ދިވެހިބަހުން ވާހަކަދައްކާ ފުރަތަމަ ވަރޗުއަލް އެސިސްޓެންޓް އުރީދޫ އިން ތައާރަފު ކޮށްފި

އުރީދޫ މޯލްޑިވްސް އިން އާޓިފިޝަލް އިންޓެލިޖެންސް (އޭއައި) މެދުވެރިކޮށް ރާއްޖޭގައި ފުރަތަމަ ފަހަރަށް ދިވެހި ބަހުން ވާހަކަދައްކާ ވަރޗުއަލް އެސިސްޓެންޓެއް ތައާރަފު ކޮށްފިއެވެ.

"އެވީ" ގެ ނަމުން ނަން ދީފައިވާ މި އެސިސްޓެންޓް ތައާރަފު ކޮށްދެއްވީ މިނިސްޓަރ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތުގެ ޝައުނާއެވެ. "އެވީ" މެދުވެރިކޮށް، ކަސްޓަމަރުންނަށް ފުރިހަމަ ހިދުމަތްތަކެއް ފޯރުކޮށްދީ، މިހާރަށް ވުރެ ހުރިހާ އުމުރުފުރައެއްގެ އެކިކަހަލަ ކަސްޓަމަރުންނަށްވެސް ހިދުމަތްތައް ހޯދުމުގައި ޓެކްނޮލޮޖީގެ އެހީގައި ލުއިގޮތްތައް ފޯރުކޮށްދެވޭނެ ކަމަށް އުރީދޫ އިން ބުންޏެވެ.

Advertisement

އުރީދޫގެ ޑިޖިޓަލް އެސިސްޓެންޓް، އެވީ މެދުވެރިކޮށް މޯބައިލް ކަސްޓަމަރުންނަށް ކަސްޓަމަރ ކެއާ އެޖެންޓަކާ ވާހަކަ ދެއްކުމަށް ކޯލްގައި ވަގުތު ހޭދަ ނުކޮށް ޑޭޓާ އާއި އެސްއެމްއެސް އާއި ވޮއިސް އަދި ބިލް ބެލެންސް ފަސޭހަކަމާއެކު ބަލާލެވޭނެއެވެ. 929 އައިވީއާރު، ފޭސްބުކް މެސެންޖާ އަދި ވައިބާ ޕްލެޓްފޯމް މެދުވެރިކޮށް ފަސޭހަކަމާއެކު މި ހިދުމަތް ހޯދުމަށް މިހާރު ހުޅުވަލާފައިވާއިރު، އެހެން ބޮޓުތަކެކޭ އެއްފަދައިން އެވީވެސް މިވަގުތު ހުރީ ދިވެހި ބަހުން ކަސްޓަމަރުންނާ މުއާމަލާތްކުރުމުގެ އުނގެނުމުގެ މަރުހަލާގައި ކަމަށް އުރީދޫ އިން ބުންޏެވެ. މެޝިން ލަރނިންގ މެދުވެރިކޮށް އެވީ ހިދުމަތް އިތުރަށް ރަނގަޅުކޮށް ކުރިއަށް އޮތް ތަނުގައި ކަސްޓަމަރުންނަށް ލިބޭ ޚިދުމަތްތައް ފުޅާވެގެންދާނެ ކަމަށް ވެސް އުރީދޫ އިން ބުންޏެވެ.

ކަސްޓަމަރުންގެ ޑިޖިޓަލް ތަޖުރިބާއަށް އިންގިލާބީ ބަދަލެއް ގެނައުމަށް އުރީދޫ މޯލްޑިވްސްއިން ކުރަމުންދާ މަސައްކަތްތަކުގެ ދަށުން ޑިޖިޓަލް ކެއަރ އެސިސްޓެންޓް "އެވީ" އަށް އިތުރަށް އިންވެސްޓްކޮށް، ޚިދުމަތް އިތުރަށް ތަރައްގީކޮށް، ޑިޖިޓަލް ޗެނަލްތަކުގައި ކަސްޓަމަރުންގެ މެދުގައި އޮންނަ މުއާމަލާތްތައް ބަދަލުކުރުމަށް ކުރިއަށް އޮތްތަނުގައިވެސް ގިނަ މަސައްކަތްތަކެއް ކުރެވިގެންދާނެ ކަމަށާއި އެވީ ބޭނުންކޮށްގެން އުރީދޫއިން ކަސްޓަމަރުން ހޯދަން ބޭނުންވާ ހުރިހާ މައުލޫމާތާއި ހިދުމަތްތައް ފޯރުކޮށްދިނުން އޮޓޮމޭޓްކޮށް، މިހާރަށްވުރެ ހަރުދަނާ އަދި ހަލުވި ހިދުމަތެއް ފޯރުކޮށްދެވޭނެ ކަމުގެ ޔަގީންކަން ވެސް އުރީދޫ އިން ދެއެވެ.

ހޯމަ ދުވަހު އުރީދޫއިން ބޭއްވި ރަސްމިއްޔާތު ޝަރަފުވެރިކޮށްދެއްވައި މިނިސްޓަރު ޝައުނާ ވިދާޅުވީ ދިވެހި ބަހުން އެފަދަ ޚިދުމަތެއް ތައާރަފު ކުރުމަކީ ލިބޭ ވަރަށް ބޮޑު އުފަލެއް ކަމަށެވެ. ޓެކްނޮލޮޖީއަކީ އެއާނުލައި ނޫޅެވޭނެ އެއްޗެއްކަމަށްވާއިރު ދިވެހި ބަހުން ވާހަކަދައްކާ އެސިސްޓެންޓެއް އުރީދޫއިން ތައާރަފު ކުރުމަކީ ރާއްޖެއަށްވެސް ލިބުނު ކުރިއެރުމެއް ކަމަށް މިނިސްޓަރު ފާހަގަކުރެއްވިއެވެ.

ޓެކްނޮލޮޖީ ދާއިރާ ކުރިއަރުވަން އާޓިފިޝަލް އިންޓެލިޖެންސަކީ މުހިންމު ދާއިރާއެއްކަން ފާހަގަކުރައްވައި ޝައުނާ ވިދާޅުވީ އުރީދޫ އިން ތައާރަދު ކުރި ޚިދުމަތަކީ ދާއިރާ ކުރިއެރުވުމަށް ވެސް ވަރަށް މުހިންމު ފިޔަވަޅެއް ކަމަށެވެ.

އުރީދޫ ބްރޭންޑުގެ އާ ވިޝުއަލް އައިޑެންޓިޓީ އާއި އެއްގޮތްވާ ގޮތުގެ މަތިން އުރީދޫ މޯލްޑިވްސް އިން ވަނީ އެ ކުންފުނީގެ މުޅިން އާ ދިވެހި ފޮންޓް ވެސް ރަސްމީކޮށް ތައާރަފްކޮށްފަ އެވެ. މި ޚިދުމަތް ތައާރަފު ކޮށްދެއްވީ ހެރިޓޭޖް މިނިސްޓަރު ޔުމްނާ މައުމޫނެވެ.

މިނިސްޓަރު ޔުމްނާ ވިދާޅުވީ ޤައުމުތަކުގެ އަމިއްލަ ބަސްތައް ބޭނުން ކުރުން މަދުވުމުގެ ސަބަބުން އެ ބަސްތައް ގެއްލުމުގެ ބިރު އޮތްއިރު އެކަމަށް އޮތް ހައްލަކީ ޓެކްނޮލޮޖީއާއި ބަހާ ރައްޓެހި ކުރުވުން ކަމަށެވެ. އަދި އުރީދޫ އިން ތައާރަފު ކުރި ޚިދުމަތާއެކު ޓެކްނޮލޮޖީ ކުރިއަރުވާއިރު ދިވެހި ބަސް ބޭނުންކޮށްގެން ވެސް ކުރިއެރުވޭނެކަން ދައްކުވައިދީފައިވާކަމަށް މިނިސްޓަރު ވިދާޅުވިއެވެ.

"އަޕްގްރޭޑް ޔޯ ވޯލްޑް" ގެ ދަށުން ދާދި ފަހުން އޫރީދޫ މޯލްޑިވްސްގެ ބްރޭންޑް އައިޑެންޓިޓީއަށް ގެނައި ސްޓްރެޓެޖިކް ބަދަލުތަކަކީ އުރީދޫގެ ޝަހުސިއްޔަތާއި ޒަމާނީ ޓެކްނޮލޮޖީއާ އެއްގޮތަށް އެ ކުންފުނިން ކުރަމުން އަންނަ ދަތުރާއި ވިޔަފާރިއަށް އަންނަ ކުރިއެރުން ރަމްޒުކޮށްދޭ ކަމެކެވެ. މި ބަދަލުން ދައްކުވައިދެނީ ޓެކްނޮލޮޖީއާއެކު ހުޅުވިގެންދާ ފުރުސަތުތައް ތަނަވަސްކުރުމުގެ ވިސްނުމެވެ.