ޕެލޯސީގެ ފިރިކަލުންނަށް ހަމަލާދިން މީހާއަށް ގަސްތުގައި މީހަކު މަރާލަން އުޅުނުކަމުގެ ދައުވާ

އެމެރިކާގެ ހައުސް އޮފް ރިޕްރެޒެންޓޭޓިވްސްގެ ރައީސްކަމުގެ މަގާމުގައި ހުންނެވި ނޭންސީ ޕެލޯސީގެ ފިރިކަލުން ޕޯލް ޕެލޯސީއަށް ހަމަލާދިން މީހާއަށް ގަސްތުގައި މީހަކު މަރާލަން އުޅުނުކަމުގެ ދައުވާއާއި އިތުރު ދައުވާތަކެއް ކޮށްފިއެވެ.

ޕެލޯސީގެ ދެކަނބަލުން ސެން ފްރެންސިސްކޯގައި ދިރިއުޅުއްވާ ގެކޮޅަށް ވަދެ މީހަކު ވަނީ "ނޭންސީ ކޯބާ؟" މިހެން ހަޅޭލަވައިގަތުމަށްފަހު އޭނާގެ ފިރިކަލުންނަށް މަރުތޭލަކުން ހަމަލާދީފައެވެ.

ހުކުރު ދުވަހު ޕެލޯސީގެ ދެކަނބަލުންގެ ގެކޮޅަށް ވަދެގަނެ ދިން ހަމަލާގެ މަގުސަދާގުޅޭ މައުލޫމާތުތައް ހިއްސާކުރުމަށް އެންމެ ފުރަތަމަ އެމެރިކާގެ ފުލުހުންވަނީ ދެކޮޅުހަދާފައެވެ. ނަމަވެސް ފުލުހުން ވަނީ ހަމަލާދިން މީހާ ހާމަކޮށްފައެވެ.

ފުލުހުން މައުލޫމާތުދޭ ގޮތުގައި ޕޯލް އަށް ހަމަލާދީފައި ވަނީ އުމުރުން 42 އަހަރުގެ ޑޭވިޑް ޑެޕާޕީ ކިޔާ މީހެކެވެ. އޭނާވެސް ވަނީ ހަމަލާއަށް ފަހު ސެން ފްރެންސިސްކޯގެ ހޮސްޕިޓަލަކަށް ގެންގޮސްފައިކަމަށް ރޮއިޓަރސްއިން ބުނެއެވެ.

ޑެޕާޕީގެ މައްޗަށް ވަނީ ގަސްތުގައި މީހަކު މަރާލަން އުޅުނުކަމުގެ ދައުވާގެ އިތުރުން ނުރައްކާތެރި ހަތިޔާރަކުން މީހަކަށް ހަމަލާދިނުމުގެ ކުށުގެ ދައުވާ އާއި އުމުރުން ދުވަސްވީ މީހަކަށް ހަމަލާދިނުމުގެ ކުށުގެ ދައުވާވެސް އުފުލާފައެވެ. މީގެ އިތުރުން އިތުރު އެހެން ދައުވާތަކެއްވެސް އޭނާގެ މައްޗަށް އުފުލާފައިވާކަމަށް ރިޕޯޓުތައް ބުނެއެވެ.

ސެން ފްރެންސިސްކޯގެ ޕޮލިސް ޗީފް ވިލިއަމް ސްކޮޓް މީޑިއާއަށް މައުލޫމާތުދެއްވަމުން ވަނީ މިއީ ހަމަ ހުރެފަދިން ހަމަލާއެއް ނޫން ކަމަށް ވިދާޅުވެފައެވެ. އެހެންމަވެސް މިހަމަލާދިން ސީދާ ސަބަބެއް އަދި ހޯދިފައިނުވާކަމަށް ވަނީ ވިދާޅުވެފައެވެ.

ފުލުހުންނާ އެފްބީއައި ގުޅިގެން މިހާރު ދަނީ މިހަމަލާ ތަހުގީގުކުރަމުންނެވެ.

ނޭންސީ ޕެލޯސީގެ އޮފީހާ ހަވާލާދީ މީޑިއާތަކުން ރިޕޯޓުކޮށްފައިވާގޮތުން އުމުރުން 82 އަހަރުގެ ޕޯލްއަށް ހަމަލާގައި ލިބުނު އަނިޔާތަކަށް ދަނީ ފަރުވާހޯދަމުންނެވެ. އެގޮތުން ބޮލަށް ލިބުނު އަނިޔާގެ ސަބަބުން ސަރޖަރީއެއް ހަދާފައިވާކަމަށް ރިޕޯޓުތައް ބުނެއެވެ. އަދި ޕޯލްގެ ކަނާތަށާއި ދެ އަތްތިލައަށް ލިބުނު އަނިޔާތަކަށްވެސް ފަރުވާހޯދާފައިވާކަމަށް ވަނީ ބުނެފައެވެ.

ޕޯލްއަށް ލިބުނު އަނިޔާތަކުން ފުރިހަ ޝިފާއެއް ލިބޭނެ ކަމަށް ޑޮކްޓަރުންނާ ހަވާލާދީ ނޭންސީގެ އޮފީހުން ވަނީ މީޑިއާއަށް މައުލޫމާތުދީފައެވެ.

ޕެލޯސީގެ ދެކަނބަލުންގެ ގެކޮޅަށް ވަދެގަނެ ޕޯލް އަށް ހަމަލާދިންވަގުތު ނޭންސީ ހުންނެވީ ވޮޝިންގްޓަންގައެވެ. ނަމަވެސް މިހާރު އެކަމަނާ ވަނީ ފިރިކަލުންގެ އަރިހަށް ސެން ފްރެންސިސްކޯއަށް ވަޑައިގަންނަވާފައެވެ.

ނޭންސީ ޕެލޯސީގެ ފިރިކަލުންނަށް ހަމަލާދީފައި މިވަނީ އެމެރިކާގެ މިޑްޓަރމް އިލެކްޝަނަށް ކުޑަ ދުވަސްކޮޅަކަށް ވެފައިވަނިކޮށެވެ. އެގޮތުން ނޮވެމްބަރު 8 ވަނަ ދުވަހު ނެގުމަށް ހަމަޖެހިފައިވާ ވޯޓުގައި އެމެރިކާގެ ހައުސް އޮފް ރެޕްރެޒެންޓީޓިވްސް އާއި ސެނެޓްގެ ކޮންޓްރޯލް ލިބިގެންދާނެ ބަޔަކު ކަނޑައެޅިގެންދާނެއެވެ.