ދުންފަތުގެ ބާވަތްތައް އިޝްތިހާރު ކުރާތީ އެޗްޕީއޭގެ ކަންބޮޑުވުން
31 އޮކްޓޯބަރު 2022 | ހޯމަ 13:16ދުންފަތް އިޝްތިހާރު ކުރުމަކީ ޤާނޫނީ ކުށެއް
ވޭޕް
ދުންފަތުގެ ބާވަތްތަކާއި ދުންފަތުގެ ވިޔަފާރި އާއި ދުންފަތުގެ އިސްތިއުމާލު ކުރުން އިޝްތިހާރުކޮށް ޕްރޮމޯޓު ކުރާތީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަންބޮޑުވުން ފާޅު ކޮށްފިއެވެ.
އެޗްޕީއޭއިން ހޯމަ ދުވަހު ނެރުނު ބަޔާނެއްގައި ބުނީ މިފަދަ ކަންކަމަކީ ދުންފަތް ކޮންޓްރޯލް ކުރުމާ ބެހޭ ޤާނޫނުގެ ދަށުން މަނާ ކޮށްފައިވާ ކަންކަންކަމަށެވެ. ނަމަވެސް ތަފާތު ގޮތްތަކަށް، ހާއްސަކޮށް ސޯޝަލް މީޑިއާގެ ވަސީލަތްތައް މެދުވެރިކޮށް ފުޅާ ދާއިރާއެއްގައި މަސްތުވާތަކެތީގެ ބާވަތްތައް އިޝްތިހާރު ކުރާކަން ފާހަގަކުރެވިފައިވާ ކަމަށް އެ އިދާރާއިން ވަނީ ބުނެފައެވެ.
އެ އިދާރާއިން ބުނިގޮތުގައި މިގޮތަށް އިޝްތިހާރު ކުރާއިރު ބައެއް ބާވަތްތަކުގައި ދުންފަތް ނުހިމެނޭ ކަމަށާއި އެއް ބާވަތް އަނެއްބާވަތަށްވުރެ ރައްކާތެރިކަމަށް ބުނެ އިޝްތިހާރު ކުރެއެވެ. އަދި ވަކި ބާވަތެއް ބޭނުން ކުރުމުން ސިޙީ ގޮތުން ލިބޭ ގެއްލުން ކުޑަ ކަމަށާއި ގެއްލުމެއް ނުވާ ކަމަށް ވެސް ބުނެ ހަގީގަތާ ޚިލާފު ވާހަކަތައް ފަތުރާ ކަމަށް ވަނީ ބުނެފައެވެ.
މިއީ ދުންފަތުގެ އިސްތިއުމާލު ކުރާ ފަރާތްތަކާއި ވިޔަފާރި ކުރާ ފަރާތްތަކާއި ގާނޫނު ތަންފީޒު ކުރުމުގެ ޒިންމާ ހަވާލުކުރެވިފައިވާ ފަރާތްތަކާއި ޖުމްލަކޮށް ހުރިހާ ރައްޔިތުންވެސް ވިސްނަން ޖެހޭ ކަންތައްތައްކަން ފާހަގަކޮށް އެޗްޕީއޭއިން ވަނީ އެކަންތައްތައް ހަނދާން ކޮށްދީފައެވެ.
މީގެ ތެރޭގައި ހިމެނޭ ކަންތައްތައް
އެޗްޕީއޭއިން އިއުލާން ނެރެފައިވާއިރު ސޯޝަލް މީޑިއާގައި ފަހަކަށް އައިސް އާއްމުކޮށް، ވޭޕުގެ ބާވަތްތައް އިޝްތިހާރުކޮށް ވިއްކަމުންދެއެވެ. އަދި އެއީ ސިނގިރޭޓަށްވުރެ ސިއްހީ ގޮތުން ރައްކާތެރިއެއް ކަމަށްބުނެ ވެސް ބައެއް ފަރާތްތަކުން އިޝްތިހާރު ކުރެއެވެ.
