ކްރިކެޓް ބޯޑް އޮފް މޯލްޑިވްސް އިން އިންތިޒާމުކޮށްގެން ކުރިއަށް ގެންދާ 15 ވަނަ ރަމަޟާން ކްރިކެޓް ކާނިވާގައި ހޮނިހިރު ދުވަހު ކުޅުނު މެޗުތަށް ރިވާސް ބާބާ އާއި ޝުގާރކޯން އިން ކާމިޔާބުކޮށްފިއެވެ.

ހޮނިހިރު ދުވަހު މި ކާނިވާލްގައި ކުޅެފައިވަނީ އޯޕަންޓޭޕްބޯލް ބައިގެ ދެމެޗެވެ. ފުރަތަމަ މެވުގައި އަކުންބަކުންނާއި ވާދަކޮށް ރިވާސް ބާބާ އިން މެޗް ކާމިޔާބުކުރީ 4 ވިކެޓުންނެވެ. މެޗުގައި ފުރަތަމަ ކުޅެންއަރާފައިވަނީ އަކުންބަކުން ޓީމެވެ. 8 އޯވަރުގެ ތެރޭގައި އެޓީމަށް ހެދިފައިވަނީ 92 ލަނޑެވެ. އަދި އެޓީމުން ވަނީ 5 ވިކެޓް ނަގާފައެވެ. އެޓީމުން އެންމެ ރަނގަޅަށް ކުޅުނު ސާއިސް މުހަންމަދު ވަނީ 30 ލަނޑު ހަދާފައެވެ. ޖަވާބުގައި ރިވާސް ބާބާއިން ކުޅެންއަރާ އެޓީމުން ވަނީ 8 އޯވަރުގެ ތެރޭގައި 6 ކުޅުންތެތިން ނުބައިވެގެން 95 ލަނޑު ހަދާފައެވެ. އެޓީމުން އެންމެ ރަނގަޅަށް ކުޅުނު މުހަންމަދު ނަޒީހު ވަނީ ނުބައިނުވެ 22 ލަނޑު ހަދާފައެވެ.

ދެވަނަ މެޗުގައި މޯޑަސް އޮޕަރެންޑީގެ މައްޗަށް ސުގާރކޯން އިން ކުރިހޯދާފައި ވަނީ 3 ވިކެޓުން މެޗް ކާމިޔާބުކޮށްގެންނެވެ. މެޗުގައި ފުރަތަމަ ކުޅެން އަރާފައިވަނީ މޯޑަސް އޮޕަރެންޑީއެވެ. އެޓީމަށް 8 އޯވަރުގެ ތެރޭގައި 6 ކުޅުންތެރިން ނުބައިވެގެން ހެދިފައިވަނީ 64 ލަނޑެވެ. ޖަވާބުގައި ސުގާރކޯން އިން ކުޅެން އަރާ އެޓީމުން ވަނީ 8 އޯވަރުގެ ތެރޭގައި 4 ކުޅުންތެރިން ނުބައިވެގެން 65 ލަނޑު ހަދާފައެވެ.

މި ކާނިވަލްގައި އާދިއްތަ ދުވަހުވެސް ކުޅުމަށް ހަމަޖެހިފައިވަނީ އޯޕަން ޓޭޕްބޯލްގެ ދެމެޗެވެ. އެގޮތުން ފުރަތަމަ މެޗުގައި ބައްދަލުކުރާނީ މެރިކޯނާ އާއި ލެޒާރ ކާރގޯއެވެ. ދެވަނަ މެޗުގައި ބައްދަލުކުރާނީ އެމްއާރުޑީސީ އާއި ވަންއޯވަންއެވެ. ކުޅިވަރު އެކުވެނީގެ ކްރިކެޓް ދަނޑުގައި ކުޅުމަށް ހަމަޖެހިފައިވާ މި މެޗުތަކުގެ ކުޅުން ފަށާނީ 16:05 ގަ އެވެ.