ރައީސް ޞާލިހުއަށް ދެވަނަ ދައުރެއް ދޭން ވަސިއްޔަތް ކުރީ ރާއްޖޭގެ ޑިމޮކްރަސީ ފަހަތައް ސޮއްސާލަން ބޭނުން ނުވާތީ: ޖާބިރު
ޖާބިރު ވިދާޅުވީ ރައީސް ޞާލިހު އަކީ ހިތްތިރި، އޯގާތެރި ވެރިއެއް ކަމަށް
އަބްދުﷲ ޖާބިރު
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އަށް ދެވަނަ ދައުރެއް ދޭން ދާއިރާގެ ރައްޔިތުންނަށް ވަސިއްޔަތް ކުރެއްވީ ރާއްޖޭގެ ޑިމޮކްރަސީ ފަހަތައް ސޮއްސާލައިގެން ދާން ބޭނުންވެވަޑައިނުގަންނަވާތީ ކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ރާއްޖެ ޓީވީގެ "ފަށާއިރު" ގައި ވާހަކަދައްކަވަމުން ޖާބިރު މިފަދައިން ވިދާޅުވީ ރައީސް ޞާލިހު އަށް ދެވަނަ ދައުރެއް ދޭން ރައްޔިތުންނަށް ވަސިއްޔަތް ކުރެއްވި ސަބަބާ ގުޅޭ ގޮތުން ސުވާލެއް ދެންނެވުމުންނެވެ. އެ ސުވާލަށް ޖަވާބު ދެއްވަމުން ޖާބިރު ވިދާޅުވީ އޭނާ ރާއްޖޭގެ ސިޔާސީ ދާއިރާގައި މަސައްކަތް ކުރައްވާތާ ގިނަ އަހަރުތަކެއް ވެފައިވާއިރު ރައީސް ޞާލިހަކީ މިހާތަނަށް ދެކިވަޑައިގެންނެވި އެންމެ ރަނގަޅު އެއް ރައީސް ކަމަށެވެ.
ޖާބިރު ރައީސް ޞާލިހު ސިފަ ކުރެއްވީ، ބަސް މަދު، އަމަލު ގިނަ ބޭފުޅެއްގެ ގޮތުގައެވެ. އަދި އެމަނިކުފާނަކީ އޯގާތެރި، ހިތްތިރި ބޭފުޅެއް ކަމަށް ވެސް އޭނާ ވިދާޅުވިއެވެ.
ރައީސް ޞާލިހުއަށް ދެވަނަ ދައުރެއް ހޯދައިދޭން ދާއިރާގެ ރައްޔިތުންގެ ފަރާތުން ވަސިއްޔަތް ކުރެއްވީ އެއްވެސް ހާލަތެއްގައި އެގްރީމަންޓެއް ހައްދަވައިގެން ނޫންކަން ފާހަގަކުރައްވައި ޖާބިރު ވިދާޅުވީ އޭނާ ބޭނުންފުޅުވަނީ ރާއްޖޭގައި ފެންނަމުން އައި އަނިޔާވެރިކަން ނިމުމަކަށް ގެނެސްފައިވާއިރު އަނބުރާ އެ އަނިޔާވެރިކަމަށް ނުދިއުމަށް ކަމަށެެވެ. އަދި މާލޭގެ ރައްޔިތެއް ނޫން ބޭފުޅަކު ވެރިކަމުގައި ހުންނެވުމަށް ކަމަށެވެ.
ރާއްޖޭގެ ސިޔާސީ ދާއިރާ ދިރާސާ ކުރައްވާތާ ގިނަ ދުވަސްތަކެއް ވެފައިވާކަން ފާހަގަކުރައްވައި ޖާބިރު ވިދާޅުވީ ކޮވިޑް-19 ފަދަ ހާލަތެއްގައި ވެސް ރައީސް ޞާލިހު ރާއްޖެ މެނޭޖު ކުރެއްވީ ވަރަށް ރަނގަޅަށް ކަމަށެވެ. އަދި ފެނާއި ނަރުދަމާގެ މަޝްރޫއުތައް އެމަނިކުފާނު ކުރިއަށްގެންދަވާ ކަމަށާއި އުނދަގުލާއި ދަތިތަކާއެކު ވެސް އެމަނިކުފާނު ވެވަޑައިގެންފައިވާ ވައުދުތައް ފުއްދަވައިދެއްވާފައިވާ ކަމަށެވެ.
ރައީސް ކުރައްވަމުން ގެންދަވާ މަސައްކަތްޕުޅުތައް ފާހަގަކުރައްވާ ޖާބިރު ވިދާޅުވީ ނޮވެމްބަރު މަހުން ފެށިގެން ރާއްޖޭގެ އެންމެ ދެކުނުން ފެށިގެން އުތުރަށް ވަޑައިގެން އެ ރަށްތަކުގެ ރައްޔިތުންނަށް ވެސް ރައީސް ސާލިޙު ދެވަނަ ދައުރަކަށް ހޮވައި ދިނުމަށް އެދި ވަސިއްޔަތް ކުރައްވާނެ ކަމަށެވެ.
ޖާބިރު ވަނީ އޭނާގެ ދާއިރާ ކަމަށްވާ، ކާށިދޫ ދާއިރާއަށް ވެސް މީގެ ކުރީގެ ސަރުކާރުތަކުން އިހުމާލުވެފައިވާއިރު ތަރައްގީގެ މަޝްރޫއުތައް ހިންގާ ކާށިދޫއަކީ ވެސް މުހިންމު ރަށެއްގެ ގޮތުގައި ފާހަގަކުރީ މި ސަރުކާރުން ކަން ވިދާޅުވެފައެވެ. އަދި މި ސަރުކާރުން މިހާރު ކުރަމުން އަންނަ މަސައްކަތުގެ ސަބަބުން ކުރިއަށް އޮތްތަނުގައި އެ ރަށުގައި ދަނޑުވެރިކަން އިތުރަށް ތަރައްގީވެ، ރަށަށް ވެސް ތަރައްގީގެ ފައިދާވާނެ ކަމަށް އޭނާ ވިދާޅުވިއެވެ.
ކާށިދޫ ދާއިރާގެ ރައްޔިތުންނަށް ރައީސް ޞާލިހުއަށް ދެވަނަ ދައުރެއް ދިނުމަށް ޖާބިރު ވަސިއްޔަތް ކުރެއްވީ ދަނޑުވެރިކަމާއި ކާބޯތަކެތީގެ ދުވަސް ފާހަގަކުރުމަށް މި މަހު ކާށިދޫގައި ބެއްވި ރަސްމީ ޖަލްސާގައި ވާހަކަދައްކަވަމުންނެވެ. އޭނާ ނެތް ދުވަހެއްގައި ވެސް ރައީސް ސާލިޙު އެ ދާއިރާއަށް ވަޑައިގެންފި ނަމަ އެމަނިކުފާނަށް ވޯޓު ދެއްވުމަށް ވެސް ޖާބިރު އެދިވަޑައިގެންނެވިއެވެ.
