ފްލޮޕީ ޑިސްކު ހަނދާން އެބަހުރިތަ؟ ހެކަރުންގެ ދުނިޔެއެއްގައި އަދިވެސް އެވަރެއް ނެތް!

މީގެ އެތައް އަހަރެއް ކުރިން އެ ޑިވައިސްއަކަށް ބަރޯސާވުން ދޫކޮށްލި 3.5 އިންޗީގެ ފްލޮޕީ ޑިސްކުގެ ޑިމާންޑް އަދިވެސް އެބަ އޮތް ކަމަށް ޤަބޫލު ކޮށްފާނަން ހެއްޔެވެ؟ އުމުރުން 70ގެ އަހަރުތައް ގުނަމުންދާ، އެމެރިކާގެ ރައްޔިތަކު ބުނާ ގޮތުގައި، އެއީ ފުޅާ ދާއިރާއެއްގައި އޭނާ މިއަދުވެސް ކުރަމުންދާ ވިޔަފާރިއެކެވެ. އެހެން ކަމުން، އޭނާއަކީ މިއަދު ފްލޮޕީ ޑިސްކުގެ އެންމެ ވަރުގަދަ ސަޕްލަޔަރު ކަމުގައިވެސް ދެންނެވިދާނެއެވެ.

އުމުރުން 73 އަހަރުގެ ޓޮމް ޕަރސްކީއަކީ ފްލޮޕީޑިސްކް ޑޮޓްކޮމް ގެ މޭސްތިރިއެވެ. އެމެރިކާގެ ކެލިފޯނިއާގެ ލޭކް ފޮރެސްޓްގައި މަރުކަޒު ކޮށްގެން، އޮންލައިން ޕްލެޓްފޯމެއްގައި އޭނާ ހިންގަމުން ދަނީ ފްލޮޕީ ޑިސްކް ރީސައިކަލް ކުރުމުގެ ވިޔަފާރިއެކެވެ. ބޭނުން ކޮށްފައި ހުންނަ ފްލޮޕީ ޑިސްކްއާއި ބޭނުން ނުކުރާ ފްލޮޕީ ޑިސްކް ބަލައިގަނެ، އިތުބާރު ހިފޭ ކަސްޓަމަރުންގެ ޕޫލަކަށް އޭނާ އެތަކެތި ވިއްކާލައެވެ.

ބަލާލި ކޮންމެ ދިމާއަކުންވެސް ފެންނަން ހުރީ ފްލޮޕީ ޑިސްކްއެވެ. އެކި ކުލަކުލައިގެ ފްލޮޕީ ޑިސްކްއެވެ. ބައެއް ފްލޮޕީތަކުގައި ލޭބަލް ކޮށްފައި ވާ އިރު، ލޭބަލެއް ނެތް ޑިސްކުތައްވެސް މަދެއް ނޫނެވެ. އެއީ ދުނިޔޭގެ އެކި ކަންކޮޅުތަކުން ޕަރސްކީއަށް ފޮނުވާފައިވާ ފްލޮޕީ ޑިސްކުތަކެވެ. އޭނާއަށް ލިބޭ ކޮންމެ ފްލޮޕީ ޑިސްކް ޝިޕްމަންޓަކީ، ޕަރސްކީއަށް ލިބޭ ބޮޑު އުފަލެކެވެ.

މި މަސައްކަތުގައި ޕަރސްކީ އުޅޭތާ މިހާރު އެތައް އަހަރެއް ވެއްޖެއެވެ. 1990ގެ އަހަރުތަކުގެ ތެރޭގަރި ޕަރސްކީ އެންމެ ފުރަތަމަ މަސައްކަތް ކުރީ ޓެކުހާ ބެހޭ ކުންފުންޏެއްގައި، ސޮފްޓްވެއަރ ޑިވަލޮޕްމަންޓްގެ ދާއިރާގައެވެ. އެ ކުންފުނީގެ ސޮފްޓްވެއަރ، ފްލޮޕީ ޑިސްކުތަކަށް އެޅުމަށްފަހު، އެކި ތަންތަނަށް ފޯރުކޮށްދެއެވެ. އައުޓްސޯސްކޮށްގެން އެކަން ކުރުމުގެ ބަދަލުގައި، ކުންފުންޏަށް އޭރު ފައިދާ ބޮޑުވީ، އިން-ހައުސްކޮށް އެކަން ކުރުމަށެވެ. ނަތީޖާއެއްގެ ގޮތުން، ޕަރސްކީގެ ހިތުގައި އެކަމަށް މާ ބޮޑު ލޯތްބެއް ޖެހުނީއެވެ. ކުންފުނިން އެ މަސައްކަތް ހުއްޓާލި ހިސާބުން، ލަގަނުގައި ދެން ހިފީ ޕަރސްކީއެވެ.

މިހާ ހިސާބުން އުފެދޭ ސުވާލަކީ، އިންޓަރނެޓްއާއި ކްލައުޑްތަކާއެކު ސީޑީ-ރޮމްއާއި، ޑީވީޑީ އަދި ޔޫއެސްބީ ފްލޭޝް ޑްރައިވްތައް އަރުޝީފުތަކަށް ލާފައި ވާ 2022 ވަނަ އަހަރު، އެހާ ގިނަ ޢަދަދަކަށް ފްލޮޕީ ޑިސްކު ގަންނަނީ ކޮން ބައެއްތޯ ހިތާ ހިތާ ކުރެވޭ ސުވާލެވެ. އެ ސުވާލަށް ޕަރސްކީ ދެނީ އަވަސް ޖަވާބެކެވެ.

ކަމުގެ ޙަޤީޤަތް އޮންނަ ގޮތް ނޭނގުމަކީ، ފްލޮޕީ ޑިސްކަށް އަދުގެ ދުނިޔޭގައި އޮތް ޑިމާންޑް އެންމެ ފުރިހަމައަށް ފަޙުމް ނުވެދާނެ ސަބަބެކެވެ.

ޕަރސްކީ ބުނާ ގޮތުގައި ފްލޮޕީ ޑިސްކަކުން މާޒީގެ ހަނދާންތައް އާ ކޮށްދިނުމުގެ އިތުރުން، ސަލާމަތްތެރިކަމެއްވެސް އެ ޑިވައިސްއިން ކަށަވަރު ކޮށްދެއެވެ.

އިހުގެ ތަކެއްޗަށް ލޯބި ކުރާ މީހުންނަށް، ޕަރސްކީގެ ގުދަނަކީ ހަޒާނާއެކެވެ. ޕަރސްކީ ވަނީ އޭނާގެ ފްލޮޕީ ރީސައިކަލް ވިޔަފާރީގެ އަމަލީ މަސައްކަތްތައް ކުރިއަށްދާ ގޮތް ހިއްސާކޮށްފައެވެ.

ޕަރސްކީ ބުނާ ގޮތުގައި މި މަރުޙަލާތަކުގެ ތެރެއިން އޭނާ އެންމެ ގަޔާވާ މަރުޙަލާއަކީ ލޭބަލް ކުރުމުގެ މަރުޙަލާއެވެ.

ޕަރސްކީ ބުނާ ގޮތުގައި ދުވާލެއްގެ މައްޗަށް މިހާރުވެސް 500 އެއްހާ ފްލޮޕީ ޑިސްކު ވިއްކާލެވެއެވެ. ނަމަވެސް ޒަމާން ބަދަލުވެއްޖެ ކަމާއި، ހާލަތުވެސް އެއާ އެއްގޮތަށް ބަދަލު ވަމުން ދާނެ ކަން ޕަރސްކީ ޤަބޫލު ކުރެއެވެ.

ކުރިއަށް 20 އަކަށް އަހަރު ދުވަހުގެ ތެރޭގައި އެ ވިޔަފާރި ނެތި ހިނގައިދާނެ ކަމަށްވެސް ޕަރސްކީ ޤަބޫލު ކުރެއެވެ.