އެހީދޭ ގޮތް މުރާޖާކޮށް އެހީ ދިނުމަށް އިޖުތިމާއީ ދާއިރާގެ ދަފުތަރެއް އެކުލަވާލަނީ
31 އޮކްޓޯބަރު 2022 | ހޯމަ 08:23މި އެހީތަކަށް 434.9 މިލިއަން ރުފިޔާ އަންނަ އަހަރުގެ ބަޖެޓްގައި ހިމަނާފައިވޭ
ފިނޭންސް މިނިސްޓަރު އިބްރާހިމް އަމީރު އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަނީ
އިޖުތިމާއީ ރައްކާތެރިކަން ފޯރުކޮށްދިނުމުގެ ގޮތުން އެކި ފަރާތްތަކަށް ދެމުންދާ އެހީތައް އޭގެ އެންމެ ހައްގުވެރި ފަރާތްތަކަށް އެކަށޭނެ މިންވަރެއްގައި ދިމުނަށްޓަކައި، އިޖްތިމާއީ ދާއިރާގެ ދަފްތަރެއް އެކުލަވާލައި ގިންތިތަކަށް ބަހާލައިގެން ދިނުމަށް ބަދަލު ގެނައުމުގެ މަސައްކަތްތައް ދަނީ ހިނގަމުންކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަމުން ފިނޭންސް މިނިސްޓަރު ވިދާޅުވީ މިގޮތުން ނިކަމެތިންނާއި، އެކަނިވެރި މައިންނާއި، ހާއްސަ އެހީއަށް ބޭނުންވާ ފަރާތްތަކާއި އެހެނިހެން އެހީތެރިކަން ބޭނުންވާ ފަރާތްތަކަށް ދޭ އެހީ ދެމުންދާގޮތް މުރާޖައާކޮށް، މި އެހީތަކަށް 434.9 މިލިއަން ރުފިޔާ އަންނަ އަހަރުގެ ބަޖެޓްގައި ހިމަނާފައިވާކަމަށެވެ.
އިޖުތިމާއީ ރައްކާތެރިކަމަށް އަންނަ އަހަރުގެ ބަޖެޓްގައި ހިމަނާފައިވަނީ 3,916 މިލިއަން ރުފިޔާއެވެ. އެއީ ރިކަރަންޓް ޚަރަދުގެ ގޮތުގައި 3،877 މިލިއަން ރުފިޔާ އާއި ކެޕިޓަލް ޚަރަދުގެ ގޮތުގައި 39 މިލިއަން ރުފިޔާއެވެ. 1,045 މިލިއަން ރުފިޔާ ކަނޑައަޅާފައިވަނީ އާސަންދަ ސިއްހީ އިންޝިއުރަންސްގެ އަގަށް ދައްކާ ފައިސާގެ ގޮތުގައެވެ. 1,351 މިލިއަން ރުފިޔާ ކަރަންޓުގެ އަގު ހެޔޮކުރުމަށް ކަނޑައަޅާފައިވާއިރު 200 މިލިއަން ރުފިޔާ ވަނީ ބޭސްފަރުވާކުރުމަށް ދޭ އެހީގެ ގޮތުގައި ކަނޑައަޅާފައެވެ. އަދި 341 މިލިއަން ރުފިޔާ ޚާއްސަ އެހީއަށް ބޭނުންވާ ފަރާތްތަކަށްދޭ އެހީގެ ގޮތުގައި ވަނީ ކަނޑައަޅާފައެވެ.
ބަޖެޓް ހުށަހަޅުއްވަމުން މިނިސްޓަރު ވިދާޅުވީ މިދާއިރާއިން އެއް ކަމަކަށް އެންމެ ބޮޑު ހޭދައެއް ސަރުކާރުން ކުރަމުން އަންނަނީ އާސަންދަ ނިޒާމުގެ ތެރެއިން ރައްޔިތުންގެ ސިއްހީ ހިދުމަތް ކަށަވަރުކުރުމަށްކަމަށެވެ.
އަންނަ އަހަރަށް ލަފާކުރާ ބަޖެޓުގައި މިބަޔަށް ކުރެވޭ ހޭދަ 2022 ވަނަ އަހަރާއި އަޅައިބަލާއިރު 6 އިންސައްތަ އިތުރެވެ.
