ފިރިކަލުންގެ ހާލު ރަނގަޅު: ނޭންސީ ޕެލޯސީ

އެމެރިކާގެ ހައުސް އޮފް ރެޕްރެޒެންޓެޓިވްސްގެ ރައީސް ނޭންސީ ޕެލޯސީގެ ފިރިކަލުންގެ ހާލު ރަނގަޅު ކަމަށް އޭނާ ވިދާޅުވެއްޖެއެވެ.

ނޭންސީ ޕެލޯސީ މިފަދައިން ވިދާޅުވީ ހޮނިހިރު ދުވަހު ތަރުޖަމާނު ލައްވާ ނެރުއްވި ބަޔާނެއްގައެވެ. އެ ބަޔާނުގައި ބުނެފައިވަނީ ފިރިކަލުން ޕޯލް ޕެލޯސީގެ ބޮލަށް ދިން ހަމަލާތަކުގެ ސަބަބުން އޭނާގެ ސަރޖަރީތަކެއް ހަދަން ޖެހުނު ނަމަވެސް ހުރިހާ ކަމެއް ވެސް ދިޔައީ ރަނގަޅަށް ކަމަށެވެ. އަދި އޭނާއަށް ބޮޑު ގެއްލުމެއްނުވެ ރަނގަޅުވާނެ ކަމަށް ޑޮކްޓަރުން ބުނެފައިވާ ކަމަށް ވެސް އެ ބަޔާނުގައި ވަނީ ބުނެފައެވެ.

ހުކުރު ދުވަހު ނޭންސީ ޕެލޯސީގެ ފްރެންސިސްކޯގެ ގެއަށް ވަދެ މީހަކު ވަނީ އޭނާ ހޯދަން ކަމަށް ބުނެ މަރުތޭލަކުން ޕޯލް އަށް ހަމަލާދީފައެވެ. މި ހަމަލާގައި ޕޯލްގެ ބޯ ވަނީ ފަޅައިގެން ގޮސްފައެވެ.

ބޮލުގެ އިތުރުން އޭނާގެ އަތަށް ވެސް އެކި ވަރުގެ އަނިޔާ ލިބިފައިވާ ކަމަށް ނޭންސީ ނެރުއްވި ބަޔާނުގައި ވަނީ ބުނެފައެވެ.

މި ހަމަލައާ ގުޅިގެން އެމެރިކާގެ ފުލުހުން ވަނީ 42 އަހަރުގެ ފިރިހެނަކު ހައްޔަރުކޮށްފައެވެ. އޭނާގެ މައްޗަށް މީހަކު ގަސްތުގައި މަރާލަން މަސައްކަތް ކުރުމުގެ ދައުވާ ވަނީ މިހާރު އުފުލާފައެވެ.

މީގެ އިތުރުން ޕޯލް އަކީ 82 އަހަރުގެ މީހަކަށްވާއިރު އުމުރުން ދުވަސްވީ މީހުންނަށް އަނިޔާ ކުރުމާއި ބަރު ހަތިޔާރަކުން މީހަކަށް ހަމަލާ ދިނުމާއި ވައްކަން ކުރުމާއި އަދިވެސް އިތުރު ދައުވާތަކެއް އޭނާގެ މައްޗަށް މިހާރު ވަނީ އުފުލާފައެވެ.