ސްކޫލް ދައުރުގައި ލީޑަރޝިޕް ފުރުސަތުތައް ދޭނަމަ ދިރިއުޅުމުގައި ދިމާވާ ކުދިކުދި ކަންތައްތައް ހައްލު ކުރަން ދަސްވާނެ: ބަޝީރާ
ސްކޫލް ކުދިންނަށް ލީޑަރޝިޕް ޕްރޮގްރާމްތައް ހިންގުމަކީ ވަރަށް މުހިންމު ކަމެއް
ތާޖުއްދީން ސްކޫލްގެ ޕްރިންސިޕަލް ބަޝީރާ މުޙައްމަދު
ސްކޫލް ދައުރުގައި ދަރިވަރުންނަށް ލީޑަރޝިޕް ފުރުސަތުތައް ދޭނަމަ އެ ކުދިންނަށް އަމިއްލަ ދިރިއުޅުމުގައި ދިމާވާ ކުދިކުދި ކަންތައްތައް ހައްލު ކުރަން ދަސްވާނެ ކަމަށް ތާޖުއްދީން ސްކޫލްގެ ޕްރިންސިޕަލް ބަޝިރާ މުޙައްމަދު ވިދާޅުވެއްޖެއެވެ.
ރާއްޖެ ޓީވީގެ "ފަލަސުރުޚީ" ގައި ވާހަކަދައްކަވަމުން ބަޝީރާ ވިދާޅުވީ ސްކޫލް ކުދިންނަށް ލީޑަރޝިޕް ޕްރޮގްރާމްތައް ހިންގުމަކީ ވަރަށް މުހިންމު ކަމެއް ކަމަށެވެ. އެގޮތުން، ސްކޫލް ދައުރަކީ ކުދިންގެ ދިރިއުޅުން ބައްޓަން ކުރަން ލިބޭ ފުރުސަތެއް ކަމަށްވާއިރު ލީޑަރޝިޕް ޕްރޮގްރާމްތަކުން ލިބޭ ތަމްރީންތަކުން ކުދިންގެ ހުނަރުތައް ތަރައްގީވެގެންދާނެ ކަމަށް އޭނާ ވިދާޅުވިއެވެ.
ބަޝީރާ ވިދާޅުވީ މިހާރުވެސް އެކި ސްކޫލްތަކުގައި ތަފާތު ނަން ނަމުގައި ލީޑަރޝިޕް ޕްރޮގްރާމްތައް ހިންގާ ކަމަށާއި ހޮނިހިރު ދުވަހު ރައީސް އޮފީހާއި އެޑިއުކޭޝަން މިނިސްޓްރީ ގުޅިގެން ތައާރަފު ކުރި "ދަ ލީޑަރ އިން މީ" ފަދަ ޤައުމީ ލެވެލްގެ ޕްރޮގްރާމެއް ފެށުމަކީ ސްކޫލްތަކުގައި ހިންގާ އެފަދަ ޕްރޮގްރާމްތަކަށް އިތުރުވި ބޮޅެއް ކަމަށެވެ. އަދި މިޕްރޮގްރާމުގެ ސަބަބުން ސްކޫލްތަކުގައި މިހާރު ހިންގާ ލީޑަރޝިޕް ޕްރޮގްރާމްތައް އިތުރަށް ތަރައްގީވާނެ ކަމަށް ގަބޫލު ކުރައްވާ ކަމަށް އޭނާ ވިދާޅުވިއެވެ.
ހޮނިރު ދުވަހު ސަރުކާރުން ފެށި "ދަ ލީޑަރ އިން މީ" ވެލިއު އެޑިއުކޭޝަނަލް ޕްރޮގްރާމަކީ ދަރިވަރުންގެ ގައިގައި ރިވެތި އަޚުލާގާއި ދިވެހި އިސްލާމީ މުޖުތަމައަށް ފައިދާހުރި ކުއްޖަކަށްވުމަށް ބޭނުންވާ އަގުތައް އަށަގެންނެވުމުގެ ބޭނުމުގައި ހިންގާ ޕްރޮގްރާމެކެވެ. އެގޮތުން، ޤައުމީ މަންހަޖުގައި މިހާރު ހިމެނިފައިވާ އަގުތައް ކުދިންގެ ގައިގައި އަށަގެންނެވުމަށް މި ޕްރޮގްރާމުގެ ޒަރީއާއިން ސްކޫލް ތެރޭގައި މަސައްކަތް ކުރެވިގެންދާނެ ކަމަށް އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އަހުމަދު މުޖާހިދު ވިދާޅުވިއެވެ.
މި ޕްރޮގްރާމް މިހާރު އަމާޒުކޮށްފައިވަނީ ރާއްޖޭގެ ސްކޫލްތަކުގެ ގްރޭޑް 9-12 ގެ ދަރިވަރުންނަށެވެ. ނަމަވެސް ކުރިއަށް އޮތްތާނގައި ކުދިންގެ އުމުރުފުރާތަކާ ގުޅޭ ގޮތަށް އެހެނިހެން ގްރޭޑްތަކަށް ވެސް މި ޕްރޮގްރާމް ކުރިއަށްގެންދަން އެޑިއުކޭޝަން މިނިސްޓްރީން ވަނީ ނިންމާފައެވެ. މި ޕްރޮގްރާމް ރާއްޖޭގެ ހުރިހާ ރަށެއްގައި ވެސް ކުރިއަށްގެންދަން ވަނީ ނިންމާފައެވެ.
