ސްޕެނިޝް ލީގުގެ ވެލެންސިއާ އަށް ކުޅެމުން އަންނަ ޑިފެންޑަރު ޖޯސް ލުއިސް ގަޔާ އެ ޓީމާއެކު ހަދާފައިވާ އެއްބަސްވުން އައުކޮށްފިއެވެ.

އުމުރުން 27 އަހަރުގެ ގަޔާ ވެލެންސިއާ އަށް ގުޅުނީ 2012 ވަނަ އަހަރުއެވެ. އޭގެ ފަހުން 2015 ވަނަ އަހަރު އޭނާ ވަނީ އެއްބަސްވުން އައުކޮށްފައެވެ. އެ އެއްބަސްވުމުގެ މުއްދަތު ހަމަވީ 2020 ވަނަ އަހަރުއެވެ. ނަމަވެސް މުއްދަތު ހަމަވުމުގެ ކުރިން އޭނާ ވަނީ 2023 ވަނަ އަހަރާ ހަމަ އަށް ކުލަބުގައި މަޑުކުރުމަށް އެއްބަސްވެފައެވެ. އެންމެ ފަހުން އޭނާ ހެދި އެއްބަސްވުން ހަމަވާނީ 2023 ވަނަ އަހަރުގެ ޖޫން މަހުގެ ނިޔަލަށެވެ.

ގަޔާ ވެލެންސިއާގެ އެއްބަސްވުން އައުކުރީ އިތުރު ފަސް އަހަރު ދުވަހަށެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. އައު އެއްބަސްވުމުގެ ދަށުން އަދި ވެސް ވެލެންސިއާގެ ކެޕްޓަންކަމުގެ މަގާމުގައި ހުންނާނީ އޭނާއެވެ.

ގަޔާ ވަނީ މިހާތަނަށް ވެލެންސިއާ އަށް 298 މެޗު ކުޅެދީ އަށް ލަނޑު ޖަހާފައެވެ. އޭނާ ވަނީ އެ ޓީމާއެކު 19-2018 ވަނަ ސީޒަންގެ ކޮޕާ ޑެލްރޭ މުބާރާތް ކާމިޔާބުކޮށްފައެވެ. 2018 ވަނަ އަހަރުން ފެށިގެން ގަޔާ އަންނަނީ ސްޕެއިންގެ ޤައުމީ ޓީމަށް ވެސް ކުޅެމުންނެވެ.