މުލަކުގައި މި އަހަރުގެ 50 ހައުސިން ޔުނިޓްގެ އެޅުމުގެ އަމަލީ މަސައްކަތް ފަށާނަން: ރައީސް މުއިއްޒު

މުލަކަތޮޅު މުލަކުގައި މިއަހަރުގެ 50 ހައުސިން ޔުނިޓް އެޅުމުގެ އަމަލީ މަސައްކަތް ފަށާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އާދިއްތަ ދުވަހުގެ ރޭ އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސް މުއިއްޒު ވިދާޅުވީ އާބާދީ ބައިބޯ ހުރިހާ ރަށެއްގައި ދިމާވެފައިވާ އެންމެ ބޮޑު މައްސަލައަކީ ގެދޮރުގެ ދަތިކަން ކަމަށާއި، މި މައްސަލަ ހައްލު ކޮށްދިނުމަކީ ރިޔާސީ ވައުދުތަކުގެ ތެރެއިން އެންމެ މުހިންމު ވައުދު ކަމަށެވެ.

ރަށުގެ ތަރައްގީއަށް ތާވަލުކުރެވިފައިވާ އެހެނިހެން މަސައްކަތްތަކަށް އިޝާރާތްކުރައްވައި ރައީސް މުއިއްޒު ވިދާޅުވީ މި އަހަރު ތެރޭ، 50 ހައުސިންގ ޔުނިޓުގެ އަމަލީ މަސައްކަތް ފަށާނެ ކަމަށެވެ. އަދި ބާރު ދުވެލީގައި ބަނދަރުގެ މަސައްކަތް ނިންމައި، ރަށްގިރުމުގެ މައްސަލައަށްވެސް ހައްލު ކޮށްދެއްވާނެ ކަމަށް އެމަނިކުފާނު ވިދާޅުވިއެވެ.

ގެދޮރަކީ އެންމެ މުހިންމު ކަންތައް. އެންމެ މުހިންމު ކަންތައް. ޚާއްސަކޮށް މިފަދަ ރަށްރަށުގައި. މާލޭގައި ހަމަ އެންްމެ ބޮޑު ކަންތައް. އާބާދީ ބައިބޯ ހުރިހާ ރަށެއްގައި އެންމެ ބޮޑު ކަންތައް. ގެދޮރުވެރިކަން ހައްލު ކޮށްދިނުމަކީ އަޅުގަނޑުވީ އެންމެ ބޮޑު ރިޔާސީ ވައުދު. ތަރައްގީގެ ދާއިރާއިން. އެކަން ރައްޔިތުންނަށް ފޯރުކޮށްދިނުމަށްޓަކައި ކުރަންޖެހޭ މަސައްކަތްތައް ފުރަތަމަ ދުވަހުން ފެށިގެން ފަށައިގެން މިއަދާ ހަމައަށް މިއައީ. އާދެ. މިރަށުގައި އިރާދަކުރެއްވިއްޔާ މިއަހަރުގެ ތެރޭގައި މިއަހަރުގެ ތެރޭގައި އަމަލީ ގޮތުން 50 ހައުސިން ޔުނިޓް އެޅުމުގެ އަމަލީ މަސައްކަތް ފަށައިދޭނަން. އެއީ ނިމުމެއް ނޫން. އެއީ ފެށުމެއް.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު

އެރަށުގެ ތަރައްގީގެ އެހެނިހެން މަޝްރޫއުތަކަށް އިޝާރާތް ކުރައްވައި ރައީސް މުއިއްޒު ވިދާޅުވީ 30 ޓަނުގެ އައިސްޕްލާންޓެއް ތަރައްގީކުރުމުގެ މަޝްރޫއުގެ އިތުރުން، މިހާރު ކުރިއަށްދާ ކޯލްޑް ސްޓޯރޭޖް ގާއިމުކުރުމުގެ މަޝްރޫއާއި، ޖަނަވަރީ މަހު އެ ރަށުގައި ފެށުމަށް ހަމަޖެހިފައިވާ ފިއުލް ސްކިޑްގެ މަސައްކަތާއެކު ރަށުގެ މަސްވެރިކަމަށް ކުރިއެރުން ލިބިގެންދާނެ ކަމަށެވެ.

މީގެ އިތުރުން މަގުހެދުމުގެ މަޝްރޫއާއި ފިޓްނަސް އެންޑް ރިކްރިއޭޝަން ސެންޓަރުގެ މަޝްރޫއު، ގިނަވެގެން 4 މަސްދުވަހުގެ ތެރޭގައި ނިމޭނޭކަމުގެ ޔަގީންކަންވެސް އެމަނިކުފާނު ދެއްވިއެވެ.

އަންނަ އަހަރުގެ މާރިޗުގެ ކުރިން ރަށުގެ އިރުމަތީ ޖެޓީގެ އަމަލީ މަސައްކަތް ފައްޓަވައި، ދިރާސީ އާ އަހަރަށް ސްކޫލްގެ މަސައްކަތްވެސް ފުރިހަމަކޮށްދެއްވާނޭކަމަށް އެމަނިކުފާނު ވިދާޅުވިއެވެ. ފުލުހުންނަށް ވެހިކަލެއް ނުލިބި 14 ވަރަކަށް އަހަރު ވެފައިވާ މައްސަލައަށް އަންނަ އޮކްޓޯބަރު މަހު، ނިމުމެއް ގެނެސްދެއްވާނޭކަމަށް ވެސް ރައީސް މުއިއްޒު ވިދާޅުވިއެވެ.