މިއަހަރުގެ މޯލްޑިވްސް އެކައުންޓެންޓްސް ފޯރަމްގައި ރާއްޖޭގެ އިގްތިސާދަށް ވަރަށް ބޮޑަށް އަލިއަޅުވާލެވިގެންދާނެ ކަމަށް ސީއޭ މޯލްޑިވްސްގެ ކައުންސިލް މެންބަރު މުހައްމަދު ހަލީމް ވިދާޅުވެއްޖެއެވެ.

މިއަހަރުގެ މޯލްޑިވްސް އެކައުންޓެންޓްސް ފޯރަމް ބާއްވަން ހަމަޖެހިފައިވަނީ މިމަހުގެ 29 އަދި 30 މި ދެ ދުވަހުއެވެ. ފޯރަމް ކުރިއަށްގެންދަން ހަމަޖެހިފައިވަނީ ދަރުބާރުގޭގައެވެ. ފޯރަމްއާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ހަލީމް ވިދާޅުވީ ފޯރަމްގައި ރަޖިސްޓްރީވުމުގެ ކަންކަން އަދިވެސް ކުރިއަށްދާކަމަށެވެ. 23 އޮކްޓޯބަރާ ހަމައަށް ރަޖިސްޓްރޭޝަން ކުރިއަށްދާނެ ކަމަށެވެ.

މިއަހަރުގެ ފޯރަމް ކުރިއަށްދާ ތީމަކީ "އިކޮނޮމިކް ޓްރާންސްފޮރމޭޝަން، ރީތިންކިން ގްރޯތް އިން ދަ ނިއު އިކޮނޮމީ" އެވެ. ހަލީމް ވިދާޅުވީ މީގެ ކުރިން ބޮޑަށް ފޯކަސްކޮށްފައިވާނީ ޓެކްނިކަލް ސެޝަންތަކަށް ކަމަށެވެ. އެހެންނަމަވެސް މިފަހަރުގެ ފޯރަމްގައި އިގްތިސާދު ކުރިއަރުވަން އެކި ދާއިރާތަކުން ކުރެވޭނެ ކަންކަމާ ގުޅޭ ސެޝަންތައް ކުރިއަށްދާނެ ކަމަށް އޭނަ ވިދާޅުވިއެވެ.

ހަލީމް އިތުރަށް ވިދާޅުވީ މިއަހަރުގެ ފޯރަމްގައި ސަރުކާރުގެ އޮފީސްތަކާއި، ސަރުކާރު ހިއްސާވާ ކުންފުނިތަކާއި، އަމިއްލަ ކުންފުނިތަކާއި ވަކިވަކި ފަރުދުންނާއި، އޮޑިޓަރުންނާއި، ކޮންސަލްޓެންޓުނާއި، ފައިނޭންސް ޕްރޮފެޝަނަލުންނައި، ވިޔަފާރީގެ ދާއިރާގައި މަސައްކަތްކުރާ ފަރާތްތަކާއި، ކިޔަވާ ކުދިންނަށް ވެސް މި ފޮރަމްގައި ބައިވެރިވުމުގެ ފުރުސަތު ހުޅުވާލާފައިވާކަމަށެވެ. މި ފޯރަމްގައި އެކައުންޓިންއާއި، ފައިނޭންސިންގެ ދާއިރާއިން މުހިންމު މައުލޫމާތުތަކެއް ހިއްސާކުރެވިގެންދާނެ ކަމަށް ހަލީމް ވިދާޅުވިއެވެ.