ޗައިނާގެ އެންމެ ބޮޑު ސިޓީ ޝެންގހައިގައި ކޮވިޑް ކޭސްތައް ރިޕޯޓްކުރަމުން ދާތީ, މީހުން ޓެސްޓްކުރުމުގެ މަސައްކަތް ހުކުރު ދުވަހުން ފެށިގެން ދަނީ ކުރަމުންނެވެ. އެންމެ ބޮޑަށް ބަލި އުޅޭކަން ފާހަގަކުރެވިފައިވާ ޔަންގޕޫ ޑިސްޓްރިކްޓްގެ 1.3 މިލިއަން މީހުން ވަނީ ލޮކްޑައުން ކޮށްފައެވެ. ކަމާބެހޭ އިދާރާތަކުން ވަނީ ޓެސްޓްގެ ނަތީޖާ ލިބެންދެންނަމަވެސް ގޭގައި މަޑުކުރުމަށް އެންމެންނަށް އަންގާފައެވެ.

ވޫހާންގެ 9 ލައްކަ މީހުންގެ އާބާދީ ބުދަ ދުވަހުން ފެށިގެން 5 ދުވަހަށް ވަނީ ލޮކްޑައުން ކޮށްފައެވެ.

ނިމުނު ހޫނު މޫސުމުގައިވެސް މުޅި ޝެންގހައިގެ 25 މިލިއަން މީހުންގެ އާބާދީ ވަނީ 2 މަސްދުވަހަށް ލޮކްޑައުން ކޮށްފައެވެ. މިކަމާގުޅިގެން ގިނަބަޔަކު ކާއެއްޗިއްސަށް ޖެހި، އިގްތިސާދަށް ބޮޑެތި ގެއްލުން ލިބި، އަދި ސަރުކާރާ އާންމުންނާ ދެމެދު ކުރިން ނުފެންނަ ކުރިމަތިލުންތައް ފެށިފައިވެއެވެ.

ޗައިނާގެ ކޮމިޔުނިސްޓް ޕާޓީގެ ކޮންގްރެސް ނިމިފައިވީނަމަވެސް ޒީރޯ ކޮވިޑް ޕޮލިސީ ދޫކޮށްލަން އުޅޭތަނެއް ނުފެނެއެވެ.

ޗައިނާގެ ބޯޑަރުތައް އަދިވެސް މުޅިން ހުޅުވާލާފައެއް ނުވެއެވެ. އަދި އެހެން ގައުމުތަކުން ދާމީހުން އަދިވެސް ސަރުކާރުން އަންގާ ތަނެއްގައި 10 ދުވަހު ކަރަންޓީންވާން ޖެހެއެވެ. މިއީ ޚަރަދުބޮޑު ކަމެއް ކަމަށް ވުމުން މިކަން ދޫކޮށްލުމަށް ޑަބްލިއު.އެޗް.އޯ.އިން ވެސް ވަނީ ގޮވާލާފައެވެ. ނަމަވެސް ޗައިނާ ސަރުކާރުން ބުނަނީ މިކަމުގެ ބޭނުމަކީ ހޮސްޕިޓަލްގައި އެޑްމިޑްވާންޖެހޭ މީހުން މަދުކުރުމާއި އަދި މަރުވާ މީހުން މަދުކުރުން ކަމުގައެވެ.

ޗައިނާއިން ހުކުރު ދުވަހުވެސް 1،337 އައު ކޮވިޑް ކޭސް ރިޕޯޓްކޮށްފައި ވާކަމަށް ވެއެވެ. ނަމަވެސް އިތުރު މަރެއް ރިޕޯޓް ކޮށްފައެއް ނުވެއެވެ.

ޗައިނާއިން ބުނާގޮތުގައި 2019 ވަނަ އަހަރުގެ ފަހުކޮޅުން ފެށިގެން އެގައުމުގައި ރިޕޯޓް ކޮށްފައިވަނީ ކޮވިޑް-19ގެ މުޅިއެކު 258،660 ކޭހެވެ. އަދި މަރުވެފައިވަނީ 5،226 މީހުންނެވެ.

ކުރިޔަށް އޮތް ތަނުގައިވެސް ކޮވިޑް ކޮންޓްރޯލްކުރުމަށް ހަރުކަށި ފިޔަވަޅު އެޅުން ސަރުކާރުން ދޫކޮށްނުލާނެކަން ވަނީ ހާމަވެފައެވެ. މިގޮތުން ހުއަންގޕޫ ކޯރުގައި އެކަހެރިކޮން އޮންނަ ޖަޒީރާއެއްގައި ބޮޑު ދާއިމީ ކަރަންޓީން ފެސިލިޓީއެއް އަޅާކަން ސަރުކާރުން ވަނީ ހާމަކޮށްފައެވެ. 221 މިލިއަން ޑޮލަރު ޚަރަދު ކޮށްގެން އަޅާ މި ފެސިލިޓީގައި 3،009 އައިސޮލޭޝަން ކޮޓަރި އަދި 3250 އެނދު ހުންނާނެކަމަށް ވެއެވެ. މިތަނުގެ މަސައްކަތް ކުރިޔަށް އޮތް 6 މަސްދުވަހުގެ ތެރޭގައި ނިންމާނެކަމަށް ވެއެވެ.

އޮކްޓޯބަރ މެދެއްހާ ހިސާބަށް އައިއިރު ޗައިނާގެ 90 އިންސައްތަ މީހުން ވަނީ ވެކްސިން ޖަހާފައެވެ. އަދި 57 އިންސައްތަ ވަނީ ބޫސްޓަރ ޑޯޒް ޖަހާފައެވެ. ނަމަވެސް އާންމު ތަނަކަށް ވަނުމަށް، ވެކްސިން ޖެހިކަމުގެ ހެކި ބޭނުމެއް ނުވެއެވެ. ބޭނުން ވަނީ ހަމަ އެކަނި ނެގަޓިވް ކޮވިޑް ޓެސްޓެކެވެ.

ޗައިނާގެ އާބާދީއަކީ 1.412 ބިލިއަނެވެ.