ޑްރަގް ކޯޓުގެ ޤާޟީ މުޙައްމަދު ސަމީރާމެދު ސުލޫކީ ފިޔަވަޅު އެޅުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމައިފިއެވެ.

ޖޭއެސްސީން އެކަން ހާމަކޮށްފައިވަނީ ހޯމަ ދުވަހު އާންމުކުރި ބަޔާނެއްގައެވެ. އެގޮތުން ކްރިމިނަލް ކޯޓުގައި އޮތް ޝަރީޢަތުގެ އަޑުއެހުމެއްގައި، އެ ޤަޟިއްޔާގައި ދައުވާލިބޭ ފަރާތުގެ ޤާނޫނީ ވަކީލުންގެ ފަރާތުން ޖޭއެސްސީއަށް ޤާޟީ މުޙައްމަދު ސަމީރުއާ ގުޅޭގޮތުން ހުށަހަޅާފައިވާ ޝަކުވާއަކާއި ގުޅޭގޮތުން ވާހަކަ ދައްކާފައިވާކަން ޖޭއެސްސީން ވަނީ ފާހަގަ ކޮށްފައެވެ.

އަދި ދިފާޢީ ވަކީލުން ކުށްވެރި ކުރައްވައި، އެ ވަކީލުންނާމެދު ޒާތީ ތަޢައްޞުބެއް އޮތްކަން ހާމަވާފަދަ ގޮތަކަށް ޤާޟީ މުޙައްމަދު ސަމީރު ޢަމަލުކުރައްވައި ވާހަކަދައްކަވާފައިވާކަން ސާބިތުވާކަމަށް ޖޭއެސްސީން ބުނެއެވެ.

ޖޭއެސްސީން ބުނީ، ޤާޟީ މުޙައްމަދު ސަމީރުގެ މި ޢަމަލަކީ، ޤާނޫނު ނަންބަރު 2010/13 (ދިވެހިރާއްޖޭގެ ފަނޑިޔާރުންގެ ޤާނޫނޫ)ގެ 7 ވަނަ މާއްދާއާއި، އެ ޤާނޫނުގެ 32 ވަނަ މާއްދާގެ (3) ވަނަ ނަންބަރާއި، 33 ވަނަ މާއްދާގެ (ށ)އާއި، ފަނޑިޔާރުންގެ ސުލޫކީ މިންގަނޑުގެ 2.1 ވަނަ ނަންބަރާއި، 2.2 ވަނަ ނަންބަރާއި، 3.1 ވަނަ ނަންބަރާއި، އަދި  4.10 ވަނަ ނަންބަރާއި ޚިލާފަށް ކޮށްފައިވާ ޢަމަލުތަކެއް ކަމަށެވެ.

ވުމާއެކު، ޤާނޫނު ނަންބަރު 2008/10 (ޖުޑީޝަލް ސަރވިސް ކޮމިޝަންގެ ޤާނޫނު)ގެ 1-32 ވަނަ މާއްދާގެ (ހ)ގެ (1) ވަނަ ނަންބަރުގެ ދަށުން، ނަޞޭޙަތް ދިނުމާއެކު ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަކުރުމަށް އެންގުމުގެ ފިޔަވަޅު އެޅުމަށް ފެންނަ ކަމަށް ޖޭއެސްސީން ވަނީ ނިންމާފައެވެ. އެގޮތުން ކޮމިޝަނުން އެގޮތަށް ނިންމާފައިވަނީ 2022 އޮކްޓޫބަރު 19 ވަނަ ދުވަހު ބޭއްވި ކޮމިޝަނުގެ މިއަހަރުގެ 73 ވަނަ ޖަލްސާގައެވެ.

ފަނޑިޔާރު ސަމީރު ކުރިން މަސައްކަތް ކުރައްވަމުން ގެންދެވީ ކްރިމިނަލް ކޯޓުގައެވެ. ނަމަވެސް އޭނާ ޑްރަގް ކޯޓަށް ބަދަލު ކުރައްވަން ނިންމެވީ "ފަނޑިޔާރުން އަމިއްލައަށް އެދިގެން މަސައްކަތް ކުރަމުން އައި ކޯޓާ އެއް ދަރަޖައެއްގެ އެހެން ކޯޓަކަށް ބަދަލު ކުރުމުގައި އަމަލު ކުރާނެ ގޮތުގެ ޤަވާއިދު" ގެ ދަށުންނެވެ. ފަނޑިޔާރު ސަމީރުގެ އެދިވަޑައިގަތުމުގެ މަތިން ޖޭއެސްސީން އެގޮތަށް ނިންމަވާފައިވަނީ 2021 ޖޫން 6 ވަނަ ދުވަހު ބޭއްވި ކޮމިޝަނުގެ 45 ވަނަ ބައްދަލުވުމުގައެވެ.