ވޯލްޑް ކަޕް ބަލަން ގަތަރަށް ނުގޮސް، އަގު ބޮޑު ޔޮޓުތަކަށް!

ގަތަރުގައި ފަށާ ފީފާ ވޯލްޑް ކަޕަށް ދަތުރުކުރުމާއި، އެ ގައުމުގައި އެކޮމަޑޭޝަންގެ މައްސަލަތައް ކުރިމަތިވާނެކަމަށް ވަނީ ބެލެވިފައެވެ.

މިހާރުވެސް ގަތަރުގެ ހޮޓާތަކަށް ދަނީ ބާރު ބޮޑުވަމުންކަމަށް މީޑިއާ ރިޕޯޓުތައް ބުނެއެވެ. އެ ގައުމަށް މުބާރާތް ބަލަން މިއަހަރު އެތައް މިލިއަން މީހުންނެއް ދަތުރުކުރާނެ ކަަމަށްވެސް ވަނީ ބެލެވިފައެވެ. ބައެއް ސަޕޯޓަރުން ބުނަމުން އަންނަގޮތުގައި، އެ މީހުންނަށް ގަތަރަށް ގޮސް ވޯލްޑް ކަޕް ބެލުމަކީ ދަތި އުނދަގޫ ކަމަކަށްވާނެއެވެ. އެއީ، ދަތުރުގެ ޚަރަދާއި ތިބުމުގެ ޚަރަދަށް ގިނަ ފައިސާ ޚަރަދުކުރަން ޖެހޭނެތީކަމަށް އެ މީހުން ބުނެއެވެ.

މިވާހަކަތަކުގެ ތެރެއިން ދުބާއީގެ ބައެއް ސަޕޯޓަރުން މިވަނީ މުޅިން ތަފާތުކަމެއް ކޮށްފައެވެ. އެ މީހުން ނިންމީ ވޯލްޑް ކަޕްގެ މެޗުތައް ބެލުމަށް އަގުބޮޑު ޔޮޓުތައް ކުއްޔަށްނަގައި، މެޗު ބެލުމަށް އެއަށް ދިޔުމަށެވެ. އެ މީހުން ބުނާގޮތުގައި މުބާރާތް ބެލުމަށް ގަތަރަށް ދިއުމަށްވުރެ، އެ ގޮތަށް ރައްޓެހިންނާއި އާއިލާއާއެކު މެޗު ބަލާލުމުން މާ ހިތްހަމަޖެހޭނެއެވެ. މީގެ އިތުރުން މޫދުގައި ތިބެގެން، ހިތްހަމަ ޖެހުމާއެކު އެ ޔޮޓުތަކުން ދޭ ޚިދުމަތްތަކާއެކު މުބާރާތް ބަލާލެވޭނެކަން އެމީހުން ވަނީ ފާހަގަކޮށްފައެވެ.

އެމީހުން ފާހަގަކުރާގޮތުގައި އެ ޔޮޓުތަކުން ލިބޭ ޚިދުމަތްވެސް ރަނގަޅުވާނެއެވެ. މަޖާކުރުމާއި، މުނިފޫހިފިލުވުމުގެ އެތައް ކަމެއް ކުރެވޭ މި ޔޮޓުތަކުގައި، މުބާރާތް ނިމެންދެން ތިބެން ބޭނުންނަަމަ އެ ފުރުސަތު އޮންނާނެ ކަމަށްވެސް އެމީހުން ބުނެއެވެ.

އެކަމާގުޅޭގޮތުން ވާހަކަދައްކަމުން އެ ޔޮޓުގައި އުޅޭ މީހަކު ބުނީ، މިހާރުވެސް ގިނަ ބަޔަކު ބުކިންގތައް ހަދަމުން އަންނަކަމަށެވެ. އަދި އުންމީދަކީ ކުރިއަށް އޮތް ތަނުގައި މިހާރަށްވުރެވެސް ގިނަ ބަޔަކު ބުކިންގ ހެދުން ކަމަށެވެ. އޭނާ ބުނީ ޔޮޓުތަކުގައި މިފަދަ ގޮތަކަށް މުބާރާތް ބަލައިލުމުގެ ފުރުސަތު ލިބޭތީ، ޚިދުމަތަށް އެދޭ މީހުން އުފަލުން ތިބޭކަމަށެވެ. އޭނާ ބުނީ މުބާރާތް ބެލުމަށް ޔޮޓުތަކަށް އަންނަ މީހުންނަށް އެންމެ ފުރިހަމަ ޚިދުމަތެއް ފޯރުކޮށްދޭނެ ކަމަށެވެ.

މިއަހަރުގެ މުބާރާތް ބެލުމަށް ދުބާއީގެ ބައެއް މީހުން ޔޮޓުތަކަށްދާއިރު، މިނޫންވެސް ތަފާތު ގޮތްގޮތަށް ވޯލްޑް ކަޕް ބެލުން ދުބާއީގައި ކުރިއަށްދާނެ ކަމަށް ރިޕޯޓުތައް ބުނެއެވެ. މިއަހަރުގެ މުބާރާތް ކުރިއަށްދާނީ ނޮވެމްބަރު 20ން ޑިސެމްބަރު 18ގެ ނިޔަލަށެވެ.