އާޖެންޓީނާގެ ސަޕޯޓަރެއް ވޯލްޑް ކަޕް ބެލުމަށް 6 މަސް ކުރިން ގަތަރަށް

މިއަންނަ މަހު ގަތަރުގައި ފަށާ ވޯލްޑް ކަޕް ބެލުމަށް އާޖެންޓީނާގެ ސަޕޯޓަރެއް މުބާރާތް ފެށުމުގެ ހަ މަސް ކުރިން ގަތަރަށް ދަތުރުކޮށްފިއެވެ.

މުބާރާތް ފެށުމުގެ ހަ މަސް ކުރިން ގަތަރަށް ދަތުރުކުރީ އާޖެންޓީނާގެ މާސެލޯ މާޓިނޭޒް ކިޔާ މީހެކެވެ. ވޯލްޑް ކަޕް ބެލުމަށް އެންމެ އަވަހަށް ގަތަރަށް ދަތުރުކުރި މި ސަޕޯޓަރު ވަނީ މިއަހަރުގެ މޭ މަހުގެ ތިން ވަނަ ދުވަހު ގަތަރުގެ ދޯހާއަށް ދަތުރުކޮށްފައެވެ. ހުދާއި ނޫކުލައިގެ ވިގެއް އަޅައިގެން އާޖެންޓީނާ އަށް އޮތް ސަޕޯޓު ދައްކާ މި ލޯޔަރަކީ މުބާރާތް ބެލުމަށް އެންމެ ފުރަތަމަ ގަތަރަށް ދަތުރުކުރި ސަޕޯޓަރެވެ.

އުމުރުން 54 އަހަރުގެ މާޓިނޭޒް ރޮއިޓާސްއަށް ދިން އިންޓަރވިއުއެއްގައި ބުނީ ގަތަރުގެ ގިނަ ބަޔަކު އާޖެންޓީނާގެ ތަރި ލިއޮނެލް މެސީއަށް ސަޕޯޓުކުރާ ކަމަށެވެ. ގެސްޓު ހައުސްގެ ދޮރުމަތީގައި އާޖެންޓީނާގެ ދިދައެއް ހިފައިގެން މާޓިނޭޒް ހުއްޓާ ގަތަރުގެ މީހަކު އޭނާގެ ގޭގައި މާޓިނޭޒް ބެހެއްޓުމަށް އެދުނުކަމަށް މާޓިނޭޒް ބުންޏެވެ. އަދި އެގޭގައި މާޓިނޭޒް ވަނީ ތިން މަސް ދުވަހު މަޑުކޮށްފައެވެ.

މާޓިނޭޒްގެ އުންމީދަކީ މިފަހަރުގެ ވޯލްޑް ކަޕްގައި އާޖެންޓީނާގެ ކެޕްޓަން މެސީ މުބާރާތުގެ ޗެމްޕިއަން ތަށި އުފުލާލުމެވެ. މިއީ ވޯލްޑް ކަޕްގައި މެސީ ކުޅޭނެ ފަސް ވަނަ ފަހަރެވެ. އަދި އޭނާގެ އެންމެ ފަހު ވޯލްޑް ކަޕްވެސްމެއެވެ.

މިފަހަރުގެ މުބާރާތުގައި އާޖެންޓީނާ ލައްވާލާފައި އޮތީ ސައޫދީ އަރަބިއްޔާ، މެކްސިކޯ އަދި ޕޮލެންޑާ އެކު ގްރޫޕް ސީ ގައެވެ.