ވޯލްޑް ޓްރެވަލް އެވޯޑްސްގެ, އެފްރިކާ އަދި އިންޑިއަން އޯޝަން ގާލާ ރަސްމިއްޔާތުގައި އިންޑިއަން އޯޝަންސް ލީޑިންގ ޑެސްޓިނޭޝަން 2022 ޓައިޓަލްގެ އިތުރުން މުހިންމު އެވޯޑުތަކެއް ރާއްޖެއިން ކާމިޔާބުކޮށްފިއެވެ.

ކެންޔާގެ ކެންޔާޓާ އިންޓަނޭޝަނަލް ކޮންވެންޝަން ސެންޓަރ (ކޭއައިސީސީ)ގައި އޮކްޓޯބަރު މަހުގެ 15 ވަނަ ދުވަހު ބޭއްވި ހަފްލާގައި، މި އެވޯޑުގެ އިތުރުން ރާއްޖެއިން ވަނީ އިންޑިއަން އޯޝަންގެ ލީޑިންގ ބީޗް ޑެސްޓިނޭޝަނާއި އިންޑިއަން އޯޝަން ލީޑިންގ ޑައިވް ޑެސްޓިނޭޝަންގެ މަގާމުވެސް ހާސިލުކޮށްފައެވެ. މީގެ އިތުރުން އިންޑިއަން އޯޝަން ލީޑިންގ ޓޫރިސްޓް ބޯޑުގެ ލަގަބު މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ން ކާމިޔާބުކޮށްފައިވެއެވެ.

މި އެވޯޑްތައް ރާއްޖެއަށް ލިބިފައި މިވަނީ ރާއްޖޭގައި ޓޫރިޒަމްގެ ރަންޔޫބީލް އަހަރުގައި ކަމަށްވުމާއެކު، މިއީ ދިވެހިރާއްޖޭގެ ފަތުވެރިކަމުގެ ސިނާއަތުގައި މަސައްކަތްކުރާ އެންމެހާ ފަރާތްތަކަށް ލިބިގެންދާ ޚާއްސަ އުފަލެއްކަމަށް އެމްއެޕީއާރުސީން ބުނެއެވެ. ފަތުރުވެރިކަމުގެ ދާއިރާގެ އޮސްކާގެ ގޮތުގައި ބެލެވޭ ވޯލްޑް ޓްރެވަލް އެވޯޑްސްއަކީ، ޓްރެވަލް ޓްރޭޑް، ޓޫރިޒަމް، އަދި ހޮސްޕިޓަލިޓީ އިންޑަސްޓްރީގެ މުހިންމު ހުރިހާ ދާއިރާތަކަކާއި ސެގްމަންޓްތަކެއްގައި ފާހަގަކޮށްލެވޭ މަންޒިލްތައް ދެނެގަނެ، އިނާމު ދިނުމަށް 1993 ވަނަ އަހަރު އުފެއްދި އެވޯޑެކެވެ.

މީގެ އިތުރުން، ރާއްޖެއިން މިވަނީ މި އަހަރުގެ 29 ވަނަ ޑަބްލިއުޓީއޭގެ އެންމެ ޝަރަފުވެރި، 'ވޯލްޑްސް ލީޑިންގ ކެޓަގަރީން' ފާހަގަކޮށްލެވޭ ތިން އެވޯޑަކަށް ނޮމިނޭޓްވެފައެވެ. އެއީ ޑަބްލިއުޓީއޭގެ އެންމެ ޝަރަފުވެރި ވޯލްޑްސް ލީޑިންގ ޑެސްޓިނޭޝަންގެ ޓައިޓްލްއާއި ވޯލްޑްސް ލީޑިންގ އައިލެންޑް ޑެސްޓިނޭޝަން އަދި ވޯލްޑްސް މޯސްޓް ރޮމޭންޓިކް ޑެސްޓިނޭޝަންގެ އެވޯޑްތަކެވެ. ރާއްޖެއަށް މި އަހަރު އަނެއްކާވެސް ވޯލްޑްސް ލީޑިންގ ޑެސްޓިނޭޝަންގެ ލަގަބު ލިބުމަކީ އަޅުގަނޑުމެން އެންމެން, ގައުމެއްގެ ގޮތުގައި ފަޚުރުވެރިވާނެ ފަދަ ކަމެކެވެ. މި އަހަރު ރާއްޖެއިން މި އެވޯޑް ހާސިލްކޮށްފިނަމަ، މިއީ އަޅުގަނޑުމެންގެ ގައުމަށް ވިދިވިދިގެން ތިން އަހަރު ފަތުރުވެރިކަމުގެ މިފަދަ ޝަރަފުވެރި ލަގަބެއް ލިބޭ ފުރަތަމަ ފަހަރަށް ވެގެން ދާނެއެވެ. މީގެ އިތުރުން، ވޯލްޑްސް ލީޑިންގ ޓޫރިސްޓް ބޯޑުގެ ޝަރަފުވެރި މަގާމަށް އެމްއެމްޕީއާރުސީ ވަނީ ނޮމިނޭޓް ކުރެވިފައެވެ.

ޑަބްލިއުޓީއޭގެ އެވޯޑްތަކަށް ވޯޓުލުން ހުޅުވާލާފައިވަނީ 20 އޮކްޓޯބަރ 2022ގެ ނިޔަލަށެވެ. ދިވެހިރާއްޖެއަށް މި އެވޯޑް ކާމިޔާބު ކޮށްދެއްވުމަށް ވޯޓްލެއްވުމަށް ބޭނުންކުރައްވާނެ ލިންކުތައް ތިރީގައި މިވަނީއެވެ.

ވޯލްޑްސް ލީޑިންގ ޑެސްޓިނޭޝަން:https://bit.ly/3SZgEP2

ވޯލްޑްސް ލީޑިންގ އައިލެންޑް ޑެސްޓިނޭޝަން:https://bit.ly/3EsbaIU

ވޯލްޑްސް މޯސްޓް ރޮމޭންޓިކް ޑެސްޓިނޭޝަން:https://bit.ly/3SO1P2g

ވޯލްޑްސް ލީޑިންގ ޓޫރިސްޓް ބޯޑު:https://bit.ly/3Enf9X5