ބެލްކަނީން މައްޗަށް އަރައި ކުއްޖާ ސަލާމަތް ކުރި މީހާއަށް ފްރާންސްގެ ރައްވެހިކަން ދީފި
28 މެއި 2018 | ހޯމަ 17:46ކުއްޖާ އޮތީ ބެލްކަނިން ކިރިޔާ ނުވެއްޓި
ފްރާންސްގެ ރައީސް އެމަނުއެލް މެކްރޮން އެލީސީ ޕެލަސްގައި ގައްސާމާ ބައްދަލު ކުރައްވަނީ
ފްރާންސް ވެރިރަށް ޕެރިގުގެ އުތުރުގެ ސަރަހައްދެއްގައި ހުރި އިމާރާތެއްގެ ހަތަރު ވަނަ ބުރިން އެލިފައި އޮތް ކުޑަ ކުއްޖަކު ސަލާމަތްކުރަން އެއް ބެލްކަނިން އަނެއް ބެލްކަނިން މައްޗަށް އަރައި، އެ ކުއްޖާ ސަލާމަތް ކުރި މީހާއަށް ފްރާންސްގެ ރައްވެހިކަން ދީ، އެތައް ބައެއްގެ ތައްރީފު އޮހެން ފަށައިފިއެވެ.
އެފްރިކާގެ ހުނޅަގުގައި އޮންނަ ގައުމެއް ކަމަށްވާ، މާލީން ފްރާންސަށް ހިޖްރަކުރި މަމޫސޯ ގައްސާމާގެ ހިތްވަރަށް އެތައް ބަޔަކު ދަނީ ތައުރީފު ކުރަމުންނެވެ. ކުއްޖާ ސަލާމަތް ކުރަން އެއްކަމެއް ވެސް ނުކޮށް އެތައް ބަޔަކު މަންޒަރު ވީޑިއޯ ކުރަން ތިބި އިރު ގައްސާމާ ވަނީ އަމަލީ ގޮތުން ހަރަކާތް ތެރިވެފައެވެ. އޭނާ ވަނީ ފަޔަރ އެންޑް ރެސްކިއު އަންނަންދެން ވެސް މަޑުނުކޮށް އިމާރާތުގައި ބޭރުގައި އެލެމުން މައްޗަށް އަރާފައެވެ. އޭރު ޖެހިގެން ހުރި ބެލްކަނީގައި ތިބި ބަޔަކު އެ ކުއްޖާގެ އަތުގައި ހިފޭތޯ މަސައްކަތް ކުރަމުން ދިޔައެވެ. ގައްސާމާ ވަނީ މަދު ސިކުންތު ކޮޅެއްގެ ތެރޭގައި ހަތަރު ވަނަ ބުރިއަށް އަރައި، ވެއްޓެމުން ދިޔަ އެ ކުއްޖާ ސަލާމަތް ކޮށްފައެވެ.
ގައްސާމާ ބުނީ އަސްލު އޭނާ އެ ސަރަހައްދުން ދިޔައީ ފުޓްބޯޅަ މެޗެއް ބަލަން ކަމަށެވެ. އެހެން ދިޔައިރު ބަޔަކު އެއްވެގެން އުޅޭތީ ބެލިއިރު ކުޑަ ކުއްޖަކު ބެލްކަނީގެ އެލިފައި އޮތްތަން ފެނުނު ކަމަށެވެ. އެ ވަގުތު ގަތް ބިރެއްގެ ސަބަބުން މުޅި ހަށިގަނޑު ތުރުތުރު އަޅަން ފެށި ނަމަވެސް އެކަމާ މާބޮޑަށް ނުވިސްނައި އެ ކުއްޖާ ސަލާމަތްކުރެވޭނެ ގޮތެއް އޮތްތޯ ބެލި ކަމަށެވެ. އަދި އެކަން ކުރުމުގެ ބާރާއި ހިތްވަރު އޭނާ އަށް ދެއްވީ ހެއްދެވި ފަރާތުން ކަމަށް ވެސް ބުނެފައި ވެއެވެ.
ކުއްޖާ ސަލާމަތްކުރުމާ ގުޅިގެން މީސް މީޑިއާގައި މީހުން ގައްސާމާއަށް ތައުރީފުކުރުމުގެ އިތުރުން ވަނީ ވަނަމަކަށް 'ސްޕައިޑަމޭން'ގެ ނަން ދީފައެވެ. އަދި އޭނާއަކީ އަސްލު ސުޕަހީރޯއެއް ކަމަށް ގިނަ ބަޔަކު ވަނީ ސިފަކޮށްފައެވެ. ދުނިޔޭގެ ވެރިން ވެސް ވަނީ ގައްސާމާ އަށް ޝުކުރު އަދާކޮށްފައެވެ. ފްރާންސްގެ ރައީސް އެމަނުއެލް މެކްރޮން ވަނީ އެލީސީ ޕެލަސްގައި ގައްސާމާ ބައްދަލުކުރައްވައި ހިތްވަރު ދެއްކުމުގެ މެޑަލް އާއި ކުރެއްވި ކަންތައް ފާހަގަ ކުރަން ސެޓްފިކެޓެއް ދީފައެވެ. ޕެރިހުގެ މޭޔަރު އޭން ހިޑަލްގޯ ވެސް ވަނީ ގައްސާމާ އަށް ގުޅުއްވައި ޝުކުރު އަދާކުރައްވާފައެވެ. އަދި ފްރާންސްގެ ސަރުކާރުން ވަނީ އޭނާ އަށް ދާއިމީ ރަށްވެހިކަން ވެސް ދީފައެވެ. އެއާއެކު ގައްސާމާއަށް ވަނީ ފަޔަރ އެންޑް ރެސްކިއު އިން ވެސް ވަޒީފާއެއް ލިބިފައެވެ.
ކުއްޖާގޭގައި އެކަނި ބަހައްޓާފައި ދިއުމާ ގުޅިގެން ފުލުހުން ވަނީ ބައްޕައާ ސުވާލް ކޮށްފައެވެ. ރިޕޯޓްތައް ބުނާ ގޮތޮގައި އެ ކުއްޖާގެ ބައްޕަ ކޯޓަށް ހާޒިރުވާން ވެސް ވަނީ އަންގާފައެވެ. އެނގިފައިވާ ގޮތުގައި އެ ކުއްޖާ ބެލްކަނީން ބޭރަށް އެލިފައި އޮތް އިރު އެ ގޭގައި އިތުރު މީހަކު ނެތް ކަމަށް ވެއެވެ.
