ކާފަ ކިޔައިދިން ޢަލީ ބާބާ ވާހަކަ ހަނދާން އެބަހުރިތަ؟
26 ޖެނުއަރީ 2023 | ބުރާސްފަތި 07:45ޢަލީ ބާބާ ގޮތަށް ހެދުން އަޅައިގެން ޝޯވތައް ހުށަހަޅާ ދެމުން ދަނީ ޣައްޒާގެ ކުޑަކުދިންގެ ހިތްތަކަށް ހިސާބެއްގެ ތަސައްލީއެއް ހޯދާ ދިނުމަށް
އަމޫދީ ކިޔައިދޭ ވާހަކަތައް އަޑުއެހުމަށް ޣައްޒާގެ ކުޑަ ކުދިން ތިބެނީ ނުހަނު ޝަޢުޤުވެރިކަމާއެކީގައި
ކާފަ ކިޔައިދެމުން ދިޔަ ހިތްގައިމު ވާހަކަތައް އަޑުއަހައިގެން ބޮޑުވަމުން އައި މުޙައްމަދު އަލް-އަމޫދީގެ ޢުމުރުން 30 އަހަރު ފުރިފައި ވާ އިރު، އެހެން ކުދިންނަށް ވާހަކަ ކިޔައިދިނުމަކީ މިއަދު އޭނާގެ ހިތު ލޯބި އޭގެ އެންމެ އިންތިހާއަށް ޖެހިފައިވާ، އޭނާގެ ވަޒީފާއެވެ.
މަޝްހޫރު ފޯކްލޯރް ވާހަކަތަކުގައި އުޅޭ ޚިޔާލީ ކެރެކްޓަރެއް ކަމަށް ވާ ޢަލީ ބާބާ ގޮތަށް ހެދުން އަޅައިގެން، އިތުރު އެހެން މިއުޒީޝަނުންނާއެކު އަމޫދީ ޝޯވތައް ހުށަހަޅާ ދެމުން ދަނީ ދިރިއުޅުމުގެ ހާލަތު އިންތިހާއަށް ގޯސްވަމުން ދާ ޣައްޒާގެ ކުޑަކުދިންގެ ހިތްތަކަށް ހިސާބެއްގެ ތަސައްލީއެއް ހޯދާ ދިނުމުގެ ނިޔަތުގައެވެ.
ރާމައްލާގައި މަރުކަޒުކޮށްގެން ހިންގާ ތާމިރު އިންސްޓިޓިއުޓް ފޮރ ކޮމިއުނިޓީ އެޑިއުކޭޝަނުން އިންތިޒާމް ކުރާ މި ހަރަކާތުގެ ތެރެއިން ވާހަކައާއި ނެށުމާއި ލަވަކިއުމުގެ ހުނަރުވެރިކަން ފެނިގެން ދެއެވެ. އެ މަސައްކަތުގެ ތެރެއަށް އަމޫދީ ވަނީ 2014 ވަނަ އަހަރުގެ ތެރޭގައެވެ.
އަމޫދީ ކިޔައިދޭ ވާހަކަތައް އަޑުއެހުމަށް ޣައްޒާގެ ކުޑަ ކުދިން ތިބެނީ ނުހަނު ޝަޢުޤުވެރިކަމާއެކީގައެވެ. އެކުދިންގެ ދިރިއުޅުމުގައި ކުރިމަތިލާން ޖެހިފައިވާ ގޮންޖެހުންތަކަށް، އެ ވާހަކަތަކުން ޢިބުރަތެއް ލިބޭތީއެވެ.
އަމޫދީގެ މަސައްކަތުން، އެތައް ކުދިންނަކަށް އުފާ އިޙްސާސް ކުރެވެއެވެ.
އަމޫދީ ކިޔައިދޭ ވާހަކަތަކަކީ ދުނިޔޭގެ އެކި ކަންކޮޅުތަކުން އޭނާ އެއްކުރާ ވާހަކަތަކެވެ. އެ ވާހަކަތަކަކީ ޢިބުރަތުން ފުރިގެންވާ ވާހަކަތަކެކެވެ. އެކި ކަންކަމަށް ކުދިން ހޭލުންތެރި ކުރުވާ ވާހަކަތަކެކެވޭ. އަމޫދީގެ ޢުއްމީދަކީ، ފަލަސްޠީނުގެ ވާހަކަތައް، ހަމަ އެހާމެ ޝަޢުޤުވެރި ކަމާއެކު ދުނިޔޭގެ އެކި ކަންކޮޅުތަކަށް ކިޔައިދިނުމެވެ.
