ޔޫކްރެއިންގެ ރަށްވެހިން ސާފު ބޯފެނުން މަޚްރޫމުވެފައިވާތާ އެތައް މަހެއް

އެއީ، މި ހިނގާ 21 ވަނަ ޤަރުނުގެ، މި ތަރައްޤީ ޒަމާނުގައި ވަރަށް މަދުން ނޫނީ ނުފެންނާނެ މަންޒަރެކެވެ. ނަމަވެސް، ކޮންމެ ފަދަ ގޮތަކަށްވެސް ދިރިއުޅުން ބަދަލު ވެދާނެ ކަމުގެ ސާފު އެއް މިސާލު ފެންނަމުން ދަނީ، އަދިވެސް ވަރުގަދަ ހަނގުރާމައެއް ކުރަމުންދާ ޔޫކްރެއިންގެ މަސްރަހުންނެވެ. އޮކްޓޯބަރު 16 ވީ އާދީއްތަ ދުވަހުގެ ވަގުތެކެވެ. ޔޫކްރެއިންގެ ދެކުނުގެ ސިޓީއެއް ކަމަށް ވާ މިކޮލެއޭވްގެ ރަށްވެހިން، ހުސްވެފައި ވާ ޕްލާސްޓިކް ފެންފުޅިތައް ހިފައިގެން ސަފަކަށް އެތުރި ތިބޭތާ ވަގުތުތަކެއް ހޭދަވެއްޖެއެވެ. ކަމާ ބެހޭ ފަރާތްތަކުން ހޭބޯނާރާ މަސައްކަތް ކުރަމުން ދަނީ، އާންމު ގޭބިސީތަކަށް ސާފު ބޯފެން ފޮދެއް ފޯރުކޮށްދެވޭތޯއެވެ.

ދިރިއުޅުމުގެ ޒަރޫރީ ބޭނުންތައް ފުއްދުމަށްޓަކާވެސް ބޮޑެތި ގޮންޖެހުންތަކެއް ގިރާ ކުރަމުންދާ މިކޮލެއޭވްގެ ރަށްވެހިން ބުނާ ގޮތުގައި، ސާފު ބޯފެން ފޮދެއް ލިބެނީ މަދު ފަހަރަކުއެވެ.

އިންނާ ހްލޫސްޗެންކޯއަކީ ކާރުޚާނާއެއްގައި ހާޒިރީ ބެލެހެއްޓުމުގެ މަސައްކަތް ކުރަމުން އަންނަ މީހެކެވެ. އިންނާ ހްލޫސްޗެންކޯ ބުނި ގޮތުގައި، މިކޮލެއޭވްގެ އިރުން އޮންނަ ޗިސެލިއުކާގައި ފެން ސަޕްލައި ކުރާ ޕައިޕްލައިނަށް ރަޝިއާއިން ހަމަލާ ދީ ގޮއްވާލީ މީގެ މަސްތަކެއް ކުރިންނެވެ. އޭގެ ފަހުން، ސާފު ބޯފެނުގެ ސަޕްލައިއަށް ވަނީ ހުރަސްތަކެއް ކުރިމަތިވެފައި ކަމަށް އޭނާ ބުނެއެވެ.

އިންނާ ހްލޫސްޗެންކޯ ބުނާ ގޮތުގައި، އޭނާގެ އަމިއްލަ ގޭގައި ހުރި އިސްކުރުތަކުން ސާފު ބޯފެން ފޮދެއް ނުލިބޭތާ މިހާރު 5 މަހަށްވުރެ ގިނަ ދުވަސް ވެއްޖެއެވެ.

ރައްޔިތުންގެ ހިތުގައި އަނދަމުން ދަނީ ނަފުރަތުގެ ގިންޏެވެ. އެހެން ނުވާންވީ ސަބަބެއްވެސް ނެތެވެ. ސޭލްސް މެނޭޖަރެއްގެ ވަޒީފާ އަދާ ކުރަމުން އަންނަ ވަޑީމް އެންޓޮނީޔުކް ސިފަ ކުރި ގޮތުގައި، މަދަނީ ފަރުދުންގެ ސަޕްލައިއަށް އަމާޒުކޮށް ހަމަލާދީ، އެ ސުންނާފަތި ކުރުމަކީ "ހަނގުރާމައިގެ ޖަރީމާ" އެކެވެ.

މިކޮލެއޭވްގެ ރަށްވެހިންނަށް އާދީއްތަ ދުވަހު ސަޕްލައިކޮށްދިން ފެން ނަގާފައި ވަނީ ޓްރޯލީބަސް އޮޕަރޭޓް ކުރާ ކުންފުންޏެއްގެ ގުދަނެއްގައި ހުރި ފެންވަޅަކުން ކަމަށް، ޓްރޯލީބަސް ޑްރައިވަރު ވްލޮޑޮމީރް ކޮވްޓުޔުކް ވަނީ ބުނެފައެވެ. ފާއިތުވީ 4 މަހެއްހާ ދުވަހަށް ބަލާއިރު، ކޮންމެ ދުވަހަކީވެސް އާންމު ރައްޔިތުންނަށް ފެން އުފުލައި ދިނުމުގެ މަސައްކަތުގައި ކޮވްޓުޔުކް ހޭދަ ކުރި ދުވަހެއް ކަމަށް އޭނާ ބުނެއެވެ.

ރަޝިއާގެ ރައީސް ވްލެޑްމިއަރ ޕުޓިންގެ އަމުރުފުޅަކަށް، އެ ޤައުމުގެ އަސްކަރިއްޔާއިން "ހާއްސަ އޮޕަރޭޝަނެއް"ގެ ނަމުގައި ފެބުރިއަރީ 24 ވަނަ ދުވަހު ޔޫކްރެއިންއަށް އަރާ، ފެށި ވަރުގަދަ ހަނގުރާމާގައި، ޔޫކްރެއިންގެ ޢުމްރާނީ ބިނާވެއްޓާއި ދަނޑުވެރިކަމުގެ ސިނާއަތަކަށް ހަމަލާ އަމާޒު ކުރަމުން ދާ ކަމަށް، ޔޫކްރެއިންގެ ސަރުކާރުން ސިލްސިލާ ގޮތެއްގައި ތުހުމަތު ކުރެއެވެ.