އިޓަލީގެ ފުރަތަމަ އަންހެން ބޮޑުވަޒީރު މަގާމުގެ ހުވާކުރައްވައިފި

އިޓަލީގެ ފުރަތަމަ އަންހެން ބޮޑުވަޒީރު، ޖިއޯރޖިއާ މެލަނީ މަގާމުގެ ހުވާ ކުރައްވައިފިއެވެ.

އެކަމަނާ މަގާމުގެ ހުވާ ކުރެއްވީ ހޮނިހިރު ދުވަހުއެވެ. މިއީ ދެވަނަ ބޮޑު ހަނގުރާމައަށްފަހު އިޓަލީގެ ފުރަތަމަ ރައިޓް ވިންގު ސަރުކާރެވެ.

މެލަނީ އަކީ އިޓަލީގެ ބްރަދަރސް އޮފް އިޓަލީގެ ލީޑަރެވެ. އެކަމަނާ ބޮޑުވަޒީރު ކަމުގެ މަގާމަށް ވަޑައިގެންނެވީ މިދިޔަ މަހު ބޭއްވި އާއްމު އިންތިޚާބު ކާމިޔާބު ކުރައްވައިގެންނެވެ. މި އިންތިޚާބު އެ ޕާޓީން ކާމިޔާބު ކުރީ އިތުރު ޕާޓީއަކާ އެކު ކޯލިޝަން ހަދައިގެންނެވެ.

މެލަނީގެ ސަރުކާރު އެކުލަވާލާފައިވަނީ އިޓަލީގެ އިގްތިސާދަށް ކުރިއަށް އޮތްތަނުގައި ގޮންޖެހުންތައް ދިމާވާނެކަމަށް ލަފާކޮށްފައި ވަނިކޮށެވެ. އެގޮތުން، ރިސެޝަނަކަށް ޤައުމުގެ އިގްިތސާދު ދިއުމުގެ ފުރުސަތު ބޮޑުވުމާއި ހަކަތައިގެ އަގު ބޮޑުވުން ހިމެނެއެވެ.

އިޓަލީގެ އައު ސަރުކާރު އެކުލަވާލާފައިވާއިރު މެލަނީ ވަނީ ކެބިނެޓުގެ ދިހަ މިނިސްޓްރީއެއް އެކަމަނާގެ ކޯލިޝަންގެ ޕާޓީތައް ކަމުގައިވާ ލީގާއި ފޯރޒާ އިޓާލިއާއަށް ދެއްވާފައެވެ. ބާކީ ހުރި ނުވަ މިނިިސްޓްރީއަށް ބޭފުޅުން އައްޔަން ކުރެއްވީ އެކަމަނާގެ އަމިއްލަ ޕާޓީންނެވެ.

އިޓަލީގެ ދަ ބްރަދަރސް އޮފް އިޓަލީ ޕާޓީއަކީ ދެވަނަ ބޮޑު ހަނގުރާމައަށްފަހު ހިޓްލަރ އަށް ތާއީދު ކުރަމުން އައި "ނޮން ފޭޝިސްޓް" ގްރޫޕެއްގެ ތެރެއިން އުފެދުނު ޕާޓީއެކެވެ. ނަމަވެސް މެލަނީ ވިދާޅުވާ ގޮތުގައި އެ ވިސްނުމަކީ މިހާރު ޕާޓީގެ ވިސްނުމެއް ނޫނެވެ.