އީރާނު އަންހެނުންގެ ބެލެނިވެރިންނަށް ވެގެން އުޅޭކަށް ހުޅަނގުގެ ދަޢުލަތްތަކަކަށް ނުޖެހޭނެ!

އީރާނުގެ އަންހެނުންގެ ބެލެނިވެރިންނަށް ވެގެން އުޅުމަކީ ހުޅަނގުގެ ޤައުމުތަކުން ކުރަން ޖެހޭ ކަމެއް ނޫން ކަމަށް، އީރާނުން އދއަށް ކަނޑައަޅާފައި ހުންނަވާ މަންދޫބުގެ ނައިބު، ޒަހްރާ އިރުޝާދީ ވިދާޅުވެއްޖެއެވެ.

އދގެ ސަލާމަތީ މަޖިލީހުގެ ބައްދަލުވުމެއްގައި އޮކްޓޯބަރު 20 ވަނަ ދުވަހު ވާހަކަދައްކަވަމުން، އީރާންގެ ޑެޕިއުޓީ ރެޕްރެޒެންޓޭޓިވް ޒަހްރާ ވަނީ، އީރާން އަންހެނުންގެ ބެލެނިވެރިން ކަމުގައި ހެދިގެން ހުޅަނގުގެ ޤައުމުތަކުން އުޅެމުން ދާ ދިއުމަށް އީރާނުން އިންކާރު ކުރާ ކަން ހާމަ ކުރައްވާ ފައެވެ.

މަހްސާ އަމީނީގެ މަރުގެ ހާދިޘާއާ ގުޅިގެން އީރާނުގައި އުފެދިފައިވާ އޮއެވަރަށް އިޝާރާތް ކުރައްވަމުން ޒަހްރާ ވިދާޅުވީ، ސަރުކާރާއެކު ސުލްޙަވެރި އަދި ބިނާ ކުރަނި ރޫޙެއްގައި މަޝްހޫލުވާން، އީރާނުގެ އަންހެނުންނަށް އެނގޭ ކަމަށެވެ.

އީރާނުގެ އަންހެނުން އާންމުކޮށް ހެދުން އަޅާ އުޅޭ އުސޫލު ބަޔާންކޮށްދިނުމަށް ކަމަށް ބުނެ، އީރާންގެ ސުލޫކީ ފުލުހުންގެ ބެލުމުގެ ދަށަށް ގެންގޮސްފައި ހުއްޓާ މަހްސާ އަމީނީ މަރުވި ހާދިޘާއާ ގުޅިގެން، އީރާނުގެ އިމާމީ ލީޑަރުންނާ ދެކޮޅަށް ވަރުގަދަ މުޒާހަރާތަކެއް ދަނީ ކުރަމުންނެވެ. އީރާނުގެ ބޯޑަރު ހުރަސްކޮށް، ދުނިޔޭގެ އެކި ކަންކޮޅުތަކަށް އެ މުޒާހަރާގެ އޮއެވަރު ވަނީ ފެތުރިފައެވެ. ވަކިން ހާއްސަކޮށް، ހުޅަނގުގެ ޤައުމުތަކުގައި އެ އަޑުފަށްގަނޑު ވަކިން ގަދައެވެ.

އީރާނުގެ އަންހެނުންގެ ބެލެނިވެރިންގެ ގޮތުގައި ހުޅަނގުގެ ޤައުމުތަކަށް އުޅެން ނުޖެހޭ ކަމަށް ބުނެ އީރާނުން ވާހަކަ ދައްކާފައި ވަނީ، އަންހެނުންނާއި ސުލްހަ އަދި ސަލާމަތްތެރިކަމާ ބެހޭ އދގެ ސަލާމަތީ މަޖިލީހުގެ މުޢާހަދާ 1325 ބަލައިގަތްތާ 20 އަހަރު ފުރޭ މުނާސަބާއާ ގުޅޭ ހުޅުވާލެވިފައިވާ ބަހުސްގެ ތެރެއިންނެވެ.

އީރާނުގެ ސަރުކާރާ ދެކޮޅަށް މިހާރު ކުރިއަށްދާ ވަރުގަދަ މުޒާހަރާތަކަކީ އީރާނުގެ ކުރުދީންނަށް ނިސްބަތްވާ، އުމުރުން 22 އަހަރުގެ ޒުވާނެއް ކަމަށް ވާ މަހްސާ އަމީނީގެ މަރާ ގުޅިގެން ފަށާފައި ވާ މުޒާހަރާތަކެކެވެ. ދީނީ ފިކުރުގެ އިމާމުންގެ ބޮޑު ކޮންޓްރޯލްއެއް އޮންނަ އީރާނުގެ ސަރުކާރާ ދެކޮޅުވެރިކަމުގެ އޮއެވަރެއް 2019 ވަނަ އަހަރު ފެށުނު ފަހުން އަދި ހިމޭން ވެފައި ނުވާ އިރު، އަމީނީގެ މަރާ ގުޅިގެން އެ އަޑު ދަނީ ވަކިން ގަދަ ވަމުންނެވެ.