ޅ. ނައިފަރު ފްލެޓްތަކުގެ ބޮޑު މަރާމާތެއް ކުރަން ހުށަހަޅާފައިނުވާ ކަމަށް ހައުސިންގ މިނިސްޓްރީން ބުނެފި
ކައުންސިލުން ފާހަގަކުރި ހުރިހާ މަރާމާތުތައް ނިންމައި ކައުންސިލުގެ އެޕްރޫވަލް ހޯދާފައިވާނެ
ޅ.ނައިފަރުގައި އަޅާފައިވާ ފްލެޓްތައް
ޅ. ނައިފަރު ފްލެޓްތަކުގެ ބޮޑު މަރާމާތެއް ކުރަން ހުށަހަޅާފައިނުވާ ކަމަށް މިނިސްޓަރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ބުނެފިއެވެ.
ނައިފަރުގައި ތަރައްގީކޮށްފައިވާ 100 ފްލެޓްގައި މާރާމާތުގެ ބޮޑެތި މައްސަލަތަކެއް ހުރިއިރު ވެސް އެ މައްސަލަތައް ހައްލުނުކޮށް ގިނަ ދުވަސްތަކެއްވަމުންދާ ކަމަށް ބުނެ ފެތުރެމުންދާ ވާހަކަތަކާއި ގުޅިގެން އެ މިނިސްޓްރީން ބުނީ އެތަން އިމާރާތްކުރަން ރަޝީދު ކާޕެންޓްރީއާ ހަވާލުކުރީ ޖެނުއަރީ 26، 2020 ގައި ކަމަށާއި އެ މަސައްކަތް ނިންމައި ފެބްރުއަރީ 19، 2022 ގައި ހަވާލުކޮށްފައިވާ ކަމަށެވެ.
އެތަނުގައި 100 ހައުސިން ޔުނިޓް ހިމެނޭ 4 އިމާރާތް ހިމެނޭއިރު އެތަނުގެ މަސައްކަތް ނިންމުމާއެކު މިނިސްޓްރީން ވަނީ އިމާރާތް ބެލެހެއްޓުމާއި އިމާރާތާގުޅޭ ކަންކަން މެނޭޖްކުރުމަށް އެ ރަށު ކައުންސިލާ ހަވާލުކޮށްފައި ކަމަށް މިނިސްޓްރީން ބުންޏެވެ.
މިނިސްޓްރީން ބުނީ އެ މަޝްރޫއުގެ ކޮންޓްރެކްޓަރާ އެކު ވެފައިވާ އެއްބަސްވުމުގައިވާ ގޮތުން މަސައްކަތް ނިންމުމަށް ފަހު އެއް އަހަރު ދުވަހުގެ މުއްދަތަކަށް އިމާރާތަށް ލިބޭ ގެއްލުންތައް މިނިސްޓްރީން ބެލުމަށް ފަހު އެކަން ކޮންޓްރެކްޓަރަށް އެންގުމުން އެ މަސައްކަތް ކުރާނީ ކޮންޓްރެކްޓަރު ކަމަށެވެ. އެކަމަކު އެ މަރާމާތުގެ ތެރޭގައި ތަނުގައި ދިރިއުޅޭ ފަރާތްތަކުން އިމާރާތަށް ގެންނަ އެއްވެސް ބަދަލެއް ނުހިމެނޭ ކަމަށެވެ.
އެ ހައުސިން ޔުނިޓްތަކުގައި މައްސަލަތަކެއް ހުރި ކަމަށް އެ ރަށު ކައުންސިލުން މިނިސްޓްރީއަށް ހުށަހެޅީ މިއަހަރުގެ މެއި 19 ގައި ކަމަށާއި ކޮންޓްރެކްޓަރާ އެކު މަޝްވަރާކުރުމަށް ފަހު، އެ މައްސަލަތައް ބަލައި ހައްލުކުރުމަށް އެ ރަށަށް ކޮންޓްރެކްޓަރުގެ ޓީމެއް ޖޫން 10 ގައި ދިޔަ ކަމަށް މިނިސްޓްރީން ވަނީ ފާހަގަކޮށްފައެވެ. އަދި މަސައްކަތް ކުރުމުގެ ތާވަލެއް އެކުލަވާލައި، ޖޫން 12 ވަނަ ދުވަހު ފްލެޓްތަކުގެ މައްސަލަ ހައްލުކުރުމުގެ މަސައްކަތް ފެށި ކަމަށް ވެސް މިނިސްޓްރީން ބުންޏެވެ.
މައްސަލަތައް ހައްލުކުރުމުގެ މަސައްކަތް ކުރިއަށް ގެންގޮސްފައި ވަނީ ޔުނިޓްތަކުގެ ވެރިފަރާތްތަކާއި ކައުންސިލުގެ ވެސް ބައިވެރިވުމާއެކު އެ ފަރާތްތަކުގެ އެޕްރޫވަލް ލިބިގެން ކަމަށާއި ކައުންސިލުން ފާހަގަކުރި ހުރިހާ މަރާމާތުތައް ނިންމައި ކައުންސިލުގެ އެޕްރޫވަލް ހޯދާފައިވާ ކަމަށް ވެސް މިނިސްޓްރީން އިތުރަށް ބުންޏެވެ.
އެ މަރާމާތުތަކުގެ އިތުރަށް ބޮޑު މަރާމާތެއް ކުރުމަށް ކައުންސިލުން މިނިސްޓްރީއަށް ހުށަހަޅާފައެއް ނުވާ ކަމަށާއި ފްލެޓްގައި އުޅޭ މީހަކު ވެސް އެތަނުގެ މަރާމާތާ ގުޅޭ އެއްވެސް ކަމެއް ހުށަހަޅައިފިނަމަ، ނުވަތަ މިނިސްޓްރީގެ ސަމާލުކަމަށް ގެނެސްފިނަމަ، އެކަމަށް އެޓެންޑުވެފައިވާ ކަމަށް ވެސް މިނިސްޓްރީން ބުންޏެެވެ.
