އޮޑިޓަރ ޖެނެރަލް އޮފީހުގެ އަންނަ އަހަރުގެ ބަޖެޓަކީ 93.4 މިލިއަން ރުފިޔާކަމަށް ރައްޔިތުންގެ މަޖިލީހުން ފާސްކޮށްފިއެވެ.

ބުދަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި އޮޑިޓަރ ޖެނެރަލް އޮފީހުގެ ބަޖެޓު ދިރާސާކުރި މާލިއްޔަތު ކޮމިޓީގެ ރިޕޯޓު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 44 މެމްބަރުންގެ އިއްތިފާގުންނެވެ.

އޮޑިޓަރ ޖެނެރަލް އޮފީހުގެ ބަޖެޓު ދިރާސާކުރި މާލިއްޔަތު ކޮމިޓީން ފާސްކޮށްފައިވަނީ އަންނަ އަހަރަށް ލަފާކޮށް އެ އޮފީހުން ހުށަހަޅާފައިވާ ބަޖެޓުގެ ރިކަރަންޓް ޚަރަދާއި އޮފީސް ހިންގުމަށް ބޭނުންވާ ހަރުމުދާ ހޯދުމަށް ކުރާ ޚަރަދުގެ ގޮތުގައި 61،000،000 (ފަސްދޮޅަސް އެއް މިލިއަން) ރުފިޔާކަމަށާއި، އަދި ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ގޮތުގައި 32،400،000 (ތިރީސް ދެ މިލިއަން ހަތަރު ލައްކަ) ރުފިޔާކަމުގައި ކަނޑައެޅުމަށެވެ.

އެހެންކަމުން އަންނަ އަހަރުގެ އޮޑިޓަރ ޖެނެރަލް އޮފީހުގެ ބަޖެޓުގެ ޖުމްލައަކީ 93،400،000 (ނުވަދިހަ ތިން މިލިއަން ހަތަރު ލައްކަ) ރުފިޔާއެވެ.

އަންނަ އަހަރަށް ލަފާކޮށް އޮޑިޓަރ ޖެނެރަލް އޮފީހުން މަޖިލީހަށް ހުށަހަޅާފައިވަނީ 95،150،152 (ނުވަދިހަ ފަސް މިލިއަން އެއްލައްކަ ފަންސާސް ހާސް ފަންސާސް ދެ) ރުފިޔާއެވެ. ނަމަވެސް ކޮމިޓީން ގެނައި ބަދަލުތަކާއެކު ނިންމާފައިވަނީ 1،750،052 (އެއް މިލިއަން ހަތް ލައްކަ ފަންސާސްހާސް ފަންސާސް ދެ) ރުފިޔާ އުނިކުރުމަށެވެ. މިއީ އޮޑިޓަރ ޖެނެރަލްގެ އޮފީހުން 2023 ވަނަ އަހަރަށް އެ އޮފީހުގެ ކެޕިޓަލް އަދި ރިކަރަންޓް ޚަރަދު ހިމެނޭގޮތަށް ހުށަހަޅާފައިވާ 62،750،052ން އުނިކޮށްފައިވާ ފައިސާއެވެ.

އޮޑިޓް އޮފީހުން ލަފާކޮށް ހުށަހެޅި ބަޖެޓުގައި ހިމަނާފައިވާ އެ އޮފީހުގެ އައު އިމާރާތުގެ މަޝްއޫއަކީ އަދި މިވަގުތު ފައިސާ ހަމަޖެހިފައިވާ މަޝްރޫއެއް ނޫން ކަމަށް ފިނޭންސް މިނިސްޓްރީން ވަނީ ކޮމިޓީއަށް މައުލޫމާތު ދީފައެވެ. ނަމަވެސް އެ މަޝްރޫއަށް ފައިނޭންސް ހޯދުމުގެ ކަންކަން ކުރިއަށް ގެންދެވިދާނެކަމަށް މިނިސްޓްރީން ވަނީ ބުނެފައެވެ.

ހިނގަމުންދާ އަހަރުގެ އޮޑިޓަރ ޖެނެރަލް އޮފީހުގެ ބަޖެޓަކީ 90،315،293 (ނުވަދިހަ މިލިއަން ތިންލައްކަ ފަނަރަ ހާސް ދުއިސައްތަ ނުވަދިހަ ތިން) ރުފިޔާއެވެ.