ތިނަދޫ އަބޫބަކުރު ސްކޫލްގެ ލީޑިންގ ޓީޗަރަކާއި މުވައްޒަފަކު ކަނޑާލަން އުޅޭތީ އިހުތިޖާޖު ކޮށްފި
11 މާރިޗު 2018 | އާދީއްތަ 04:59އެޑިއުކޭޝަނުން ވަކިކުރަން ނިންމާފައިވާ ޓީޗަރަކީ އެ ސްކޫލްގެ އެންމެ ތަޖުރިބާހުރި އެއް ޓީޗަރު
ގދ. ތިނަދޫ އަބޫބަކުރު ސްކޫލްގައި އިހުތިޖާޖު ކުރަނީ
ގދ. ތިނަދޫ އަބޫބަކުރު ސްކޫލްގެ ލީޑިންގ ޓީޗަރަކާއި އެ ސްކޫލްގެ އިދާރީ މުވައްޒަފެއް ވަޒީފާއިން ވަކިކުރަން އުޅޭތީ ސްކޫލްގެ ޓީޗަރުންނާއި ބެލެނިވެރިން އިހުތިޖާޖު ކުރަމުން އެބަދެ އެވެ.
ތިނަދޫއަށް ނިސްބަތްވާ ރައްޔިތުންގެ މަޖިލީހުގެ މަޑަވެލި ދާއިރާގެ ކުރީގެ މެމްބަރު މުހައްމަދު ނާޒިމް ރާއްޖެއެމްވީއަށް ވިދާޅުވީ އިހުތިޖާޖު ކުރަމުންދަނީ އަބޫބަކުރު ސްކޫލްގައި ގިނަ ދުވަހު މަސައްކަތް ކުރެއްވަމުން ގެންދަވާ އަދި ތަޖުރިބާކާރު ޓީޗަރަކާއި އެ ސްކޫލްގެ އިދާރީ މުވައްޒަފެއް ކަނޑާލުމަށް އެޑިއުކޭޝަން މިނިސްޓަރީން މަސައްކަތް ކުރަމުންދާކަން އެނގިގެން، ސްކޫލްގެ ޓީޗަރުންނާއި އިދާރީ މުވައްޒަފުންނާއި ބެލެނެވެރިން ސްކޫލް ހިމެނޭ ސަރަހައްދުގައި އެކަމާ ދެކޮޅަށް އިހުތިޖާޖު ކުރަމުންދާ ކަމަށެވެ.
ނާޒިމް ވިދާޅުވީ ޓީޗަރު ވަކިކުރުމަށް ނިންމާފައިވަނީ ސިޔާސީ އެއްވުމެއްގައި ބައިވެރިވެގެން ކަމަށާއި އިދާރީ މުވައްޒަފު ވަކިކުރަން ނިންމާފައިވަނީ ޓީޗަރުންގެ މުސަރާ ބޮޑު ކުރަން ސަރުކާރުން ނިންމިއިރު ސްކޫލްތަކުގެ އިދާރީ މުވައްޒަފުންގެ މުސާރައަށް ހެޔޮބަދަލެއް ގެނެސް ދީފައިނުވާތީ، ކަޅު ހެދުމުގައި ސްކޫލަށް އައިސް އިދާރީ މުވައްޒަފުންގެ މުސާރައަށްވެސް ހެޔޮބަދަލެއް ގެންނަން ގޮވާލާފައިވާތީ ކަމަށެވެ.
އިހުތިޖާޖު ކުރަމުންދާ ސްކޫލްގެ ޓީޗަރުންނާއި ބެލެނެވެރިން ބުނަމުން ދަނީ ސަރުކާރުން ބާއްވާ ޖަލްސާތަކާއި އެއްވުންތަކުގައިވެސް ޓީޗަރުން ބައިވެރިވަމުންދާ ކަމަށާއި އެހެންކަމުން އެހެން އެއްވުންތަކުގައި ބައިވެރިވެގެންކަމަށްބުނެ ސްކޫލުން ވަކިކުރުމަކީ ގަބޫލު ކުރެވޭނެ ކަމެއް ނޫންކަމަށެވެ. އަދި އެންމެންނާމެދު ހަމަހަމަ ގޮތަކަށް ސަރުކާރުން ކަންކަން ކުރަންޖެހޭ ކަމަށްވެސް އިހުތިޖާޖުގެ ބައިވެރިން ބުނެއެވެ.
ނާޒިމް ވިދާޅުވީ ޓީޗަރުންނާއި ބެލެނެވެރިން އިހުތިޖާޖު ކުރަނިކޮށް، ފުލުހުން އެތަނަށް ގޮސް ސްކޫލްގެ ގޭޓް ކުރިމަތީ އެތުރިގެން ތިބި ކަމަށެވެ.
ނާޒިމް ވިދާޅުވީ ޓީޗަރުންނާއި ބެލެނެވެރިން އިހުތިޖާޖު ކުރަމުންދަނިކޮށް، އެތަނަށް ތިނަދޫގައި ހުންނަ ފެނަކަ ބްރާންޗުގެ މުވައްޒަފުންތަކެއް ގޮސް ހަމަނުޖެހުން ހިންގަން މަސައްކަތް ކޮށްފައިވާ ކަމަށެވެ. އަދި އެތާ ތިބި ފުލުހުންނަށްވެސް ޖެއްސުންކުރި ކަމަށްވެސް ނާޒިމް ވިދާޅުވި އެވެ.
ނާޒިމް ވިދާޅުވީ ޓީޗަރުންނާއި ބެލެނެވެރިން އިހުތިޖާޖު ކުރަމުންދާތީ ސްކޫލް ބަންދު ކަމަށެވެ.
