ކާފަ ކިޔައިދެމުން ދިޔަ ހިތްގައިމު ވާހަކަތައް އަޑުއަހައިގެން ބޮޑުވަމުން އައި މުޙައްމަދު އަލް-އަމޫދީގެ ޢުމުރުން 30 އަހަރު ފުރިފައި ވާ އިރު، އެހެން ކުދިންނަށް ވާހަކަ ކިޔައިދިނުމަކީ މިއަދު އޭނާގެ ހިތު ލޯބި އޭގެ އެންމެ އިންތިހާއަށް ޖެހިފައިވާ، އޭނާގެ ވަޒީފާއެވެ.
މަޝްހޫރު ފޯކްލޯރް ވާހަކަތަކުގައި އުޅޭ ޚިޔާލީ ކެރެކްޓަރެއް ކަމަށް ވާ ޢަލީ ބާބާ ގޮތަށް ހެދުން އަޅައިގެން، އިތުރު އެހެން މިއުޒީޝަނުންނާއެކު އަމޫދީ ޝޯވތައް ހުށަހަޅާ ދެމުން ދަނީ ދިރިއުޅުމުގެ ހާލަތު އިންތިހާއަށް ގޯސްވަމުން ދާ ޣައްޒާގެ ކުޑަކުދިންގެ ހިތްތަކަށް ހިސާބެއްގެ ތަސައްލީއެއް ހޯދާ ދިނުމުގެ ނިޔަތުގައެވެ.
އަހަރެން ވާހަކަ ކިޔައިދެމުން ދަނީ، އެ ވާހަކަ ކިޔައިދެމުންދާ މާޙައުލަކީ މިނިވަންކަމާއި ރައްކާތެރިކަމާއެކު އެ ކުދިންގެ ޚިޔާލުތަކާއި ޝުޢޫރުތައް ބޭރުކޮށްލެވޭ، އަދި ރީތި ވާހަކަތަކެއް އަޑު އަހާލެވޭ މާޙައުލަކަށް އެތަން ހަދަމުން. ކަލޭމެންނަށްވެސް އެނގޭނެ ޣައްޒާއަށް ކުރިމަތިލާން ޖެހިފައި ހުރި ގޮންޖެހުންތައް. މި ވާހަކަތަކަކީ، އެކުދިންގެ ޙަޔާތުގައި އެޅިފައިވާ ޒަޚަމްތަކުގެ ފަރުވާއެއް.މުޙައްމަދު އަލް-އަމޫދީ؛ ވާހަކަ ކިއާދޭ ޒުވާނެއް
ރާމައްލާގައި މަރުކަޒުކޮށްގެން ހިންގާ ތާމިރު އިންސްޓިޓިއުޓް ފޮރ ކޮމިއުނިޓީ އެޑިއުކޭޝަނުން އިންތިޒާމް ކުރާ މި ހަރަކާތުގެ ތެރެއިން ވާހަކައާއި ނެށުމާއި ލަވަކިއުމުގެ ހުނަރުވެރިކަން ފެނިގެން ދެއެވެ. އެ މަސައްކަތުގެ ތެރެއަށް އަމޫދީ ވަނީ 2014 ވަނަ އަހަރުގެ ތެރޭގައެވެ.
އަހަރަމެންނަށް ކުރިމަތިލާން ޖެހިފައިވާ ކިތަންމެ ތަޖުރިބާއެއް މި ހިއްސާ ކުރަނީ ވާހަކައިގެ ޒަރިއްޔާއިން. ކުދިން މި އުޅެނީ ވާހަކައިގެ ބަޠަލާއެކު. އެ ވާހަކައެއްގައި ކުރިމަތިވާ ހާދިޘާގަނޑުގެ ތެރޭގަ. މިސާލަކަށް، ބޮޑު ކަންފަތްލީ މުޚްތާރުގެ ވާހަކަ... ހަނގާ ކުރުމާ ގުޅޭ ވާހަކައެއް އެއީ. ވާހަކަ މެދުވެރިކޮށް، ކުދިންނަށް މި ހޯދާދެނީ އުފާވެރި ނިންމުމެއް.މުޙައްމަދު އަލް-އަމޫދީ؛ ވާހަކަ ކިއާދޭ ޒުވާނެއް
އަމޫދީ ކިޔައިދޭ ވާހަކަތައް އަޑުއެހުމަށް ޣައްޒާގެ ކުޑަ ކުދިން ތިބެނީ ނުހަނު ޝަޢުޤުވެރިކަމާއެކީގައެވެ. އެކުދިންގެ ދިރިއުޅުމުގައި ކުރިމަތިލާން ޖެހިފައިވާ ގޮންޖެހުންތަކަށް، އެ ވާހަކަތަކުން ޢިބުރަތެއް ލިބޭތީއެވެ.
މުހިންމު އެތައް މާނައެއް އެކުލެވޭ ވާހަކަ ހިފައިގެން، ވާހަކަ ކިޔައިދޭ މީހާ މި އަންނަނީ ރެފިއުޖީ ކޭމްޕަށް. ފަލަސްޠީނުގެ މުޖުތަމަޢަށް ކުރިމަތިލާން ޖެހިފައި ހުރި މައްސަލަތަކުގެ ވާހަކަ އޭނާ ކިޔައިދޭ. ޢަރަބި މުޖުތަމަޢުގަ ހުރި މައްސަލަތަކަށްވެސް ބަލާލަފާނެ. މިސާލަކަށް، އިޤްތިޞާދީ ނޫނީ ސިޔާސީ ކަމަކާ ހެދި، ޢާއިލާއާ ދުރުގަ އުޅެންޖެހިފަ ހުރި ބައްޕައެއްގެ ވާހަކަ ކަހަލަ ވާހަކައެއްވެސް ކިޔައިދީފާނެ... އެއީ އަހަރަމެންގެ ދިރިއުޅުމުގަ ހިނގާ ކަންކަން.ބިސާން ނަތީލް؛ ވާހަކަ ކިޔައިދިނުން އިންތިޒާމް ކުރާ މީހާ
އަމޫދީގެ މަސައްކަތުން، އެތައް ކުދިންނަކަށް އުފާ އިޙްސާސް ކުރެވެއެވެ.
ފުރަތަމަވެސް ލިބުނީ ހައިރާން ކަމެއް. އަހަރެން ޢަލީ ބާބާ ބަލާ އުޅުނީ ކާޓޫޏްތަކުން. ދެން މި ވާހަކަ ކިޔައިދޭ މީހާ ފެނުނީމަ ބުނެވުނު، ޢަލީ ބާބާ ޙަޤީޤަތަކަށް ވިއްޔޭ! އަހަރެން އޭނާއާ ވާހަކަވެސް ދެއްކިން. އޭނާ މަށަށް ވާހަކަ ކިޔައިދޭ. އޭނާއާ މުޢާމަލާތުކޮށްވެސް ހަދަން. އަހަރަމެންގެ ގާތަށް ޢަލީ ބާބާ އައިމަ، ވަރަށް އުފަލުން މި ތިބެނީ.މިންނާ ހައްސޫނާ؛ 13 އަހަރުގެ ކުއްޖެއް
އަމޫދީ ކިޔައިދޭ ވާހަކަތަކަކީ ދުނިޔޭގެ އެކި ކަންކޮޅުތަކުން އޭނާ އެއްކުރާ ވާހަކަތަކެވެ. އެ ވާހަކަތަކަކީ ޢިބުރަތުން ފުރިގެންވާ ވާހަކަތަކެކެވެ. އެކި ކަންކަމަށް ކުދިން ހޭލުންތެރި ކުރުވާ ވާހަކަތަކެކެވޭ. އަމޫދީގެ ޢުއްމީދަކީ، ފަލަސްޠީނުގެ ވާހަކަތައް، ހަމަ އެހާމެ ޝަޢުޤުވެރި ކަމާއެކު ދުނިޔޭގެ އެކި ކަންކޮޅުތަކަށް ކިޔައިދިނުމެވެ.
