ދުނިޔޭގައި ލިބެން ހުރި އެންމެ ކުޅި މިރުސް އަޅައިގެން ޗޮކްލެޓެއް ކާލަން ކެރޭނެތަ؟

ފަރަންސޭސިވިލާތުގެ ވެރިރަށް ޕެރިހުގައި ކޮންމެ އަހަރަކުވެސް ކުރިއަށް ގެންދާ ޗޮކްލެޓް ފެއަރގައި މުޅިން އާ ރަހައެއް ތައްޔާރުކޮށްލުމަކީ މާ ފަސޭހަ ކަމަކަށް އޮންނަނީ ނުވެފައެވެ. ނަމަވެސް ޗޮކްލެޓް އުފެއްދުމުގެ މަސައްކަތުގައި ހަރަކާތްތެރިވާ ޑެމިއަން ވިޑާލް މި ވަނީ، ޗޮކްލެޓެއްގެ އެހީގައި މުޅިން ތަފާތު ތަޖުރިބާއެއް ކޮށްލުމުގެ ފުރުޞަތު ފަހި ކޮށްދީފައެވެ. އޭނާ އެކަން ކުރީ، ދުނިޔޭގައި މިވަގުތު ލިބެން ހުރި މިރުހުގެ ބާވަތްތަކުގެ ތެރެއިން، އެންމެ ކުޅި މިރުސް ކަމަށް އެންމެ ގިނަ ބަޔަކު އިއްތިފާޤުވާ މިރުހާއި ޗޮކްލެޓް އެއްކޮށްގެންނެވެ.

ޗޮކްލެޓްގައި ތަފާތު ރަހަތައް ލެއްވުމަށް ޒަމާނުއްސުރެ ބޭނުން ކުރަމުން އަންނަ ރާސްބެރީއާއި ޕެޝަންފުރުޓް ފަދަ މޭވާތައް ބޭނުން ކުރުމުގެ އިތުރުން، ވިލާޑްގެ އާ ޗޮކްލެޓްތައް ރަހަލައްވަން ބޭނުން ކުރީ ކެރޮލީނާ ރީޕަރ މިރުހެވެ. ގިނިސް ވޯލްޑް ރެކޯޑްސް ބުނާ ގޮތުގައި، ކެރޮލީނާ ރީޕަރއަކީ ދުނިޔޭގައި މިވަގުތު ލިބެން ހުރި އެންމެ ކުޅި މިރުހެވެ.

ވިޑާލްގެ ޗޮކްލެޓުގައި ކެރޮލީނާ ރީޕަރ މިރުސް ބޭނުން ކޮށްފައި ވަނީ، އެ ޗޮކްލެޓް ކާ މީހުންނަށް މިރުހުގެ ރަހަ އިޙްސާސް ކުރެވޭ ގޮތަށެވެ. ނަމަވެސް، ހައްޓަށް ހަޖަމު ނުވާހާ ގަދައަކަށްވެސް ނޫނެވެ.

ޗޮކްލެޓް ފެއަރއަށް ޒިޔާރަތް ކުރި ބައެއް މީހުން ވަނީ ވިޑާލްގެ މިރުސް ޗޮކްލެޓް ތަޖުރިބާ ކޮށްފައެވެ. މިރުސް ޗޮކްލެޓް ތަޖުރިބާ ކުރި އެއްވެސް މީހަކަށް، އެ ޗޮކްލެޓް މާ ކުޅިވިހެނެއް ހީއެއް ނުވެއެވެ. ދޭސީންނާއި ބިދޭސީންގެ މެދުގައިވެސް ވިޑާލް މިރުސް ޗޮކްލެޓް މަޤުބޫލެވެ. 

ޕޭސްޓްރީ ޝެފެއްގެ ގޮތުގައި މަސައްކަތްކޮށް، ގިނަ އެވޯޑްތަކެއްވެސް ހާސިލު ކޮށްފައިވާ ވިޑާލް ބުނި ގޮތުގައި އޭނާގެ މިރުސް ޗޮކްލެޓް ތައްޔާރު ކުރުމުގައި ބަލާފައި ވަނީ، ފަހުން ކުރާ އަސަރަށް އިސްކަން ދީގެންނެވެ. ޒުވާން ފަންނުވެރިއެއްގެ ގޮތުގައި ޕެރިސް ޗޮކްލެޓް ފެއަރގައި ބައިވެރިވި ވިޑާލް ބުނި ގޮތުގައި، މިރުސް ޗޮކްލެޓް ތައްޔާރު ކުރުމުގައި އޭނާ ބަލާފައި ވަނީ، ޗޮކްލެޓް ކާލާ ފުރަތަމަ ވަގުތު، ފޮނި-މީރު ހިތްގައިމު ރަހައެއް ލައްވާލުމަށްފަހު، މިރުހުގެ ރަހަގަނޑު ފަޅައިގެން ދާ ގޮތަށެވެ. އަދި އިރުކޮޅެއް ފަހުން، އެ ރަހަތައް މަޑުވެގެން ދާނެ ކަމަށްވެސް ވިޑާލް ބުނެއެވެ.

ފަރަންސޭސިވިލާތަކީ ޗޮކްލެޓާ އިންތިހާއަށް އަހުލުވެރި ބަޔަކު ދިރިއުޅޭ ޤައުމެކެވެ. ޕެރިސް ޗޮކްލެޓް ފެއަރގެ ތަފާސް ހިސާބުތަކަށް ބަލާއިރު، އެ ޤައުމުން އަހަރެއްގެ މައްޗަށް 243.793 ޓަނުގެ ޗޮކްލެޓް އެކްސްޕޯޓް ކުރެއެވެ. އަދި ފަރަންސޭސި ގޭބިސީތަކަށް ބަލާއިރު، ކޮންމެ ގޭބިސީއަކުންވެސް އަހަރެއްގެ މައްޗަށް އެވަރޭޖުކޮށް، 13.2 ކިލޯގްރާމްގެ ޗޮކްލެޓް ބޭނުން ކުރެއެވެ.