ޗައިނާގެ ރައިސް ޝީ އާ ދެކޮޅަށް ފެށި ކެމްޕެއިނެއް އެކި ގައުމުތަކަށް ފުޅާވަނީ

ޗައިނާގެ ރައީސް ޝީޖިން ޕިންގ އާ ދެކޮޅަށް އެގައުމުގައި ފެށި ކެމްޕެއިނެއް ފުޅާވަމުން ގޮސް އެހެން ގައުމުތަކަށް ވެސް ފެތުރެން ފަށާފައިވާ ކަމަށް ޚަބަރު ލިބިއްޖެއެވެ. ކެމްޕެއިންގެ ޚަބަރުތަކާއި މަންޒަރު އޮންލައިންކޮށް ފަތުރަމުން ގެންދާތީ ސެންސަރު ކުރާ ފަރާތްތަކުން ވަނީ ސަމާލުކަމަށް އައިސް އެތަކެތި ޗައިނާގައި ބޭނުން ކުރާ ހުރިހާ ސޯޝަލް މީޑިއާ ޕްލެޓްފޯމްތަކުން ނަގާފައެވެ. އެހެންނަމަވެސް ކެމްޕެއިން ހުއްޓުވާލެވިފައެއް ނުވެއެވެ.

މީޑިޔާ ރިޕޯޓްތައް ބުނާ ގޮތުން ރައީސް ޝީ އާ ދެކޮޅަށް ކެމްޕެއިން ފެށުނީ ސަރުކާރާ ދެކޮޅު ސްލޯގަންތަކެއް ލިޔެފައިވާ ބެނަރއެއް ހިފައިގެން މީހަކު ނުކުމެ ދެކޮޅުވެރިކަން ދެއްކި ހަމައިންނެވެ. އެމީހާގެ ފޮޓޯ އާއި މަންޒަރުތައް ވަގުތުން ބަންދު ކޮށްލާފައި ވީނަމަވެސް އޭނާ ބޭނުންކުރި ބެނަރގައިވާ ލިޔުންތައް ބޭނުންކޮށްގެން އެހެން ގިނަ ބަޔަކުވަނީ މުޒާހަރާ ކުރަން ފަށާފައެވެ. މި ލިޔުންތަކުގައި ވަނީ :

އަހަރުމެން ބޭނުމީ ޕީސީއާރު ޓެސްޓެއް ނޫނެވެ. ކާއެއްޗިއްސެވެ.

އަހަރުމެން ބޭނުމީ މިނިވަންކަމެވެ. ލޮކްޑައުން އެއް ނޫނެވެ.

އަހަރުމެން ބޭނުމީ އިހްތިރާމްއެވެ. ދޮގުތަކެއް ނޫނެވެ. މިފަދަ ސްލޯގަން ތަކެކެވެ.

ބައެއް އިންޓަރނޭޝަނަލް މީޑިޔާ އައުޓްލެޓުތަކުން ރިޕޯޓްކޮށްފައިވާ ގޮތުގައި ޝީ އާ ދެކޮޅަށް އޮންލައިންކޮށް ވެސް ދަނީ މުޒާހަރާ ފުޅާވަމުންނެވެ. އެންމެ ބާރަށް ކެމްޕެއިން ކުރުމުގައި ހަރަކާތްތެރި ވަނީ ވޮއިސް އޮފް ސީއެން ކިޔާ ޗައިނާގެ ރައްޔިތުންތަކެކެވެ. މި ގްރޫޕުން އިންސްޓާގްރާމްގައި ޕޯސްޓުކުރަމުން ދާ ތަކެތީގެ އިތުރުން ޝެންގްހައި، ޝެންޒެން، ގުއަންގ ޒޫ، ބޭޖިންގ، އަދި ހޮންކޮންގުގައި ވަނީ މުޒާހަރާތައް އިންތިޒާމުކޮށްފައެވެ.

ސަރުކާރާ އަދި ރައީސް ޝީ އާ ދެކޮޅަށް ނުކުންނަ ފަރާތްތަކަށް ޗައިނާގެ ޖުޑީޝަރީ އިން ވަރަށް ހަރުކަށި ހުކުމްތައް އިއްވައެވެ. އެހެންކަމުން އެފަދަ މަންޒަރުތަކަކީ ވަރަށް މަދުން ނޫނީ ނުފެނަ މަންޒަރެކެވެ. އެހެން ނަމަވެސް މިހާރު އެވަނީ ދުރުގައި ތިބެ އިންޓަރނެޓު މެދުވެރިކޮށް ކެމްޕެއިން ފަށާފައެވެ. ސައުތު ޗައިނާ މޯނިން ޕޯސްޓުން ރިޕޯޓުކޮށްފައިވާ ގޮތުގައި ފާއިތުވި ދެތިން ހަތަރު ދުވަހު ސޯޝަލް މީޑިޔާގައި ވަކި ޚާއްސަ ލަފުޒުތަކެއް ބޭނުން ކުރުން ވަނީ އިތުރު ވެގެން ގޮސްފައެވެ.

ކޮވިޑް 19 އާ ގުޅިގެން އެޅި، އަދި މިހާރު ވެސް އަޅަމުންދާ ފިޔަވަޅުތަކުގެ ސަބަބުން ގައުމުގެ އިގްތިސާދު ވަޅުޖެހިފައިވުމާ އެކު، ކޮމިޔުނިސްޓް ޕާޓީގެ އިސް މެމްބަރުންނާ މެދު ކޮރަޕްޝަންގެ ބޮޑެތި ތުހުމަތުތައް ކުރެވެމުން ދާތީ އާންމު ރައްޔިތުން ވަނީ ސަރުކާރާ މެދު ވަރަށް ބޮޑަށް ނުރުހުން ވެފައެވެ. އަދި ސަރުކާރާ ދެކޮޅަށް އަޑު އުފުލަން ފަށާފައެވެ. މި ރުޅިވެރިކަމާއި ނަފްރަތު ކުރިން ވެސް އޮތްކަމަށާއި ނަމަވެސް މިހާރު ކުރިޔަށް ދާ ކޮންގްރެސްގައި ޝީ އަށް ތިންވަނަ ދައުރެއް ހަމަޖައްސާ، ކުރިޔަށް އޮތް އިންތިޚާބުގައި ރައީސް ޝީގެ ބާރު އިތުރަށް ގަދަ ކުރާނެކަން ޔަގީން ވާތީ، އެކަން އެގޮތަށް ވުމަށް ނޭދޭ ފަރާތްތަކުން ވަރަށް ބާރަށް އެންޓި ކެމްޕެއިން ފުޅާކުރުމަށް މަސައްކަތް ކުރަމުން ދާކަމަށް ޚަބަރު ލިބެއެވެ.

ޗައިނާގެ ސަރުކާރާ ދެކޮޅު މުޒާހަރާތައް ދުނިޔޭގެ އެތައް ގައުމެއްގެ ޔުނިވަރސިޓީތަކުގައި ވެސް ދަނީ އޮންލައިންކޮށް ކުރަމުންނެވެ. ބީބީސީ އިން ޚަބަރުދޭ ގޮތުގައި ޗައިނާ ސަރުކާރާ ދެކޮޅު ސްލޯގަންތައް އެމެރިކާ، އިނގިރޭސި ވިލާތް އޮސްޓްރޭލިޔާ އަދި ޔޫރަޕްގެ ގިނަ ގައުމުތަކެއްގައި ސޯޝަލް މީޑިޔާ މެދުވެރިކޮށް ދަނީ ފަތުރަމުންނެވެ.