ސިޓީ ހުއްޓުވަން ލިވަޕޫލުން މަސައްކަތްކުރާނެ ގޮތް ކްލޮޕް ބުނެދީފި

އިނގިރޭސި ޕްރިމިއަރ ލީގުގައި ވާދަވެރި މެންޗެސްޓަރ ސިޓީއާ ދެކޮޅަށް ނިކުންނައިރު، ލިވަޕޫލުން ސިޓީ ހުއްޓުވަން މަސައްކަތްކުރާނެ ގޮތް، އެ ޓީމުގެ ކޯޗު ޔާގަން ކްލޮޕް ބުނެދީފިއެވެ.

މެޗުގެ ކުރިން ވާހަކަ ދައްކަމުން ކްލޮޕް ބުނީ އޭނާ މެޗަށް ތައްޔާރުވަމުން އަންނަ ކަމަށާއި، މިއީ ފުޓުބޯޅައިގައި ކުރިމަތިވާނެ އެންމެ ބޮޑު ޗެލެންޖުކަމަށެވެ. އަދި ފުޓުބޯޅައަކީ ކުޅުންތެރިންނަށް ޕްރެޝަރު ކުރިމަތިވެގެން ކުރިއަށްދާ ކުޅިވަރެއް ކަމަށެވެ. އޭނާ ބުނީ، ސިޓީއާ ދެކޮޅަށް ނުކުތުމަކީ އަބަދުވެސް ޗެލެންޖެއް ކަމަށާއި، ސިޓީއަކީ މިވަގުތު ދުނިޔޭގެ އެންމެ މޮޅު ކުލަބުކަމަށެވެ.

އޭނާ ބުނީ، ސިޓީއާ ދެކޮޅަށް އަބަދުވެސް ލިވަޕޫލުން ނުކުންނަނީ ވިސްނުންތެރިކަމާއެކު ކަމަށެވެ. މެޗުގައި ލިވަޕޫލްގެ ޑިފެންސް ވަރުގަދަކޮށް ފެންނަން ޖެހޭނެކަމަށާއި، ހުރިހާ ވަގުތަކު ސަމާލުކަން ދިނުން މުހިންމު ކަމަށެވެ. ބޯޅަ ޕާސްކޮށް، ހަލުއިވާން ޖެހޭނެކަމަށް ކްލޮޕް ވަނީ ބުނެފައެވެ. އޭނާ ބުނީ، ލިވަޕޫލުން އެންމެ ފަހުން ރޭންޖަރސްއާ ދެކޮޅަށް ކުޅުނީ ރަނގަޅު ގޭމެއްކަމަށާއި، އެ މެޗުގައި އެލިއޮޓްއާއި ފަބިއޯ ވަރަށް ރަނގަޅަށް ހަލުވިކަމާއެކު ކުޅުނުކަމަށެވެ.

ކްލޮޕް ބުނީ، ސިޓީއާ ދެކޮޅަށްވެސް ޖެހޭނީ އެ ކުޅުން ދައްކަން ކަމަށެވެ. ބޯޅަ ޕާސްކޮށް، އިދިކޮޅުގެ ޑިފެންސަށް ނުރައްކާކުރަން ޖެހޭނެކަމަށެވެ. އޭނާ ބުނީ ބައެއް ފަހަރު ހަނދާން ނެތޭ ކަމެއްވެސް އޮންނަކަމަށެވެ. އެއީ ސިޓީގެ ފަރާތުން އުނދަގޫ ކުރިމަތިވެދާނެކަމެވެ. އޭނާ ބުނީ އެކަމަށް ސަމާލުކަންދީގެން، އެކަން ހަނދާނުގައި ބަހައްޓަންޖެހޭނެ ކަމަށެވެ.

ލީގުގައި ސިޓީ އޮތީ ކުޅުނު ނުވަ މެޗުން 23 ޕޮއިންޓު ހޯދައިގެން ތާވަލްގެ ދެ ވަނަ މަގާމުގައެވެ. އެއްވަނާގައި، ސިޓީއަށްވުރެ ޕޮއިންޓެއް އިތުރަށް ހޯދައިގެން އޮތީ އާސެނަލްއެވެ. ލިވަޕޫލް އޮތީ އަށް މެޗުން 10 ޕޮއިންޓާއެކު، 11 ވަަނައިގައެވެ.