، ސަރުކާރު ހިންގަނީ ޕީޕީއެމްގެ އަސާސްތަކާ ހިލާފަށް ކަމަށް ރައީސް މައުމޫނު ވަނީ ވިދާޅުވެފަ އެވެ. މިހާރު އެ މަނިކުފާނު މަސައްކަތް ކުރައްވަނީ ގައުމު އިސްލާހުކުރުމަށްޓަކައި އިދިކޮޅު ފަރާތްތަކާ ގުޅިގެންނެވެ. ތިން މަހެއްހާ ދުވަހު ރައީސް މައުމޫން ރާއްޖޭން ބޭރުގައި އުޅުއްވުމަށް ފަހު އެނބުރި ވަޑައިގަތީ މި މަހުގެ 14 ގަ އެވެ.
އޭސީސީގެ ރައީސް ހަސަން ލުތުފީ ވިދާޅުވީ ރައީސް މައުމޫނުގެ ބަޔާނެއް ނަގަނީ އެ މަނިކުފާނު ކޮމިޝަނަށް ހާޒިރުކުރައްވައިގެން ނޫން ކަމަށާއި އެ މަނިކުފާނު ބޭނުންފުޅުވާ ތަނަކަށް ތަހްގީގު ޓީމް ގޮސްގެން ކަމަށެވެ.
"އެ މަނިކުފާނުގެ ބަޔާނެއް ނަގަނީ ތީމުގޭ އޮޑިޓް ރިޕޯޓްގައި ފާހަގަކޮށްފައިވާ ކަމަކާ ގުޅޭ ގޮތުން ދައުލަތުގެ އެއްވެސް ފަރާތަކުން މައުލޫމާތު ނުލިބިގެން، ސީދާ ރައީސް މައުމޫނުގެ ފަރާތްޕުޅުން މައުލޫމާތު ހޯދުމަށް،" ލުތުފީ ވިދާޅުވި އެވެ.
މިހާތަނަށް ދިވެހި ތާރީހުގައި ވެފައިވާ އެންމެ ބޮޑު ހިޔާނާތް ކަމުގައިވާ އެމްއެމްޕީއާރުސީގެ މައްސަލައިގައި ރައީސް އަބްދުﷲ ޔާމީންގެ މައްޗަށް ބޮޑެތި ތުހްމަތުތަކެއް ވަނީ ކޮށްފަ އެވެ. އެމްއެމްޕީއާރުސީގެ މައްސަލައިގެ ތަހްގީގު ރިޕޯޓް އޭސީސީން ވަނީ ޕީޖީ އޮފީހަށް ފޮނުވައިފަ އެވެ.
މީގެ ކުރިން ދައުލަތަށް ގެއްލިގެން ގޮސްފައިވާ ފައިސާ ހޯދުމުގެ މަސައްކަތް ކުރަމުން ގެންދާ ކަމަށާއި، އެގޮތުން ރައީސް މައުމޫނުގެ ވެރިކަމުގައި ރައީސް އޮފީހުން އެކި ފަރާތްތަކަށް ދޫކޮށްފައިވާ ލޯނުތައް ނުދައްކާހުރި ފަރާތްތަކުން އެ ފައިސާ ހޯދަން މަސައްކަތް ކުރާ ކަމަށް އަންގާރަ ދުވަހު ބަންޑާރަ ނައިބު މުހައްމަދު އަނިލް ދާދި ފަހުން ވަނީ ވިދާޅުވެފަ އެވެ.
ރައީސް އޮފީހުން ދޫކޮށްފައިވާ ލޯން 30 ފަރާތަކުން ދައްކާފައި ނުވާ ކަމަށް އަނިލް ވިދާޅުވި އެވެ.
