ޗެލްސީ އިން އޭނާ ހޯދުމަށް ކުރަމުން އަންނަ މަސައްކަތުގެ ދަށުން އެ ކުލަބަށް ބަދަލުވެދާނެތޯ ސުވާލު ކުރުމުން ލެއަންޑްރޯ ޓްރޮސާޑް ސީދާ ޖަވާބެއް ނުދިނެވެ.
ބޭރުގެ ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި ބްރައިޓަން އަށް ކުޅެމުން އަންނަ އުމުރުން 27 އަހަރުގެ ވިންގަރ ހޯދުމުގެ މަސައްކަތް ޗެލްސީން އަންނަނީ ކުރަމުންނެވެ. އެއީ އަންނަ ސީޒަނަށް އެ ޓީމުން އައު ކުޅުންތެރިން ހޯދަން ބޭނުންވާތީއެވެ. ޚާއްސަކޮށް އޭނާ އަކީ ޗެލްސީގެ މިހާރުގެ ކޯޗު ގްރަހަމް ޕޮޓާ ބޭނުންވާ ކުޅުންތެރިޔެއް ކަމަށް ރިޕޯޓުތައް ބުނެއެވެ.
ބްރައިޓަންއާއެކު ޓްރޮސާޑް ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އިތުރު އެއް އަހަރަށް އެއްބަސްވުން އައުކުރުމުގެ ފުރުސަތު ބްރައިޓަންއަށް އޮވެއެވެ.
އެކަމާ ގުޅޭ ގޮތުން ސުވާލު ކުރުމުން ޓްރޮސާޑް ބުނީ ޗެލްސީއާ ގުޅުވައިގެން ދެކެވޭ ވާހަކަތަކަކީ ޖަވާބު ދޭން ވަރަށް އުނދަގޫ ވާހަކަތަކެއް ކަމަށެވެ. ޓްރޮސާޑް ބުނީ އެ ސުވާލުގެ ޖަވާބަށް ވޯލްޑް ކަޕް ނިމެންދެން މަޑުކުރަން ޖެހޭނެ ކަމަށެވެ. އޭނާ ބުނީ މުސްތްޤުބަލުގައި ހަދާނެ ގޮތެއް ނިންމާނީ ވޯލްޑް ކަޕަށްފަހު ކަމަށެވެ.
ޓްރޮސާޑް ބްރައިޓަން އަށް ބަދަލުވީ 2019 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް ކުޅެދިން 114 މެޗުން 23 ލަނޑު ޖަހާފައެވެ. 2020 ވަނަ އަހަރުން ފެށިގެން ޓްރޮސާޑް އަންނަނީ ބެލްޖިއަމްގެ ޤައުމީ ޓީމަށް ވެސް ކުޅެމުންނެވެ.
