ގަމަށް ބަދަލުވި އާއިލާތަކަށް ކުރީ ސަރުކާރުން ދޭން ނިންމި ފައިސާ ދޭނެ ކަމުގެ ޔަގީންކަން އަނެއްކާ ވެސް ރައީސް މުއިއްޒު ދެއްވައިފި
ގަމުގައި ޖުމުލަ 300 ހައުސިން ޔުނިޓު ގާއިމް ކުރުމުގެ މަސައްކަތް މިއަހަރު ކުރިއަށް ގެންދާނެ
ރައީސް ޑރ.މުހައްމަދު މުއިއްޒު ލ.ގަމު ރައްޔިތުންނާ ބައްދަލު ކުރައްވައި ވާހަކަދައްކަވަނީ
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އެހެން ރަށްރަށުން ލ.ގަމަށް ބަދަލުވި ފަރާތްތަކަށް ދޭން ނިންމާފައިވާ 50،000 ރުފިޔާ ދޭނެ ކަމުގެ ޔަގީންކަން އަނެއްކާ ވެސް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފިއެވެ.
އެމަނިކުފާނު މިހެން ވިދާޅުވީ އަންގާރަ ދުވަހުގެ ރޭ ގަމު ރައްޔިތުންނާ މުޚާތަބުކުރައްވައި ދެއްކި ވާހަކަފުޅުގައެވެ.
ގަމުގެ ތަރައްގީއަށް އިޝާރާތް ކުރައްވައި ރައީސް މުއިއްޒު ވިދާޅުވީ، މި އަހަރުގެ ތެރޭގައި، ގަމުގައި ޖުމުލަ 300 ހައުސިން ޔުނިޓު ގާއިމުކުރެއްވުމުގެ މަސައްކަތް ކުރިއަށް ގެންދަވާނެ ކަމަށެވެ.
މި ރަސްމިއްޔާތުގައި ސޮއިކުރި، ގަމުގައި 100 ހައުސިން ޔުނިޓު ތަރައްގީ ކުރުމުގެ މަޝްރޫއާއި، ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ފަށާފައިވާ 100 ހައުސިންގ ޔުނިޓު ތަރައްގީގެ މަޝްރޫއުގެ އިތުރުން 100 ހައުސިން ޔުނިޓުގެ އިތުރު މަޝްރޫއެއް ހިމެނޭ ގޮތަށް ގަމުގައި ޖުމުލަ 300 ހައުސިން ޔުނިޓު ގާއިމުކުރެއްވުމުގެ މަސައްކަތް މިއަހަރު ކުރިއަށް ގެންދަވާނޭ ކަމުގައި އެމަނިކުފާނު ވިދާޅުވިއެވެ.
މި މަސައްކަތުގެ އިތުރުން، އެހެން ރަށްރަށުން ގަމަށް ބަދަލުވި ފަރާތްތަކަށް ދޭން ޖެހޭ ފައިސާގެ ބަދަލުދީ ހަލާސްކޮށްދެއްވާނޭކަމުގައި އެމަނިކުފާނު ވެވަޑައިގެންފައިވާ ވައުދަށް އިޝާރާތްކުރައްވަމުން، އެކަމަށް ބޭނުންވާ ފައިސާ މިހާރު ވަނީ ހަމަޖައްސަވާފައިކަމަށް ވިދާޅުވިއެވެ.
ދާދި އަވަހަށް، ކަމާބެހޭ ވުޒާރާތަކުން ޓީމުތައް އައިސް، ބޭނުންވާ މައުލޫމާތުތައް ހޯއްދެވުމަށްފަހު، ކޮންމެ މީހަކަށް 50،000 ރުފިޔާގެ ރޭޓުން، ޖުމުލަ 8.45 މިލިޔަން ރުފިޔާ، ހައްގުވެރީންގެ އެކައުންޓަށް ޖަމާކުރައްވާނޭކަމުގައި އެމަނިކުފާނު ވިދާޅުވިއެވެ.
ރައީސް މުއިއްޒު މިމޭރުމުން ވާހަކަފުޅު ދެއްކެވި ނަމަވެސް 28 ސެޕްޓެންބަރު 2023 ގައި ގަމަށް ބަދަލުވި އާއިލާތަކަށް 50،000 ރުފިޔާ ދިނުމަށް ކުރީގެ ރައީސް އިބޫގެ ވެރިކަމުގައި ވަނީ ނިންމަވާފައެވެ. އަދި އެފައިސާއަށް އެދުމުގެ ފުރުސަތު އެއަހަރުގެ އޮކްޓޫބަރު މަހުގެ ތެރޭގައި ކައުންސިލުން ހުޅުވާލިއެވެ.
ނަމަވެސް ވެރިކަން ބަދަލުވުމާއި އެމަސައްކަތް ހުއްޓި، ފައިސާ ދޫކޮށްފައިނުވެއެވެ.
މީގެ އިތުރުން ރާއްޖޭގައި އެކަށީގެންވާ މިންވަރަށް ފަތުރުވެރިކަމުގެ ވިޔަފާރި ފުޅާކުރެވިފައި ނެތް އަތޮޅުތަކުގައި ރިސޯޓު ތަރައްގީކުރުމަށް ސަރުކާރުން އެކަށައަޅުއްވާފައިވާ ޕްލޭނަށް އިޝާރާތް ކުރައްވަމުން އެމަނިކުފާނު ވަނީ، ގަސްގަނޑު ފިނޮޅުގައި ޓޫރިސްޓު ރިސޯޓެއް ތަރައްގީ ކުރުމުގެ މަޝްރޫއުގެ އިތުރުންވެސް، އެ އަތޮޅުގައި ފަތުރުވެރިކަމާ ގުޅުންހުރި މަސައްކަތްތައް އެކި މަރުހަލާތަކުގައި ކުރައްވަމުން ގެންދަވާކަމުގެ ޔަގީންކަން ދެއްވާފައެވެ.
މި ރަސްމިއްޔާތުގައި ގަމުގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދެވަނަ ފިޔަވަހީގެ އެއްބަސްވުމާއި، ގަން ރީޖަނަލް ހޮސްޕިޓަލް ޓަރޝަރީ ފެންވަރަށް ތަރައްގީކުރުމުގެ މަޝްރޫއުގެ އެއްބަސްވުމާއި، ގަމުގައި ސްޕޯޓްސް ކޮމްޕްލެކްސް ގާއިމުކުރެއްވުމުގެ މަޝްރޫއުގެ އެއްބަސްވުމާއި، ގަމުގެ އުތުރު ފަރާތުގައި ގާއިމުކުރާ އައު ބަނދަރު މަޝްރޫއުގެ އެއްބަސްވުމުގައި ވަނީ ސޮއި ކުރައްވާފައެވެ. އަދި ދާދި އަވަހަށް، ރަށުގައި ޕަބްލިކް ވަރކްސް ޔުނިޓެއް ގާއިމުކުރައްވައި، ކުރިއަށް އޮތް ފަސް މަސްދުވަހުގެ ތެރޭގައި މުޅި އަތޮޅަށް އާރް.ޓީ.އެލް ޚިދުމަތް ފުޅާވެގެން ދާނޭ ކަމަށް ރައީސް ވަނީ ވިދާޅުވެފައެވެ.
ރަށުގައި އިސްލާމީ މަރުކަޒެއް ގާއިމުކުރެއްވުމާއި، ސްކޫލަށް ބޭނުންވާ ބިނާރުގެ މަސައްކަތް އަންނަ އަހަރުގެ ބަޖެޓުގައި ހިމެނިގެން ކުރިއަށް ގެންދަވާނޭ ކަމަށް ވެސް އެރަށުގެ ރައްޔިތުންނާ މުޚާތަބު ކުރައްވާ ދެއްކެވި ވާހަކަފުޅުގައި އެމަނިކުފާނު ވިދާޅުވިއެވެ.
