އާޖެންޓީނާގެ ރިވާ ޕްލޭޓްގެ ކޯޗުކަން ދޫކޮށްލަން މާސެލޯ ގަލާޑޯ ނިންމައިފިއެވެ.

ގަލާޑޯ އެ ޓީމުގެ ކޯޗުކަން ދޫކޮށްލަން ނިންމީ އެ ޓީމާއެކު އޭނާ ހަދާފައިވާ އެއްބަސްވުމުގެ މުއްދަތު ހަަމަވުމުންނެވެ. އަށް އަހަރު ދުވަހު އެ ޓީމަށް އިރުޝާދު ދިނުމަށްފަހު ގަލާޑޯ ނިންމީ އެއްބަސްވުން އައު ނުކުރުމަށެވެ. އެ އެއްބަސްވުން ހަމަވާނީ މިއަހަރުގެ ޑިސެމްބަރު މަހުއެވެ.

ފްރާންސް ލީގުގައި މޮނާކޯއާއި ޕެރިސް ސެއިންޓް ޖާމަން (ޕީއެސްޖީ)އަށްވެސް ކުޅެފައިވާ ގަލާޑޯ ކޯޗިންގ ކެރިއަރު ފެށީ 2011 ވަނަ އަހަރުއެވެ. އެންމެ ފުރަތަމަ އޭނާ އިރުޝާދުދިނީ އުރުގުއޭގެ ނަސިއޮނާލަށެވެ. ތިން އަހަރު ދުވަހު އެ ޓީމަށް އިރުޝާދު ދިނުމަށްފަހު، ގަލާޑޯ ރިވާ ޕްލޭޓާ ހަވާލުވީ 2014 ވަނަ އަހަރުއެވެ.

ކުލަބު ދޫކޮށްލާކަން ހާމަކޮށް ގަލާޑޯ ބުނީ، އޭނާގެ ނިންމުން މިހާރު ކުލަބުގެ އިސްވެރިންނަށް އަންގާފައިވާނެ ކަމަށެވެ. އެ ނިންމުމަކީ އޭނާގެ ހަޔާތުގައިވެސް ނިންމަން ޖެހުނު އެންމެ އުނދަގޫ ނިންމުންކަމަށެވެ. ރިވާ ޕްލޭޓްގެ ކޯޗުކަން ދޫކޮށްލުމަށްފަހު ދެން ކުރިމަގުގައި އޭނާ ފެންނާނެ ޓީމެއް ގަލާޑޯ ބުނެފައެއް ނުވެއެވެ.

ގަލާޑޯގެ އިރުޝާދުގެ ދަށުން ރިވާ ޕްލޭޓް ވަނީ 422 މެޗު ކުޅެފައެވެ. އޭގެ ތެރެއިން އެ ޓީމު ވަނީ 227 މެޗުން މޮޅުވެ، 84 މެޗުން ބަލިވެފައެވެ. 111 މެޗަކުން ވަނީ އެއްވަރުވެފައެވެ. ރިވާ ޕްލޭޓާއެކު ގަލާޑޯ ވަނީ ގިނަ ކާމިޔާބީ ތަކެއްވެސް ހޯދާފައެވެ. އެ ޓީމާއެކު އޭނާ ވަނީ ޖުމުލަ 14 ތަށި ކާމިޔާބުކޮށްފައެވެ. އޭގެ ތެރޭގައި އާޖެންޓީނާގެ ޕްރިމެރާ ޑިވިޝަނާއި، ކޮޕާ އާޖެންޓީނާއާއި ސުޕަރ ކޮޕާ އާޖެންޓީނާ ހިމެނެއެވެ.