މި އަހަރު ނިމުމުގެ ކުރިން މާލޭގައި 3،000 ހައުސިން ޔުނިޓް އެޅުމުގެ މަޝްރޫއެއް ފަށާނެ ކަމަށް ރައީސް މުހައްމަދު މުއިއްޒު މިރޭ އިއުލާން ކުރައްވައިފި އެވެ.

ރައީސް މުއިއްޒު މި އިއުލާން ކުރެއްވީ ޕީއެންސީގެ ހަރުގޭގައި ބޭއްވުނު ޖަލްސާގައި ވާހަކަފުޅު ދައްކަވަމުންނެވެ.

ރައީސް މުއިއްޒު ވިދާޅުވި ގޮތުގައި މި 3،000 ހައުސިން ޔުނިޓްގެ މަޝްރޫއަކީ، އިންޑިއާގެ ލައިން އޮފް ކްރެޑިޓްގެ ދަށުން ގާއިމްކުރާ 4،000 ހައުސިން ޔުނިޓްގެ މަޝްރޫއުގެ އިތުރުން ފެށޭނެ އައު މަޝްރޫއެކެވެ.

އެހެންނަމަވެސް، އިންޑިއާގެ އެހީގައި ހިންގާ 4،000 ޔުނިޓްގެ މަޝްރޫއު ފެށޭނެ ވަކި ތާރީހެއް ރައީސް ހާމަކުރައްވާފައެއް ނުވެއެވެ.

އަލަށް އިއުލާންކުރެއްވި 3،000 ޔުނިޓްގެ މަޝްރޫއާ ގުޅޭ އިތުރު ތަފްސީލު ހާމަނުކުރައްވާ ނަމަވެސް، މި މަޝްރޫއު ފެށުމަށް ބޭނުންވާ އެންމެހާ ކަންކަން މިހާރު ނިމުމަކާ ހަމައަށް އަންނަމުންދާ ކަމަށް ރައީސް ފާހަގަކުރެއްވިއެވެ.

ރައީސް ވިދާޅުވީ ބޯހިޔާވަހިކަމުގެ ވައުދަކީ އެމަނިކުފާނުގެ އެންމެ މުހިންމު އެއް ވައުދު ކަމަށާއި ކުރީގެ ސަރުކާރުން ދޫކުރި ގޯތިތަކާއި ފްލެޓްތައް އެއްވެސް ބަދަލެއް ނުގެނެސް ހަވާލުކުރަމުން ގެންދަނީ ވައުދުވެވަޑައި ގޮތަށް ކަމަށެވެ.

މީގެ އިތުރުން މާލެ އާއި ރާއްޖޭގެ އެކި ކަންކޮޅުތަކުގައި އަލަށް ފަށާ މަޝްރޫއުތަކުން ވެސް ބޯހިޔާވަހިކަމުގެ މައްސަލައަށް ހައްލު ހޯދައިދޭނެ ކަމުގެ ޔަގީންކަން ރައީސް ދެއްވިއެވެ.

ރައީސް މުއިއްޒުގެ ވާހަކަފުޅުގައި، ބޯހިޔާވަހިކަމުގެ އިތުރުން އެހެނިހެން ދާއިރާތަކުން ވެވަޑައިގެންނެވި ވައުދުތައް ވެސް ފުއްދަވާނެ ކަމަށް އަލިއަޅުއްވައިލައްވައި، އެކަމުގެ ޔަގީންކަން ރައްޔިތުންނަށް ދެއްވިއެވެ.

ރައީސް މިފަދައިން ވިދާޅުވިއިރު، އެމަނިކުފާނުގެ ސަރުކާރަށް ދެ އަހަރު ވާން ދާއިރު، މިހާތަނަށް ބޯހިޔާވަހިކަމުގެ އެއްވެސް މަޝްރޫއެއް ހިންގާފައެއް ނުވެއެވެ.