މަސްތުވާތަކެތި ބޭނުންކުރުމަކިީ ބައްޔެއް، ބޭނުންވަނީ ސިއްހީ ފަރުވާ: ޝަމާއު

މަސްތުވާތަކެތި ބޭނުން ކުރުމަކިީ ބައްޔެއްކަމަށާއި، ބޭނުން ވަނީ ސިއްހީ ފަރުވާކަމަށް ނޭޝަނަލް ޑްރަގް އެޖެންސީ (އެންޑީއޭ)ގެ ޗެއަރމަން ޝަމާއު ޝަރީފް ވިދާޅުވެއްޖެއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޝަމާއު ވިދާޅުވީ މިއީ ނަފްސާނީ މައްސަލައެއް ކަމަށާއި، އެ ފަދަ މީހުން ރަނގަޅުވާން އެންމެންގެ އެހީތެރިކަން ބޭނުންވާ ކަމަށެވެ. ޝަމާއު ވިދާޅުވީ ވަރަށް ގިނަ މީހުން ދެކޭ ގޮތުގައި މަސްތުވާތަކެތި ބޭނުން ކުރުމަކީ ހުއްޓުވޭނެ ކަމެއް ނޫން ކަމަށެވެ. އެހެންނަމަވެސް އެ ވިސްނުމަކީ ރަނގަޅު ވިސްނުމެއް ނޫންކަަމަށް ޝަމާއު ވަނީ ފާހަގަކުރައްވާފައެވެ. މަސްތުވާތަކެތި ބޭނުންކުރާ މީހުން އަނބުރާ މުޖުތަމައަށް ނެރުމުގެ މަރުހަލާއަކީ ވަގުތު ނަގާ މަރުހަލާއެއް ކަމަށާއި، ކޮންމެ މީހަކުވެސް ރަނގަޅު ވާން މަސައްކަތްކުރާ މަރުހަލާއަކީ ތަފާތު މަރުހަލާއެއްކަމަށް އޭނާ ވިދާޅުވިއެވެ. އެގޮތުން އެކި މީހުންނަށް ބޭނުން ވަނީ އެކި ކަހަލަ ފަރުވާކަން އޭނާ ވަނީ ފާހަގަކުރައްވާފައެވެ.

ރާއްޖޭގެ އާބާދީގެ 5 އިންސަައްތަ މީހުން މަސްތުވާތަކެތީގެ ވަބާގައި ޖެހިފައިވާއިރު، ފަރުވާ ހޯދަން އެދޭ މީހުން ވަރަށް ގިނަ ދުވަހު ފަރުވާ ނުލިބި ވެއިޓިންގ ލިސްޓުގައި މަޑުކުރަން ޖެހޭކަން އޭނާ ވަނީ ފާހަގަކުރައްވާފައެވެ. އެ ކަމަށް ހައްލު ހޯދައިދީ، ވަސީލަތްތައް އިތުރުކޮށް، ފަރުވާގެ ނިޒާމް ފުރިހަމަ ކުރަން އެންޑީއޭއިން ކެނޑިނޭޅި މަސައްކަތްކުރަމުންދާކަމަށް ޝަމާއު ވިދާޅުވިއެވެ. މަސްތުވާތަކެތި ބޭނުންކުރާ މީހުން އަނބުރާ މުޖުތަމައަށް ގެނެވޭނީ އެ މީހުންނަށް އޯގާތެރިވެގެން ކަމަށާއި، އެ މީހުން ބާކީކޮށްލާނަމަ މުޖުތަމައަށް ނުކުންނަން އުނދަނގޫވާކަމަށާއި، އެއީ އެފަދަ މީހުންނަށް ދިމާވަ ގޮންޖެހުމެއްކަމަށް ޝަމާއު ވިދާޅުވިއެވެ. ބޭނުންވާ އެހީތެރިކަން ލިބިއްޖެނަމަ ފަރުވާ ހޯދަން ނުގޮސްވެސް ރަނގަޅުވެވޭނެކަން އޭނާ ފާހަގަކުރެއްވިއެވެ.

މީގެ އިތުރުން އެންޑީއޭއަށް ބޭނުންވާ ފަންނީ މީހުން ނުލިބުމަކީ އެ އިދާރާގެ މަސައްކަތަށް ވަރަށް ބޮޑަށް ހުރަސްއެޅޭ ކަމެއްކަން އޭނާ ފާހަގަކުރެއްވިއެވެ. އެ ދާއިރާއިން ތައުލީމް ހާސިލްކުރާ މީހުން މަދުނުވިނަމަވެސް، އަމަލީ މައިދާނުގައި ހަރަކާތްތެރިވާ މީހުން މަދުކަަމަށް ޝަމާއު ވިދާޅުވިއެވެ. ޝަމާއު ވިދާޅުވީ އެކަމުގެ ސަބަބެއްކަމަށް ބެލެވެނީ މި މަސައްކަތަށް ނުކުންނަ މީހުންނަށް ލިބޭ އުޖޫރަ އިންތިހާއަށް މަދުވުންކަމަށެވެ. ސޯޝަލް ވޯރކަރުންނަށް ލިބޭ އުޖޫރަ ރަނގަޅުކުރުމަށް ވަރަށް އަަވަހަށް ރައްޔިތުންގެ މަޖިލީހަށް ބިލެއް ހުށަހަޅާނެ ކަމަށާއި، އެ މަސައްކަތް ނިމުމުން، މީހުން ނުލިބުމުގެ މައްސަލަ ހައްލުވާނެކަމަށް ބެލެވޭކަމަށް އޭނާ ވިދާޅުވިއެވެ.