ކުރިއަކަށް ފަހު ކުރިއެއް: މުޅި ބަޣުދާދު ފެހި ކުރުމުގައި ފަރުދީ އޭޖެންޓެއް!

ޢިރާޤުގެ ވެރިރަށް ބަޣުދާދުގެ ކާރޫބާރޫ ބޮޑު މަގުތަކުންލާފައި ކުރިއަށް ދިޔަ އިރު، ރިއަލް އެސްޓޭޓް އޭޖެންޓު އަދި ގަސް އިންދާ ހެއްދުމަށް ލޯބިކުރާ ޔަހިއާ ޝާކިރު ރަޙީމްގެ ނަޒަރު ހުއްޓެމުން ދިޔައީ، ކޮންމެ ހަފުތާއަކުވެސް އޭނާ ކުރިއަށް ގެންދާ ގަސް އިންދުމުގެ ޕްރޮގްރާމްގެ މި ހަފުތާގެ މަޝްރޫޢުގައި ގަސް އިންދާނެ ސަރަޙައްދުތަކަށެވެ. އޭރުވެސް، މަގުގެ އެކި ހިސާބުތަކުގައި ކުދިކުދި ގަސްތައް ރޯކުރަން ޖަހާފައި ހުރި މަންޒަރު ފެނެއެވެ.

މިހާރު އުމުރުން 63 އަހަރު ފުރިފައިވާ ރަހީމު، އޭނާ ދިރިއުޅެމުންދާ އަވަށް ފެހި ކުރުމުގެ މަސައްކަތް ފެށީ 1980ގެ އަހަރުތަކުގެ ތެރޭގައެވެ. އޭގެ ފަހުން މިވީހާ ދުވަހު، އޭނާ ވަނީ ގުނާ އަދަދު ނުކުރެވޭހާ ގިނަ ގަސް އިންދާފައެވެ. މަގުތަކުގެ އެއް ފަރާތެއްގައެވެ. ސްކޫލްތަކާއި ހޮސްޕިޓަލުތަކުގެ ކައިރީގައެވެ. އަދި އާންމުންނަށް ވަދެވޭ ގޮތަށް ތަރައްޤީކޮށްފައިވާ ކުދި ބަގީޗާތަކުގައެވެ. އެ ހުރިހާ ކަމެއްވެސް އޭނާ ކުރަނީ އަމިއްލަ ޚަރަދުގައެވެ.

ހިރަފުހާއި ވެލީގެ ތޫފާންތަކަކީ ބަހާރު މޫސުމާއި ހޫނު މޫސުމުގެ ކުރީކޮޅު، ޢިރާޤަށް އާންމު ކަމެކެވެ. ގިނަ ބަޔަކަށް ހޮސްޕިޓަލުގައި ފަރުވާ ދޭން ޖެހޭއިރު، ބަޣުދާދު އިންޓަނޭޝަނަލް އެއަރޕޯޓްގެ އުދުހުންތައްވެސް ހުއްޓުމަކަށް ގެންނަން ޖެހޭ ހާލަތްތަކާ ކުރިމަތިވެފައި އެބަހުއްޓެވެ.

އދއިން ބުނެފައިވާ ގޮތުގައި، މޫސުމީ ނޭދެވޭ ބަދަލުތަކުގެ ކާރިޘީ ހިރާސް އެންމެ ބޮޑު، ނާޒުކު ޤައުމުތަކުގެ ލިސްޓުގައި 5 ވަނައަށް އޮތީ ޢިރާޤެވެ.

ފެން ލިބުން ދަތިވުމާއި އިންތިހާ ގަދަ ހޫނުގެ ސަބަބުން، ދަނޑުބިންތައް ދަނީ ހަނަފަސްވަމުންނެވެ. ނަތީޖާއެއްގެ ގޮތުން، ހޫނު މޫސުމުގެ ދުވަސްވަރު، ޢިރާޤުގެ ބޮޑު ސަރަޙައްދެއްގައި ދިރިއުޅުމަށްވެސް ވަނީ ދަތިވެފައެވެ.

ފާއިތުވީ އަހަރުތަކަށް ބަލާއިރު، ބަޣުދާދުން ގަސްތައް މަދުވެފައި ވަނީ، ތަރައްޤީގެ މަޝްރޫއުތަކުގެ ސަބަބުންނެވެ.

ރަޙީމް ކުރަމުންދާ މަސައްކަތްތަކަށް، މިއަދު އާންމުންގެ އެއްބާރުލުންވެސް ލިބެއެވެ.

ކޮންމެ ގޮތަކަށް ކަން އޮތް ކަމުގައި ވީ ނަމަވެސް، ކުރިއަކަށް ފަހު ކުރިއެއް ޖަހަމުން ރަޙީމް އެދަނީ، ބަޣުދާދު ފެހި ކުރުމަށް ޢިރާޤުގެ ކަމާ ބެހޭ ފަރާތްތަކުން ކުރަމުންދާ މަސައްކަތުގައި، އޭނާއަށްވެސް ވެވުނު ގޮތަކުން ބައިވެރިވަމުންނެވެ. ފަރުދެއްގެ ހައިސިއްޔަތުން، ކޮނޑުގައި އެޅިފައި އޮތް ޤައުމީ ވާޖިބު، ޒިންމާދާރު ކަމާއެކު އަދާ ކުރަމުންނެވެ.