ހއ. އިހަވަންދޫގައި ރައީސް ޔާމީން އަޅައިދެއްވާނެ ކަމަށް ވިދާޅުވި އައިސްޕްލާންޓުގެ މަސައްކަތް ނިމިއްޖެ
20 އޮކްޓޯބަރު 2022 | ބުރާސްފަތި 08:33ދާދި ފަހުން ހއ އަށް ކުރެއްވި ދަތުރުފުޅުގައި ރައީސް ޔާމީން ވަނީ ގިނަ ވައުދުތަކެއް ވެވަޑައިގެންފައި
ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން
ކުރިއަށް އޮތް ރިޔާސީ އިންތިހާބު ކާމިޔާބުވެއްޖެ ކަމަށް ވާނަމަ، ހއ. އިހަވަންދޫގައި އައިސް ޕްލާންޓެއް އަޅައި ދެއްވާ، މަސްވެރިންނަށް ތެޔޮ ލިބޭނެ ގޮތް ހައްދަވައިދެއްވާނެ ކަމުގައި ކުރީގެ ރައީސް އަބްދުﷲ ޔާމީން ވިދާޅުވެފައިވާއިރު، އެ މަސައްކަތް މިހާރު ނިމިފައިވާ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ބުރާސްފަތި ދުވަހު ރައީސް އޮފީހުން ބޭއްވެވި ނޫސްވެރިންގެ ބައްދަލުވުމުގައި ރާއްޖެޓީވީ އިން ދެންނެވި ސުވާލަކަށް ޖަވާބުދެއްވަމުން މިއުވާން ވިދާޅުވީ ރަށްރަށަށް ވަޑައިގެން ރައީސް ޔާމީން ގިނަ ވައުދުތަކެއް ވެވަޑައިގަންނަވާއިރު އޭގެ ތެެރެއިން ބައެއް ކަންކަމަކީ މިހާރު މަސައްކަތް ކުރިއަށް ދާ ކަންކަަން ކަމަށާއި، ބައެއް މަސައްކަތްތައް މިހާރު ހުރީ ނިމުމަކާއި ގާތް ވެފައި ނުވަތަ މުޅިން ނިމިފައި ކަމަށެވެ. އިހަވަންދޫގެ އައިސް ޕްލާންޓުގެ މަޝްރޫޢު އަކީ އެފަދަ މަޝްރޫޢު އެއް ކަމަށް ފާހަގަކުރައްވާ މިއުވާން ވަނީ ރައީސް ޔާމީނުގެ ވެރިކަމުގައި އެ މަސައްކަތް ކޮށްދެއްވާފައި ނުވާކަން ފާހަގުރައްވާފައެވެ. މިއުވާން ވިދާޅުވީ ކުރީ ސަރުކާރުން ރަށްރަށަށް ބޭނުންވާ އަސާސީ ޚިދުމަތްތަކާ މެދު ވަރަށް ބޮޑަށް އަޅާ ނުލާ ދޫކޮށްލާފައިވާ ކަމަށެވެ. މިހާރު އިދިކޮޅު ފަރާތްތަކުން ގޮސް ރަށްރަށަށް ބޭނުންވާ އަސާސީ ޚިދުމަތްތައް ފޯރުކޮށްދޭނެ ކަމަށް ބުނެ ވާނެ ވައުދެއް ނޯންނާނެ ކަމަށާއި މި ސަރުކާރުން ދަނީ ހުރިހާ ރަށެއްގައި އަސާސީ ޚިދުމަތްތައް ޤާއިމު ކުރުމުގެ މަސައްކަތް ފުރިހަަމަ އަށް ކުރަމުން ކަމަށް މިއުވާން ވިދާޅުވިއެވެ.
އަތޮޅުތެރޭގެ ބައެއް ރަށްރަށަށް ރައީސް ޔާމީން މިހާރު ކުރައްވަމުން ގެންދަވާ ދަތުރުފުޅުތަކުގައި އެ ރަށްރަށަށް ކޮށްދެއްވާނެ ކަންކަމާ މެދު ވާހަކަފުޅު ދައްކަވައެވެ. އެގޮތުން ދާދި ފަހުން ހއ އަށް ކުރެއްވި ދަތުރުފުޅުގައި ވެސް ގިނަ ވައުދުތަކެއް ވެވަޑައިގަންނަވާފައިވެއެވެ.
