ޔޯގާ ހަމަނުޖެހުން: ވަކީލަކު ހަމަޖައްސަން 10 ދުވަސް، ތުހުމަތުކުރެވޭ ބައެއް މީހުން އެދެނީ މައްސަލަ ލައިވްކުރުމަށް
މި މައްސަލައިގައި އުފުލާފައިވާ ދައުވާ ކުރުމަށް ފޮނުވާފައި ވަނީ 02 އޮކްޓޫބަރު 2022 ދުވަހު
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ހަރަކާތުގެ ތެރެއިން ހިންގި ހަމަނުޖެހުން
މި އަހަރުގެ ޖޫން މަހު ބައިނަލްއަގުވާމީ ޔޯގާ ދުވަހުގެ ހަރަކާތާ ދެކޮޅަށް ގަލޮޅު ދަނޑުގައި ބޭއްވި އެއްވުމުގެ ބައިވެރިން ގަލޮޅު ދަނޑަށް ވަދެ، ޓެރަރިޒަމްގެ އަމަލު ހިންގާފައިވާކަމަށް ތުހުމަތުކޮށް ދައުވާކުރި މީހުންނަށް ވަކީލަކު ހަމަޖައްސަން 10 ދުވަހުގެ ފުރުސަތު ދީފިއެވެ.
އަންގާރަ ދުވަހު އޮތް، ހައްގުތައް ކަށަވަރުކޮށްދިނުމުގެ މަޖިލީހުގައި މި މައްސަލަ ބައްލަވާ ގާޒީ ވަނީ ދައުވާ ލިބޭ ފަރާތްތަކަށް އެ ފަރާތްތަކަށް ލިބޭ ހައްގުތައް ސާފުކޮށްދެއްވާފައެވެ. މި މައްސަލައިގައި އުފުލާފައިވާ ދައުވާ ކުރުމަށް ފޮނުވާފައި ވަނީ 2 އޮކްޓޫބަރު 2022 ދުވަހުއެވެ. މި މައްސަަލައިގައި ހިމެނޭ އެއް ފަރާތުން ވަނީ ދައުލަތުގެ ފަރާތުން ވަކީލަކު ހަމަޖައްސައިދިނުމަށް އެދިފައެވެ. އަދި ވަކީލަކު ހަމަޖެއްސުމަށް 30 ދުވަހުގެ މުއްދަތެއް ދިނުމަށް އެންމެންވެސް އެދުނެވެ. އެހެންނަމަވެސް ގާޒީ ނިންމެވީ ވަކީލަކު ހަމަޖައްސަން 10 ދުވަހުގެ މުއްދަތެއް ދިނުމަށެވެ
މި މައްސަލައާ ގުޅިގެން ށ. މިލަންދޫ، ނާޒް، ފަޟްލޫން މުޙައްމަދާއި، ލ. މާމެންދޫ، ސޯސަންވިލާ، އާދަމް ނިޝާންގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ކުށުގެ ދައުވާއެވެ. އޭގެ އިތުރުން، ޓެރަރިޒަމްގެ އަމަލެއް ކުރުމުގެ ކުށުގެ ދައުވާ 7 މީހެއްގެ މައްޗަށް ވަނީ އުފުލާފައެވެ. އެ ދައުވާ އުފުލާފައިވާ މީހުންގެ ތެރޭގައި ހިމެނެނީ މއ. ކަނުހުރާ، މުޙައްމަދު ޛިލިއަން އާއި، ތ. ތިމަރަފުށި، ނަރުގިސްވިލާ، ޢަބްދުالله ރިފާޢު، ނ. މިލަދޫ، ކާރނޭޝަންމާގެ، އަބޫބަކުރު ފާރިޢު، ރ. ކަނދޮޅުދޫ، އަލަމާގެ، އަޙްމަދު އަކްސަމް، ގއ. މާމެންދޫ، އަސްރަފީވިލާ، އަޙްމަދު ނަޞޫޙު، މ. ކުދެހިގެ، ޙަސަން ޝިފާޒު އަދި ފ. ދަރަނބޫދޫ، އާބާދީގުލްޝަން، ޝަބިމް އާދަމްގެ މައްޗަށެވެ. އެ ކުށް ސާބިތުވެއްޖެނަމަ 20 އަހަރާ 25 އަހަރާ ދެމެދުގެ މުއްދަތަކަށް ޖަލަށްލާނެއެވެ.
މި މައްސަލައާ ގުޅިގެން، ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ކުށުގެދައުވާ އުފުލާފައިވަނީ 7 މީހުންގެ މައްޗަށެވެ. އެއީ ހއ. ހޯރަފުށި، ޔާގޫތުގެ، މުޙައްމަދު އިސްމާޢީލް، ގ. ފީނިކްސް، ޢަބްދުالله ނިޔާޒު، ތ. ތިމަރަފުށި، ޢަލީއާބާދު، ޢަލީ މުޙައްމަދު، ނ. ވެލިދޫ، މިލާނޯ، އިބްރާހީމް ޒިހާން، ލ. މުންޑޫ، އަންނާރުމާގެ، މުޙައްމަދު ޝާން، ހދ. ކުޅުދުއްފުށި، ބާބޫގެ، ޙުސައިން ޢަލީ އަދި މ. ފަޅުމަތީގެ، އަޙްމަދު ޢަލީއެވެ.
ހަމައެހެންމެ ތ. ތިމަރަފުށި، ނަރުގިސްވިލާ، ޢަބްދުﷲ ރިފާޢުގެ މައްޗަށް މި މައްސަލައިގައި ވަނީ، ޓެރަރިސްޓް ޖަމާއަތަކަށް ތާއީދުކުރާ މީހެއްކަން ދޭހަވާފަދަ ލިޔުމެއް ގެންގުޅުމުގެ ކުށުގެ ދައުވާ އުފުލާފައެވެ. މި ދައުވާ ސާބިތުވެއްޖެނަމަ އަންނާނެ އަދަބަކީ 1 އަހަރާ 3 އަހަރާ ދެމެދުގެ މުއްދަތަކަށް ޖަލަށް ލުމެވެ.
މީގެ އިތުރުން ޔޯގާ ހަރަކާތުގައި ހަތިޔާރެއް ބޭނުންކޮށްގެން މާރާމާރީ ހިންގިކަމުގެ ތުހުމަތުގައި ފ. ދަރަނބޫދޫ، އާބާދީގުލްޝަން، ޝަބިމް އާދަމްގެ މައްޗަށް ވަނީ ދައުވާ އުފުލާފައެވެ. އަދި ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ 9 ވަނަ މާއްދާގެ (ހ) ގެ ދަށުން އުފުލާފައިވާ މި ދައުވާ ސާބިތުވެއްޖެނަމަ އަންނާނެ އަދަބަކީ 7 އަހަރާ 10 އަހަރާ ދެމެދުގެ މުއްދަތަކަށް ޖަލަށްލުމެވެ.
އޭގެ އިތުރުން، ތ. ތިމަރަފުށި، ނަރުގިސްވިލާ، ޢަބްދުﷲ ރިފާޢުއާއި، ރ. ކަނދޮޅުދޫ، އަލަމާގެ، އަޙްމަދު އަކްސަމްގެ އިތުރުން، މ. ކުދެހިގެ، ޙަސަން ޝިފާޒުގެ މައްޗަށް ވަނީ އެ ގާނޫނުގެ 9 ވަނަ މާއްދާގެ (ހ) އާއި (ނ) ގެ ދަށުން، ހަތިޔާރެއް ބޭނުންކޮށްގެން މާރާމާރީ ހިންގުމުގެ ދައުވާ އުފުލާފައެވެ. އެ ދައުވާ ސާބިތުވެއްޖެނަމަ އަންނާނީ 3 އަހަރާ 5 އަހަރާ ދެމެދުގެ މުއްދަތެއްގެ ޖަލު ހުކުމެކެވެ.
މި މައްސަލައާ ގުޅިގެން، ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ކުށުގެ ދައުވާ 15 މީހެއްގެ މައްޗަށް އުފުލާފައިވެއެވެ. ހަމައެއާއެކު، ހއ. ހޯރަފުށި، ޔާގޫތުގެ، މުޙައްމަދު އިސްމާޢީލާއި، މއ. ކަނުހުރާ، މުޙައްމަދު ޛިލިއަންގެ މައްޗަށްވެސް ވަނީ ޢަދުލު އިންސާފު ގާއިމުކުރުމަށް ހުރަސްއެޅުމުގެ ކުށުގެ ދައުވާ އުފުލާފައެވެ.
މި މައްސަލައިގައި މުޙައްމަދު އިސްމާޢީލްގެ ފަރާތުން ވަނީ މި މައްސަލައިގެ ޝަރީއަތް ލައިވްކޮށްދިނުމަށް އެދިފައެވެ. އަދި އިތުރު ދެ ފަރާތަކުންވެސް ވަނީ އެގޮތަށް އެދިފައެވެ. މައްސަލަ ބައްލަވާ ގާޒީ ވިދާޅުވީ މިހާރުވެސް މި މައްސަލަ ކުރިއަށް ގެންދަނީ ހުޅުވާލައިގެންކަމަށާއި މިއީ ސިއްރު ބައްދަލުުވުމެއް ނޫންކަމަށެވެ.
މީގެ އިތުރުން މައްސަލައިގެ ލިޔެކިޔުން ލިބުނުނަމަވެސް ހައްޔަރުކޮށްފައި ތިބި މުއްދަތުގައި، ހައްޔަރުކޮށްފައި ތިބި މީހުންނަށް ލިބޭ ހައްގުތައް ސާފުކޮށް ބުނެދީފައި ނުވާކަމަށް އެ ފަރާތްތަކުން ވަނީ ބުނެފައެވެ. އަދި ލިޔެކިޔުންތައް ހަވާލުކުރި ސީޑީތައް ބެލޭނެ އިންތިޒާމެއް ނެތުމާއި ސީޑީތަކުގައި މައްސަލަ ހުރިކަމުގެ ޝަކުވާވެސް އެ ފަރާތްތަކުންް ވަނީ އުފުލާފައެވެ. އެކަމަށް ޖަވާބުދެމުން ދައުލަތުން ބުނީ މި މައްސަލައިގައި ލިޔެކިޔުމެއް ނުލިބި ވާނަމަ ކޯޓުމެދުވެރިކޮށް އެކަން ދައުލަތުގެ ސަމާލުކަމަށް ގެނައުމުން އެކަމަށް ހައްލު ހޯދައިދޭނެކަމަށެވެ.
